Azaya 49 - Yálá laawoo hɛɓɛ (dc)Yálá nwɔ tímun kaa a lɔiɠaa di wɔ kɛɛ pɔ̨nɔ̨ 1 Gboloyá hɛ̨ąi lɔiɠaa, 'ka ka wəli tɔɔ nwóó ɓa, kwɛala lɔiɠaa, 'ka ka wəli tɔɔ kpɔ a nɛlɛɛ, Ŋą́ lɛɛ néé kwəi, Yai-Laa ə də́li, ŋį́ kɛ nii néé kwəi, náá ə ɓo na. 2 Ə nwóó kɛ ná yɛ ɓɔwa kwɛaa ɲąą kuláa, ə mą́ą́ kpɛ ɲee nįnįn mu. Ə gɛ́ a tɔ́nwą ɲąąkulaa, ə nów nwɔ tɔ́nwą taai hu. 3 Yɛ mą́ą́: nwɔ́ tímun mąą a yɛ́, yɛ Israɛlə, gáá pai nwɔ́ mąąwiɛ kulɔi pɔnɔ̨ŋą ə́ pɔ pələ. 4 Kɛlaa, nwɛ́i, ŋį́ kɛi kɛ diɛ: «ŋą́ą́ gbɔ́wɔ́ hviikpɛɛ lɔ kpɛi kpɛli, ŋą́ą́ vą́ŋą́ kəlee hu kala lɔ hvąŋą pulu, dɔlɔ hvo mą, ya pa nwɔ́ tɛ̨ą mɛ̨nį ə kɛi lɔ mą́ą́ kpɔn, Yai-Laa kwɛlɛ!» Vɛ́la ə ɓo nwɔ́ Yálái yəi. 5 Kɛlaa, yiihu, Yai-Laa aa hvaa, yai nɛ́ɛ́ néé kwəi, ə bɛ́li a nwɔ tímun, gɛ́ pɛli pənəi gɛ́ pa a Ɉakɔbə bɔ pələ, Israɛlə yɛ pənə yɛ ɲąąkpɔn gwɛlɛ. Ə həɠə nąąlɔwai ɓa, dɔ́lɔ́ kaa mą́ą́ Yai-Laa ɲɛ̨i ɓa, mąąhɔlɔɓo, vą́ŋą́ ɓaa a nwɔ́ Yálá. 6 Yɛ mą́ą́: «Ə́ kɛ mɛ̨nį ɲə́i a nwɔ́ tímun, yɛ́ Ɉakɔbə huwu muhəɠə, yɛ́ pənə, yɛ́ pa a Israɛlə huwu kpəli, yili kolɔɔ ɓə, Ŋą́ą́ nwɔ̨nɔ̨ ə́ kɛ a huwu takpɛliɠaa di wɔ kɛɛ pɔ̨nɔ̨, lɔi kpɛlai kəlee yɛ nwɔ́ ɓalo mɛ̨nįi hɔlɔɓo ə́ yə́i.» 7 Mɛ̨nįi Yai-Laa, Israɛlə nwun mąąɓo Yálá, da nwɔ nu mąąhəɠɛɛ kaa moi, ya ka: Yai daa mɛlɛ kpɛɛ mą, yɛnɛ̨ɛ̨ nuą diɛ gaa yɛ hɛn ɲɔ̨nwɔ̨ɔ̨, ə ɓo a tɔɔɓɛlaa di wɔ luwɔ, Gaa kɛi mą, tɔɔɓɛlaa kaa pai ə́ kaai, diɛ di muhəɠə, lɔi ɲąąwooɓo nuą, diɛkpɛli, diɛ kwɛli hvilɛn mą, diɛ yili kɛ tii, Yai-Laai ɲɛ̨i dəlimoɔ, mąą mɛ̨nį ɓa, Israɛlə nwɔ nu mąąhəɠəɛi ɲɛ̨i ə́ həɠə ɉu, mąą mɛ̨nį ɓa. 8 Yai-Laa woo ka, yɛ yɛ́: ŋį́ ə́ woo mu hon, a mɛ̨inɛ̨ɛ̨ yələ, ŋį́ ə́ mąąkpɔnmąąɓo, a nwun mąąɓo yələ, ŋį́ ə́ tɔɔ a dee, ə́ kɛ a kwa nuą ku lɔwai mįnɛ̨, yɛ́ nɔi tɔɔ, ka kwɛlin nɔiɠaai daa ɉu kala, yɛ́ pɛ̨nɛ̨, yɛ́ dɔɔ. 9 Yɛ́ kɛ gaho nąmįną diɛ: «'Ka kulɔ!» Yiiɠaai kɛ kpinį, yɛ́ kɛ diɛ: «'Ka kulɔ bono ŋą!» Di kaa pai laamii hɛn ɉɔlɔɓoi pələ kəlee pɔ, diɛ di kɔ̨nɔ̨n gaa yee lɔwai kəlee ɓa. 10 Di hva kɛa pulu həɠə, ə mą kɛ, kpələ wɛli, wəleen, da hvóló, di hva kɛa di hvii kpɛɛ, mąąhɔlɔɓo, Yálái di mąą lii kaa gwəi kɛnɛ̨, ya ɓə pai kɛi di ɲɛ̨itɔwɔ, yɛ li a diɛ ya kɛɛnąąɠaa, diɛ di nį́į́ lɔ laa. 11 Gáá pai pələ laai yee kəlee nwuɔ̨, diɛ bələ lɔwaaɠaa laa hvɛɛ mą́ą́ mɛ̨nį ɓa. 12 Di kaa pai; di kaa həɠəi kwɛaalaɠaa, daɠaa diɛ həɠə ɲələi pələ, da hvóló tooi pələ, dakpɛliɠaa diɛ həɠə Asuan lɔi hu pələ. 13 Yələ kɔ́lɔn, 'tómą a kwəinɛ̨ɛ̨, lɔi, 'ə́ mąną, yeeɠaa, 'ka tómą kpɔ a kwəinɛ̨ɛ̨ kɛnɛ̨, mąąhɔlɔɓo, Yai-Laa kaa nwɔ nuąi lii laai, di mąąwɛliɛi kɛ, aa di ɲɛ̨imąąwɛli kaa. Daa pənə daa Ɉerusalɛmə tɔɔ 14 Siɔn ə kɛi kɛ diɛ: «Yai-Laa aa ɲee kulɔ mú, Ną́mu aa lɛ̨ą mą́ą́.» 15 Nɛ̨ɛ̨nu a mɔ̨ɔ̨ pɛli lɛ̨ąi non dala ɓa? A mɔ̨ɔ̨ pɛli kpɛlai gwəi lon nwɛlila kɛɛ ɓa? Ə mą kɛ kɛ nɛ̨ąą da pɛli kɛ lɛ̨ąi, nwɛ́i və́ pai lɛ̨ąi yɛ́! 16 Ŋą́ą́ ə́ kanąn ɲeelii hu, ə́ mąą kpɛ hį́iɠaa di ɓo ɲɛ̨́i mu a yələ kəlee. 17 Ə́ lonnii kaa pai a gilɛ, diɛi nuąi ə́ pu, diɛ ə́ hu kala, di kaa di mąąkwəai yɛ, diɛ di mąą kwɛa yɛ́. 18 Ə́ ɲɛ̨i laa ə́ kwɛlɛ nąą kəlee, ə́ kɛɛ kaa: Di kəlee, di kaa di ɲąąkpɔn ɉii, diɛ pa ə́ pɔ, Yai-Laa aa gwɛla, yɛ diɛ: Yii kpɔ gáá a vúlú, Yai-Laa woo li. Ə́ kaa pai gəlee kɛi a ə́ mąą yili hɛn, yɛ́ di kɛ a ə́ hąą yili kɔ́lɔ, yɛ nɛ̨ɛ̨nui di kaa lííla nwɔ wɛli pɔ. 19 A tɛ̨ą, ə́ kaa a lɔi pun, a lɔi mąąwɛliɛ, kɛlaa, ə həɠə yiihu ɓa, ə́ hu kaa pai koloi, ə́ hu nuą tamą pələ ɓa, ɛlɛɛ, nuąi kɛi ə́ hukala, diɛ li kwɛaala. 