Azaya 48 - Yálá laawoo hɛɓɛ (dc)Yálá yaa tɔnɔ lɔ ɓə yɛnɛ̨ɛ̨ kaa ɲəi 1 'Ka ka wəli tɔɔ mɛ̨nįi ŋɛ̨i ɓa, Ɉakɔbə nwɔ pɛ́lɛ́i mu nuą, kaa Israɛlə laa kaa kaa, kaai kulɔ Ɉuda huwu hu, kaai ka ka kwɛla a Yai-Laa laa, kaa Israɛlə nwɔ Yálái hvɛli kɛlɛ kɛlɛ, Kɛlaa, hva kɛ tələnmolaa hu da tɛ̨ą mɛ̨nį. 2 Ya pa, da kɛ kɛi kaa: «Daa mąąhəɠɛɛ hu nuą», kaa ka kilitɔɔ Israɛlə nwɔ Yálái ɓa, yai naa ɓaa; Yai-Laa Mɛ̨nį Kəlee ŋą Hééɓomun. 3 Mɛ̨nį tɔlɔɔɠaai tii daa tɛɛi, ŋį́ di lɛɛ kpɔ kwɛaa la, ŋį́ mo, bələ ə kulɔ ná, ŋį́ ɉukulɔ, ŋį́ gɛ́ tii kɛ ɉu, di pa lɔ nu kəlee tɛɠii. 4 Ŋą́ gɔlɔn gɛ, gɛ́ diɛ ə́ kili wala walaai, ɛlɛɛ ə́ kpowola wala walaai yɛ kwɛli, ə́ tɔwɔla wala walaai yɛ ɓala kwɛli, 5 ya ɓə gɛ, gɛ́ mɛ̨nįɠaai tii lɛɛ kwɛala, gɛ́ di ɓo yɛ́, ŋį́ di mąą mɛ̨nį hukulɔ yɛ́, di hvo teɠa kɛ pai həlii, hvo pa nee kɛ diɛ: «Nwɔ́ halii ka ŋɛ̨i mɛ̨nį kɛi, nwɔ́ hali mąą nįnįn ɓə mɛ̨nįi ŋɛ̨i ɓo.» 6 Mɛ̨nįi ŋį́ nɛɛ kwɛaala ŋį́ ɉukulɔ, ka bələ mɛ̨n, yii kɛa mɛ̨nįi tii aa həli, ka ka yee heee mu. A kɛ tii kaa kpɛli, ka hvo mɔ̨ɔ̨ pai naa həlii? Gáá kɛa mɛ̨nį nįnɛ̨ɠaa hukulɔi kaa yiihu, yiliɠaai di kɛ ɲéé pulu, hvo kɛ di kɔ́lɔn. 7 Di pɛliɛ lɔ ka yiihu, mɛ̨nį hukwɛaa hvəli, yələɓɔi lɔwai, hvo nii kɛ bələ mɛ̨nį ni, hvo pa nee kɛ diɛ: «Di kpaɠala ə kɛ mą́ą́.» 8 Hvo nii ta kɛ bələ mɛ̨nį ni, hvo kɛ di kɔ́lɔn, və́ ni kɛ ə́ wəli lon doo li ɉu nąąlɔwai tɔwɔ, mąąhɔlɔɓo, gbaɠala ə kɛ mą́ą́, gɛ kɛ ya kulɔ nu pulu, ə́ kɛ ni ə́ lee kwəi, diɛ kɛ yɛ́: «Kulɔ nwoo mun lon.» 9 Kɛlaa náá mąą mɛ̨nį ɓa, gáá nwɔ́ liiholii yalii bulu, gáá ɉu hon ɉii, mą́ą́wiɛ mɛ̨nį ɓa, ə́ mąą mɛ̨nį hvəi; və́ pa nee ə́ mąą mɛ̨nį kulɔ níí hu, 10 Ya ka ŋɛ̨i kɛa ŋą́ą́ ə́ waa nwɔ̨n ɉu, yɛ da kɛi wali waa, ŋą́ą́ ə́ hu həɠeen a mąąwɛli mɛ̨nį. 11 Ɲą́ą́ gbinįi mąą mɛ̨nį lɔ ɓə gɛ gɛ́ yili