Azaya 47 - Yálá laawoo hɛɓɛ (dc)Babilonə woloi lɔwai aa hələ 1 Yɛi ɓaa a Babilonə nɛ̨ɛ̨gbɛla, 'ə́ mąą yɛɛ kpɔ kɛnɛ̨! 'Laa munuun gbala hu! 'Ka həɠə dɔɔ kpəlin ɉu, 'ka hee luwu hu, Kalde nɛ̨ɛ̨gbɛlaɠaa, mąąhɔlɔɓo, di hvo kɛa pai kɛi ə́ laa ɓa: «Nɛ̨ɛ̨nu lɛlɛɛ, kwəinɛ̨ɛ̨ kulɔ nɛ̨ɛ̨nu.» 2 'Ɲənə həɠə, 'ə́ mɔ̨nun ɉiɠɛ! 'Mɔlɔ kulɔ ə́ nwun ma! 'Ɉəɠə tɛ, 'ə́ kɔwɔ wulu lɛ! 'Ɲá teen. 3 Nuą di ə́ kpuwulu kaai! Ə́ tənəi ŋɛ̨i ə́ kpáánŋąąi, yɛ́ noo, nuą di gaa, gáá pai nwą́ną́ kulɔi, nu ta hvo laa, yɛ kpɛ̨ąn ɉii dɔ́wɔ́. 4 Nui a ku nwun mąąɓo, naa ɓaa a Yai-Laa Mɛ̨nį Kəlee ŋą Hééɓomun, Israɛlə nwɔ Mąąhəɠəmun. 5 'Ə́ mąą yɛɛ! Woo tɔ̨nɔ̨ kpɛli hvo kulɔ ə́ la! 'Lɔ kpinį pɛlɛ́ mu, Kalde nɛ̨ɛ̨gbɛla! Mąąhɔlɔɓo, di hvo kɛa pai kɛi ə́ laa ɓa: «Tɔɔ lɔiɠaa ɲąąwooɓomun.» 6 Nííhvoliɛi kɛ nwɔ́ nu huwui pɔ, ŋą́ą́ kɛ nwɔ́ lɔi ɓɛlɛkpɛɛmą, gɛ́ nwɔ́ nuąi too ə́ yəi ɲą, Kɛlaa, hvo di ɲɛ̨imąąwɛli tai lɔpee kaa li, yáá wiɛ hulɔgoloɠaa mɛ̨i, yáá dɛɛ ɲɛ̨n ɉu. 7 Ə́ kɛli kɛ diɛ: «Gáá pai kɛi heeni lɔiɠaa mɛ̨i, a yələ kəlee mɛ̨nį.» Hvó ə́ kiliŋąhiɛ li, yɛ́ mɛ̨nįɠaa mukulaa ɓa, hvó gaa, hvó kpɛli ə́ kiliŋąhiɛ li di laa kulɔi ɓa. 8 'Ə́ wəli tɔɔ kɛa yɛnɛ̨ɛ̨ wɛli la kɛmun, yɛ́i tɔɔlaa kɛi a ə́ wəli pulu laɠiɛ, yɛ́i yá kɛ kɛi diɛ ə́ kwəi pələ: «Ɲą́ą́ lɔ ɓə laa, akɛ ɲą́ą́ hvəi, nu takpɛli hvo laa, nwɛ́i və́ pai kalaninnaa kɛi a yələ lɔpee ta, və́ pai hvɛɠɛi a nónnii.» 9 Mɛ̨nį ɲąąnwąnąą hveelɛi tii kaa laai yɛ́, a yələ tɔ̨nɔ̨, hvóló tanɔ̨n yee mu, yá hvɛɠɛ a ə́ lonnii, kalaninnaa ə laa ə́ mɛ̨i, gəlee kaa pai həlii yɛ́, bələi mąn tɔlukpɛ pələ tamąą la ə́ yəi, ɲɛ̨ąkpɛ nuą kpulu kɛnɛ̨ la ə́ yəi, dɛɛ gɛi ɓa. 10 Ə́ kilitɔɔi kɛ ə́ wɔ gbąnąlaa ɓa, yɛ́ kɛ diɛ: «Nu ta hvo gáái.» Ə́ kili da ə́ wɔ mɛ̨nį kɔ́lɔn ŋąą ɓə ə́ pulu kulɔi. Ɛlɛɛ, yɛ́n, yɛ́ kɛ diɛ ə́ kwəi pələ: «Ɲą́ą́ lɔ gáá laa, akɛ ɲą́ą́ hvəi, nu takpɛli hvo nąą pulu, gəlee kaa a kpɛli!» 11 Mɛ̨nį ɲąąnwąnąą pai laai yɛ́, hvó pai pɛli mąą laai, ə́ kala mɛ̨nį kaa pai həlii yɛ́, hvá pɛli ə́ mąąkɔ̨nwɔ̨i ɲəi, gaa a tɛ̨ą, mɛ̨nį ɲąąnwąnąą kaa pai həli lɔ yɛ́ ə́ tɛɠii. 12 'Lɛɛ kani ə́ wɔ tɔlikpɛ mɛ̨nįɠaai pulu, da ə́ wɔ ɲeąkpɛ mɛ̨nįɠaai, diɛi wɔlɔ yáá ə́ kpɔwɔ hviikpɛɛ di pulu, ə həɠə ə́ muhəɠəi lɔwai ɓa, ə kɛ ə́ kwəi ə́ kaa pai tɔ̨nɔ̨ hɔlɔɓoi ɉu, diɛ pɛli ə́ kulɔi mɛ̨nįi. 13 Da kɛ ə́ wəlii woo ɲąąnwąnąi a liɛwoo tamąą, Nuąi tii di pa kɛa wɛ, diɛi tii da kɛ mɛ̨nį kwɛlii yələ kwəi, diɛ tɔlukpɛ a pɛmɛ̨lɛ̨n-gɔwɠaa, ɲąnįn dɔɔ pələ tɛi tɛi, mɛ̨nįɠaai pai kɛi ɲąnįn tii yeemu, ɉukulɔ, nuą kpɔ di di muhəɠə kɛa, di ə́ ɓalo. 14 Di kaa pai kɛi yɛ dɛ̨ɛ̨ kpoloon, nwɔ̨n gaa pai di kələn ɉii, di hvo pai pɛlii kulɔi nwɔ̨n nən ɲəi, hvo pai kɛi a nu kɔ́lɔ ɓo nwɔ̨n dəŋą, yɛ nwɔ̨n goloi lən ɉii, nu yɛ hee mą. 15 Bələ ɓə ə́ wɔ tɔlukpɛ nuąi kaa pai kɛi la yɛ́, diɛi ə́ ə́ kpɔwɔ hviikpɛɛ di pulu ə həɠə ə́ muhəɠə yələ ɓa, di kəlee di kaa pai lii di nwun mą, di ta lɔpee hva pɛli ə kulɔi mɛ̨nįi. |