Azaya 52 - Yálá laawoo hɛɓɛ (dc)

¹ 'Ə́ muhəɠə, 'ə́ muhəɠə, ə́ ə́ wɔ huwala walai ɲąątɛ, oo Siɔn, ə́ wɔ mąąwiɛ həɠəɠaai too ə́ kwaną, Ɉerusalɛmə, yɛ́i ə́ kaa a mąąhəɠə taa; mąąhɔlɔɓo, ə həɠə háákələi ɓa, kɛ́nɛ̨ kpoloa da nui mąą hvo həɠə li di hva kɛa lɔ ə́ pɔɔli.

² 'Kulɔ muluun gbala hu, ə́ ə́ mąąkpɛŋɛ̨n, ə́ haŋą ə́ tɔɔ, 'hee, Ɉerusalɛmə. Ɲɔwɔnŋaai kɛ ə́ kwąną, di tee kɛa, yɛ́i ŋɛ̨i ə́ kaa a Siɔn luwɔ nɛ̨ɛ̨gbɛlai.

³ Mąąhɔlɔɓo, yii Yai-Laa kaa moi ya ka: Di ka tɛɛ a mɛ̨inɛ̨ɛ̨, da kɛi nwɔ̨nɔ̨ pa ka nwun mąąɓoi, wali mɛ̨nį hva kɛ ɉu.

⁴ Mąąhɔlɔɓo, yii kpɔ Ną́mu Yai-Laa kaa moi ya Ka: Gɔɔ tɔɔi lɔwai, Eziptə ɓə nwɔ nu huwui ə li laa mąąkilɛ pələi, ɲąąkpɛɛi lɔwai, Asiri ɓə kɛa naa nɔ̨nwɔ̨ ɓo.

⁵ Yiihu kɛa, lə ɓə kɛa ŋį́ gɛ? Yai-Laa woo li. Ɓɛlɔwai daa nwɔ nuąi hon na a mɛ̨inɛ̨ɛ̨, di laanɔ̨nwɔ̨ ɓo nuą di kaa tomąi, Yai-Laa woo li. Hvóló kəlee, da kɛ naa ɓɛlɛkpɛɛi mą.

⁶ Yili ɓa, nwɔ́ nu huwui kaa kɛa pai náá kɔ́lɔn ɉii, ə həɠə kɛa volói tii ɓa, di kaa pai gɔlɔn ɉii, diɛ ɲą́ą́ ɓə ŋį́ kɛ hvaai di pɔ, gɛ́ kɛ diɛ: Ɲą́ą́ ka.

⁷ Nuąi wɛlɛɛ woo lɛlɛɛ laa həli, di kɔ́wɔ lɛlɛɛi di mu, ɲeeɠaa ton na, diɛi di kaa liilaa woo laahəlii, diɛi da kɛ mɛ̨nį lɛlɛɛ woo laa həlii, diɛi da kɛ nwun mąąɓo loloɓoi; diɛi da kɛ kɛi Siɔn ɓa: Ə́ wɔ Yálái kaa tɔɔlaa kɛi.

⁸ Ə́ wɔ pələi pɔ kaa nuą woo ka tii, di kaa tómąi a kwəinɛ̨ɛ̨; diɛ tómą a yee tɛɛmąą kwəinɛ̨ɛ̨ woo, mąąhɔlɔɓo, di ɲɛ̨i hei di kee ɲɛ̨ilai, diɛ Yai-Laa kaa, yɛ pənə yɛ pa Siɔn daai.

⁹ 'Ka tomą a gee a kwəinɛ̨ɛ̨ woo, kaai a Ɉerusalɛmə taa kpoloonŋaa, mąąhɔlɔɓo, Yai-Laa kaa nwɔ nu huwui liilaai, gaa Ɉerusalɛmə nwun mąąɓoi.

¹⁰ Yai-Laa kaa nwɔ huwalawala mąąhəɠɛɛi kulɔi pɔ̨nɔ̨ ŋą lɔi kəlee ɲɛ̨i ɓa, lɔi wəlin na kəlee kaa pai Yálá nwɔ ɓalo mɛ̨nį kaai.

¹¹ 'Ka li, 'ka li, 'ka kulɔ laa, 'ka hvo tunwɔ̨ hɛn gɔhɔɓoɔ ta ɓa. 'Ka kulɔ di lɔwai, 'ka ka mąąhəɠə, kaai Yai-Laa mąąwiɛ hɛn ɲąŋąɠaa kaa ka yəi.

¹² Ka hvo pai kulɔi laa a gilɛ, hvo nwɔ̨nɔ̨ pai kɛi yɛ ka ki pu, mąąhɔlɔɓo, Yai-Laa kaa pai kɛi ka tɔwɔ, ɛlɛɛ, Israɛlə nwɔ Yálái ɓə pai kɛi a tɔɔ bulu.

Yai-Laa nwɔ tímun

¹³ Nwɔ́ tímun kaa pai tɛi tɔwɔ, gaa pai heei kɛnɛ̨ hɔlɔɓoi, da mąąwiɛ laa kɛnɛ̨.

¹⁴ Gɛ pələ ə nuą mąąɲɔw, mąąhɔlɔɓo, ɲɛ̨ilai hvo kɛa kɛ kulɔ li nu ɓa, ɲɛ̨ilai ɉee pələ ɲɔ̨nwɔ̨ pələ ɓa.

¹⁵ Yili ɓə gɛi, gaa pai hįį tamąą nɔ̨nwɔ̨ waai diɛ, yii kɛa tɔɔɓɛlaa di mo di hvo gɔlɔn, mąąhɔlɔɓo, yii di mo diɛ, da yii di kaa gaai di hvo tanɔ̨. Ɛlɛɛ, yii di kaa gaai, di hvo kɛ yili hukulɔ li diɛ.