kɛ tii, mąą honɛɛli kɛ di hvo náá ɓɛlɛ too. Vá nwɔ mąąwiɛ tɛɛ nu takpɛli pɔ. 12 'Ə́ wəli tɔɔ Ɉakɔbə, Israɛlə yɛi gáá ə́ təlii. Gɛ́ pələ lɔ ɓaa gɛ́ pələ: Ɲą́ą́ ɓə a dɔlɔɔ tɔlɔɔ, ɲą́ą́ ɓə ɓaa gbəlan mąą. 13 Teą li, ɲą́ą́ ɓə lɔi pɛli, má mįi yee ɓə yələkɔlɔn naa, ŋį́ di təli, di kəlee daa mą pa a gee. 14 'Ka kəlee ka ka ɲąąkpɔn, ka ka wəli tɔɔ, di nɛlɛ ɓə a mɛ̨nįɠaai ŋɛ̨i lɛɛ tɔwɔ, ə di hukulɔ, yɛ kɛ diɛ: Nui Yai-Laa a nwɛli la kɛ, gaa pai niiɓa mɛ̨nįɠaa ɲɛ̨i kulɔi, yɛ hvilɛn na Babilonə da bulu nuą diɛ, diɛi a Kalde nuą? 15 Ɲą́ą́, ɲą́ą́ ɓə hvaa; gaa tii, ɲą́ą́ ɓə ɲą́ą́ ɓə dəli, ɛlɛɛ, gɛ kóló hu kaa pai nɛ̨ɛ̨i! 16 'Ka ka mąą lɛɠɛ mą́ą́, 'ka mɛ̨nįi ŋɛ̨i mɛ̨n, ə həɠə gɔwɔ tɔɔ yələ ɓa, və́ ta mɛ̨nį ta ɓoli loo pələi, ə həɠə nwɔ̨nɔ̨ mɛ̨nįi tii kɛ yələ ɓa, gáá lɔ ɓɛ, yili mukulaa ɓaa, Mɛ̨nį kəlee ŋą Hééɓomun Yálá ɓə dɔ́ɔ́, a nwɔ Kilii. 17 Yai-Laa woo ka, yai tii ə́ nwun mąąɓoi, Israɛlə nwɔ nu mąąhəɠɛɛi, Ɲą́ą́ Yai-Laa, ɲą́ą́ ɓə gáá a ə́ wɔ Yálái, yai a ə́ mąąkwɛli, yɛ pɛli ɉu tɔ̨nɔ̨ hɔlɔɓoi, yai gɛ bələi tii yáá ɉon na, yɛ́ hiɛ mɛ̨i. 18 Ee kə! Akɛ kɛ ə́ ə́ wəli tɔɔ nwɔ́ tɔ́n nwooɠaai diɛ, ə́ wɔ liilaai ə li kɛ yɛ ya lee kɛnɛ̨, ə́ wɔ tələnmolaa ə ɓo yɛ gboloyá; 19 ə́ huwu ə li kɛ yɛ ɲɛa kɔ́w, ɉu lonnii di ɓo yɛ kwɛni wean, naa hvo li kpɛɛ ɲɛ̨́i mu a yələ lɔpee ta, di hvo li kɛ naa waa laa. 20 'Ka kulɔ Babilonə daai, 'ka pu ka kulɔ Kalde nuą di wɔ lɔi hu, 'ka noloɓo a ka woo kɛnɛ̨, nuą di mɛ̨n, 'ka bələ taɠa, ə həli kpɔ lɔi kpon ɉeei, kaa kɛ diɛ: «Yai-Laa aa nwɔ tí mun Ɉakɔbə nwun mąąɓo.» 21 Kpələ wɛli hvo di hon nɔi pun tii ə di tɛɛ nąą pələ, ɉu; ə ya kulɔ kwɛni kpuwulu hu di mąą mɛ̨nį ɓa, ə gwɛni kpuwulu ɓɛla, tɛɛ yaɠaa di laa. 22 Kɛlaa, Yai-Laa yɛ diɛ, nu ɲɔ̨nwɔ̨ɔ̨ɠaa di wɛi di hva liilaa hɔlɔɓo kpɔ tanɔ̨n gbən. |