Azaya 5 - Yálá laawoo hɛɓɛ (dc)

Yálá nwɔ lɔi mąątɛ̨nɛ̨ wələ

¹ Ka nɛ́ɛ́ laa ŋį́ mɛ́lan mąątɛ̨nɛ̨ wələ too, yaa da nwɔ viɲə di wɔ wələ li. Viɲə yɛa ə kɛ mɛ́lan ɲəi yee ta ɓa, lɔi lɛlɛɛ hu,

² ə nɔi ɓuwɔ, ə gwɛniɠaa kulɔ ɉu, ə niiɓa hihɛn ɉi laa, ə koloon dɔɔ díi hɛ̨ąi, ə viɲə ya kulɔi pɛli laa, ɲɛ̨i ə ɓo kɛa viɲə ɓá lɛlɛɛ tɔwɔ, kɛlaa ə ɓá a ɲɔ̨nwɔ̨ɔ̨.

³ Ə həli kɛa kaa, kaai Ɉerusalɛmə daai, da Ɉuda nuą, ka kwa nwɔ́ viɲə yɛai ku lɔwai mɛ̨nįi ŋɛ̨i hutɔɔ.

⁴ Lə kpɔ ɓə ŋą́ pɛli gɛi mą, ə tɛɛ yili ɓa? Ŋą́ kɛi viɲə ɓá lɛlɛɛɠaa mąąkpɔn, Lə ɓə kɛ yai ə ɓá a ɲɔ̨nwɔ̨ɔ̨?

⁵ Mɛ̨nįi gáá pai gɛi, nwɔ́ viɲə yɛai ɓa, gáá nɛi kaa: galai tii dinɛ̨n ŋąą mą, gáá nwolo teei mą, taatɛlɛɛɠaa di di laa mįi laa, ŋą́ daɠa nuą di hiɛ ɉu.

⁶ Gáá nąą kɛi a mąąwɛli lɔi, di hva kɛa mɛ̨i tee, di hva tumɔ kulɔ ɉu, ɲąąlən da ɓomodiliin mə pai ɓɔn ɉii laa, ɛlɛɛ, ŋį́ tɔ́n dɔɔ tulɔ kpinįnŋąą diɛ, di hva kɛa tulɔ pu mɛ̨i.

⁷ Yai-Laa Mɛ̨nį Kəlee ŋą Hééɓomun nwɔ tíi ɓaa, a Israɛlə nwɔ pɛ́lɛ́i, hihɛn yii nwɛli ə kɛ mą kpɔ kɛnɛ̨, ya ɓaa a Ɉuda nu huwu, ɲɛ̨i ə kɛ təlimo laa tɔwɔ, kɛlaa wea mɛ̨nį ɓə aa gaa, ɲɛ̨i ə kɛ tɛ̨ą tɔwɔ, yiihu kɛa mąąwɛli nuą wɔlɔ woo ɓə tɔɔi.

Nuą daa Yálá liiholi

⁸ Kpalo ɓɛlaai nuąi da pɛlɛ́ tɔɔ kee la diɛ, diɛ tíi pɛlɛ tíi ɓá, diɛ nɔi kəlee hon, nɔi yɛ lɛɛ diɛ tɔ̨nɔ̨ di yəi.

⁹ Ŋą́ Yai-Laa Mɛ̨nį Kəlee ŋą Hééɓomun kwɛla woo mɛ̨n, yɛ kɛ diɛ: «Pɛlɛ tamąą, di kpɛa-kpɛa di lɛlɛɛ, di kaa pai lɛɛi a di howolo; mu nuą di hva kɛ mą.

¹⁰ Tíi ə mąn kɛnɛ̨ daną daną, mɔ̨nun mɔlɔ hveelɛ hva hɔlɔɓo ɉu, kəgən ɉu pow mɔ̨nun ɉuwu yɛ kulɔ a kəgən ɉu tɔ̨nɔ̨.»

¹¹ Nuąi da humo diɛ lɔɔ kpəɠiɛɠaa mąą gilɛ həɠə, ɛlɛɛ, kpinį ə mąn pɛlɛ, di ɓo lɔ lɔɔ ɓa, kpalo ɓɛlaai diɛ, mąąhɔlɔɓo, lɔɔ aa di kili mɛ̨i kpulu.

¹² Bɛlɛgwəi gwɛnįn, gololon gwɛnįn, da damąn mə da kɛ dɔɔi di mɛ̨i nɔɔ kpələiɠaa ɓa, Kɛlaa, mɛ̨nįi Yai-Laa kaa gɛi, di ɲɛ̨i hva kɛ laa; mɛ̨nįi ɲee kaa mą, di hva nąą kaa,

¹³ Yili mąą mɛ̨nį ɓa, «di kaa pai lii a nwɔ́ nu huwui kɔluwɔlaa hu, mąąhɔlɔɓo, kili hvo kɛ li mą, nɔi kalanɉonŋąą, kaa pai haai a pulu, nɔi lonnii, diɛ haa a kpələ wɛli.»

¹⁴ Nąąlɔwai, ɲąmuątaa a naa taɠa kpɔ kɛnɛ̨, ə gwaną wolo hu kɛnɛ̨, nu kpɛa-kpɛaɠaa da mąąwɛli nuą diɛ yɛɛ ɉu da di wɔɔ kwəinɛ̨ɛ̨ huluun nwoo.