20 Ə́ lonnii ə́ kɛi kɛ diɛ, daa pili, di kaa pai kɛi pənəi, diɛ wɔlɔ, ə́ wəlii, diɛ kɛ yɛ́: «ɓɛ kolɔɔi ku mą́ą́ mɛ̨nį ɓa, 'lɔi tɛɛ bɔ́, ə́ mąą ta wolo lɛɠɛ tii, ŋį́ hee.» 21 Nąąlɔwai, ə́ kaa pai kɛi ə́ kpɔwɔ mąąni kɛi, yɛ́ kɛ diɛ: «Kwa gbɛɛ ɓə yiiɠaai kaa? Ɲą́ą́i lon və kɛa kɛ mą́ą́, ŋį́ ɓo a kpomąnɛą, daa kɛ gúlɔ lɔwɛi, ŋį́ ɓo luwɔlaa hu, gbɛɛ ɓə yiiɠaai kulɔ ɉu? Ŋį́ kɛ dɔ́nɔ́ kon ɉu, yiiɠaai di kɛ mį?» 22 Mɛ̨nįi Mɛ̨nį kəlee ŋą Hééɓomun Yálá kaa moi, ya ka: gáá pai ɲee lɛi hįį takpɛliɠaa diɛ, gáá pai huu pilii nuą diɛ, di kaa pai pənəi diɛ ə́ lon ɉinąą hee di yee kɔ̨nwɔ̨n ɉu, diɛ pa a diɛ, diɛ ə́ lon nɛ̨ąą hee di kalan ŋą. 23 Tɔɔɓɛlaa ɓə pai ə́ kulɔi ɉu, tɔɔ nɛ̨ąą diɛ ə́ ɲąąkɔn, di kaa pai kɛi pɛlɛi di liiɓa, diɛ ə́ kɔ́wɔ ɓa munuun gɔmɔ̨n, Nąąlɔwai, yá gɔlɔn gɛa, yɛ́ kɛ: Gáá a Yai-Laa, nuąi da di kilitɔɔ mą́ą́, nwumɛ̨ hva tɛ diɛ. 24 Hɛn kɔ́kuláá a ɉəɠə da mɔ̨ɔ̨ pənə di gulɔ ɲəi? Nui tɔɔmun a ɉon a kɔluwɔ, da pɛli di gulɔ ɲəi? 25 Yai-Laa yɛ diɛ, gaa pai kɛi tii: di kaa pai kɔ́ kuláa nwɔ kɔ-hon kulɔi ɲəi, di kɛɛ kalamun ə ɉon, da nwun mąąɓo! Nui a hvaa pɛlɛ yɛ́, ɲą́ą́ ɓə pai vaa kɛi, ə́ lonnii di wɛi, ɲą́ą́ ɓə pai di ɓaloi. 26 Nuąi kɛi ə́ mɔ̨nɔ̨ ɓo, gáá pai di kpɔɔ kpɔɔ huwɔ lɔi di la, diɛ pilɛ di kpɔɔ kpɔɔ ɲąmą hu, yɛ lɔɔ nįnɛ̨ ya, ɛlɛɛ, yɛnɛ̨ɛ̨ nuą kəlee kili a pu ɉu diɛ, nui ə́ ɓaloi, ɲą́ą́, Yai-Laa, ɲą́ą́ ɓə, diɛ nui ə́ nwun mąąɓo, ya ɓaa a Ɉakɔbə nwɔ Kpakoloi! |