Azaya 53 - Yálá laawoo hɛɓɛ (dc)

¹ Mɛ̨nįi ku bələ mɛ̨n, gbɛɛ kpɔ ɓə pai laai na? Ɛlɛɛ gbɛɛ ɓə Yai-Laa ə nwɔ huwalawala lɛ mą?

² Mąą nui ə kɛi kɛnɛ̨ Yálá ɲɛ̨i ɓa yɛ wulu ɓɔn, yɛ wulu hamui kulɔi lɔi hu kpalaa hu; Kɔlɔn və kɛ mą, ku kɛɛ gaa, ə kɛ a nui nu ɲɛ̨i hva pɛli kɛ kulɔi bɔ, bələi mąą mɛ̨ni ə kɛ la ku kwəi, ku hvo gaa tii.

³ Mɛlɛkpɛɛ kɛ mą, nuą daa di ɲɛgilɛn dɔɔ mą, ə ɓo a mɔ̨nɔ̨ laa looo, laa nɔ̨nwɔ̨ hvilɛn ŋąą bulu, ə ɓo a nui da di ɲɛ̨i loo dɔwɔ, a tɛ̨ą, ə kɛ ku ɲɛ̨i ɓa a nui mɛlɛkpɛɛ mą.

⁴ Ya pa, gu wɔ mɔ̨nɔ̨ɠąąi ka tii ə ɉəɠə, gu wɔ kɔ́kulááɠaai ka tii ə ɲee hee mu, Kɛlaa, ə kɛ gu kwəi guɔ ɉu ka tii di kaa dɔɔi, nui Yálá aa gɛlɛ́, yɛ nwumɛ̨ tɛ mą.

⁵ Ya pa di mɔ a gu wɔ kulɔ nwoo mu laa laa pɔɔ, di giin gu wɔ kwɛlitee laa mąą mɛ̨nį ɓa, gɛlɛɓoi mąąnɛ̨ɛ̨ kɛ ə liilaa tɛɛ gu pɔ, ya ɓə ə həli mą, ɛlɛɛ vaɠa palaɠaai tii ɓə kɛ a gu kɔ́lɔi pɔ̨nɔ̨ hɛn.

⁶ Gu kəlee gwaa kɛ lan yɛ ɓɛlaaɠaa, nu kəlee ə kɛi li a niiɓa pələ, ya ka tii Yai-Laa ə gu kəlee gu wɔ túwɔ pələ ɲɔ̨n nwulu lɛɛ nwuɔ̨.

⁷ Di naanɔ̨nwɔ̨ ɓo, kɛlaa ə gbɔwɔ mąąyɛɛ, pələ ta hvo kulɔ na, ə kɛ yɛ ɓɛlaa lon di kaa lii baai, yɛ ɓɛlaa haai gaa nəɠa tee nuą yəi, naa pilaa lɔ kɛ, hvaa hvo kulɔ na.

⁸ Di ɉon a wea, di giti tee a hvulu nuąi da diɛni di di muhəɠə gee pɔ, di nɛlɛ ɓə mąą liihɛlɛn ɉee? A tɛ̨ą, di gulɔ yɛnɛ̨ɛ̨ nuą lɔwai, nwɔ nuąi di wɔ kwɛli tee laa ɓə gɛ kɛlɛɓo yɛ həli mą.

⁹ Di gámą tee nu ɲɔ̨nwɔ̨ɔ̨ɠaa lɔwai, di now hɛn gɔw nąmįną lɔwai, ya pa hvo mɛ̨nį ɲɔ̨n gɛ, ɛlɛɛ, hulu mɛ̨nį ta hvo kulɔ na.

¹⁰ Yai-Laa ə hvaa mą ə giin a mɔ̨nɔ̨, ə hvaa mą nwɔ yɛnɛ̨ɛ̨ ə kɛ a pɔnnaa kulɔ haláá, gaa pai ɉuwu hu nuą kaai, ɲii hvóló hu yɛ kwɛa, ɛlɛɛ Yai-Laa liiɓa laa kaa pai hvɛɛi bɔ pələ.

¹¹ Mɔ̨nɔ̨i tii laa mɛ̨i mąą mɛ̨nį ɓa gaa pai kɛɛpono kaai, ɛlɛɛ yɛ lamu la yɛnɛ̨ɛ̨, yai tii gɔlɔn ŋąą a təlimo mun, gaa pai nuą kɛi a təlimonuą, yai tii a nwɔ́ tí mun, nu kpulu kɛnɛ̨ɛ̨ yɛ dɔ̨nɔ̨ hɔlɔɓo, mąąhɔlɔɓo, ə nwun ɉee di wɔ kwɛli tee laa kəlee mu.

¹² Yili ɓə gaa mą, gáá pai ɉeei nu kpulu lɔwai, da nu waa tamąą ɓə pai kɛi kɔ́ pulu hɛn ɲąąkwɛlɛi, mąąhɔlɔɓo, ə gili kulɔ gbɔwɔ hu, ə lɛɛ ɉu ə haa la, yɛ hvaa mą diɛ doo nɛ̨ŋɛn ɉəɠə nuą lɔwai, ə nu kpulu nwɔ hɔn ɲɔ̨n ɉee nwuɔ̨, ɛlɛɛ, yɛ nɛ̨ɛ̨mąą hvə nɛ̨ŋɛn gɛ nuą mąą mɛ̨nį ɓa.