¹⁵ Nu kanŋaa kaa pai di mąą pɛlɛi, hvo kɛli a kɛ tii, nu kan nwun mąą kaa pai yɛɛi, kpɔwɔ ɲąąkɛnɛ̨ nuą di kaa pai di nwun vilɛn ɉii lɔi ɓa.

¹⁶ Yai-Laa Mɛ̨nį Kəlee ŋą Hééɓomun laa kaa pai tɛi, nwɔ kiti tee pələ hu, Yálá mąąhəlɛɛ kaa pai gbɔwɔ lɛi a mąąhəɠɛɛ ɉaŋą pələ hu.

¹⁷ Ɓɛlaa lonnii kaa pai kɛi di laa mįi laa, yɛ da kɛ kpomói, ɓoolu lonnii wulaaɠaa diɛ di laa mįi daa kpoloon ɉu,

¹⁸ Kpalo ɓɛlaai diɛ, da nɛ̨ŋɛ̨n ɲala di kɔ́wɔ pɔ, a nu ɓowo gɔtɔ yɛli, da túwɔ́ pələ ɲɔ̨n, yɛ nu a kɛi wotolo yala.

¹⁹ Diɛ kɛ diɛ: «Ə gɛ kani ɉa, ə nwɔ kólói kɛ ɉa ku nąą kaa. Mɛ̨nįi Israɛlə nwɔ mąąhəɠəmun gwəi, ə too pɔ̨nɔ̨ŋą kuɔ pɛli gɔlɔn ɉii.»

²⁰ Kpalo ɓɛlaai diɛ, da mɛ̨nį ɲɔ̨nwɔ̨ɔ̨ laa hee a nɛlɛɛ, diɛ mɛ̨nį nɛlɛɛ laa hee a ɲɔ̨nwɔ̨ɔ̨, diɛ kɛɛ pɔ̨nɔ̨ laa hee a kpinį, diɛ kpinį laa hee a kɛɛ pɔ̨nɔ̨; ɉɛn nwąnąą, diɛ naa hee a nəɠən ŋąą, ɉɛn nəɠən ŋąą, diɛ naa hee a nwąnąą.

²¹ Kpalo ɓɛlaai diɛ, da di kpɔwɔ kaa a kilimąą nuą, diɛ di kpɔwɔ kaa di kwəi pələ, a mɛ̨nį kɔ́lɔn nuą.

²² Kpalo ɓɛlaai diɛ, di kaa a lɔɔ kpələ kuláaɠaa, di yee tɛɛ nu kəlee ɓa lɔɔ kpəɠiɛɠaa humui.

²³ Nui aa ɉɔn gɛ, da kiti nɛ̨ɛ̨ mą, mąąhɔlɔɓo, aa di tuwɔ ɲąą, di hva tələnmo mun nwɔ tɛ̨ą ɓo.

²⁴ A kɛ tii, bələi lɔ nwɔ̨n a dɛ̨ɛ̨ kələn na, bələi lɔ mɔ̨nun gbowo a kələn na nwɔ̨n nən ɉu, bələ ɓə di hamu kaa pai luwun ɉii la; da ɓɔn, hvaŋą yɛ li a di ɓɔn, mąąhɔlɔɓo, daa Yai-Laa Mɛ̨nį Kəlee ŋą Hééɓomun nwɔ mąąkwɛli wooi pili, daa tɛɠɛɓo Israɛlə nwɔ Mąąhəɠəmun nwoo hu.

Yai-Laa nwɔ liiholii

²⁵ Yili mąą mɛ̨nį ɓa, Yai-Laa lii aa holi nwɔ nuąi pɔ, aa ɲee tɛ mɛ̨i di kɛlɛ mɛ̨nį ɓa, yeeɠaa diɛ kpɛlin, di powaɠaa di ɓo gwəli hɛ̨ąiɠaa yɛ tulun ŋą, kɛlaa ə mą kɛ tii, nii hvo nii laa li, ɲee tɛɛ lɔ ni mɛ̨i.

²⁶ Aa ɲee kpuɔ lɛ lɔi mąą kwɛaa ɓa, yɛ dəli a kwelee woo lɔi kpon ɉeei, ya ka tii gɔwɔ mąą hulɔi, yɛ pa a gilɛ.

²⁷ Nu ta hvii hva kpɛɛ di lɔwai, nu ta hvo kalin ɉii, ɉɛ̨ą yili kɔ́lɔɠaa laa hvo ɓoi, di kɔ́wɔ ŋą kɔ́lɔɠaa yɛli hvo teei.

²⁸ Donwą ɓaɠaaɠaa, da gilɛnŋąą kəlee di hu yalaa ɓə, di wɔ hooɠaai kɔ́wɔ ɲą wala walaai yɛ kwɛni, di wɔ wotoloɠaai kɔ́wɔ ə ɓo yɛ hvaŋą.

²⁹ Nwoo kaa tɔɔi yɛ Yala haa, gaa huluun ɉi yɛ Yala laŋą lon, a tómą, ə wolo gɔ̨nɔ̨n mą, yɛ li la, nu hva hɔlɔɓo hvo gulɔ ɲəi.

³⁰ Kɛlaa mąą hvólói tii, da tómą mɛ̨i, ə ɓo yɛ gboloyá a kɛi huluun, da di ɲɛ̨i hee nɔi mɛ̨i, ɉɛn da gaa, ya ɓaa kpinį, da mąąwɛli mɛ̨nį, hvóló hu a kpinį a nąląąn ɉu wiaa.