Azaya 44 - Yálá laawoo hɛɓɛ (dc)1 Kɛlaa, yiihu kɛa, Ɉakɔbə, ə́ wəli tɔɔ, yɛ́i a nwɔ́ tímun, Israɛlə, yɛ́i a nííɓamun! 2 Mɛ̨nįi Yai-Laa ə mo, ya ka, yai a ə́ pɛlimun, yai ə́ pɛli ə́ too ə́ lee kwəi, yɛ kpɔnmąą tɛɛ ə́ pɔ, Ɉakɔbə, 'hvó ɲɔw, yɛ́i a nwɔ tímun, yɛ́i ə́ hutɔɔ, yɛ́i ŋį́ ə́ həɠə ɉu a nííɓa. 3 Mąąhɔlɔɓo, nuąi kpələ wɛli kaa diɛ, gáá pai yálee laai di pɔɔli, gɛ́ yá pɛlɛɛ laa lɔi hu kpalaa hu, gɛ́ nwɔ́ Kilii yɛɛ ə́ huwu mɛ̨i, gɛ́ lúwɔ́ too ə́ lonnii diɛ. 4 Di kaa pai kɛi tɛi, yɛ kala tiliin a kɛ yá kwɛlɛ, yɛ bɔ̨ɔ̨i tɔɔni yá kwɛlɛ. 5 Di tɔ̨nɔ̨ kaa pai kɛi diɛ: «Yai-Laa nwɔ nu ɓaa a ɲą́ą́», diɛ dakpɛli laa hee a Ɉakɔbə, dakpɛli yɛ bɛ̨ɛ̨ ɲee kɔ̨nwɔ̨n mɛ̨i, yɛ kɛ mą: «Gáá a Yai-Laa nwɔɔ», ɛlɛɛ yɛ gbɔwɔ laa hee a Israɛlə. Hali wɛli kpɛɛi Yálá ɓa kpɔ tɛ-tɛ 6 Israɛlə nwɔ Mɛ̨nį Kəlee ŋą Hééɓomun Yai-Laa, woo ka, yai a Israɛlə nwun mąąɓomun, Yai-Laa, huwalawala kəlee Nąmu, yɛ diɛ: ɲą́ą́ ɓə a dɔlɔɔ, ɲą́ą́ ɓə a ɲąąkpɛɛi, ə kulɔ ɲą́ą́ búlu, yálá takpɛli hvo laa. 7 Gbɛɛ ɓə gaa yɛ ɲą́ą́? Mąą-nu ə muhəɠə, ə hvaa! Mɛ̨nį gaa yɛnɛ̨ɛ̨ mɛ̨nį hu ə nɛ, ɛlɛɛ, ə gbaɠala lɛ mą́ą́, ə həɠə kpɔ ɲələi ŋį́ nu kan bɛli la mą, mɛ̨nįɠaa daa tɛɛ, yɛ ɉukulɔ, ɛlɛɛ, yiiɠaai pai kɛi, nu ta ə ɉukulɔ kan kuɔ wɛ! 8 'Ka mąą hvo kpɛlin, 'ka hvo ɲɔw! Kɛlɛi ɉu aa kwɛa, ŋą́ą́ mo kaa, gɛ́ ɉu pɔ̨nɔ̨ a kaa, Ka hvo mɔ̨ɔ̨ kɛa a nwɔ́ kɛlaɠaa? Yálá takpɛli kaa mɔ̨ɔ̨ laa, ə kulɔ Ɲą́ą́ búlú? Gíli kaa kpɔ ɉu, gɛ́ Kwɛni takpɛli hvo laa, Və́ dakpɛli kɔlɔn. 9 Hali pɛli nuą kəlee kaa lɔ a nu kpɛli kpɛliɠaa, ɉaliɠaai tii a di lííɓa hɛn, di tɔlɔ lɔpee hvo diɛ, ɉɛn di kilitɔɔ mą, hva mɛ̨nį kpaɠala kaa, yili mąą mɛ̨nį ɓa, nwumɛ̨ kaa pai tɛi diɛ. 10 Gbɛɛ ɓə a ta hali mąą nįnįn ɉaɠa, a wala kɛtii, ə ɲɔw a kwɛli, yii yaan hvo tɔ̨nɔ̨ kwɛli li ɉu? 11 Ɉali mąą nįnįn tii, ɲeepɔɠaa kəlee kaa pai nwumɛ̨i, yai bɛli nuą kaa lɔ a nu kanŋaa! 'Di kəlee di di ɲąą kpɔn, 'di pa ɓɛ! Di nwun mįnį-mįnį kaa pai yɛɛi a diɛ, di kəlee, diɛ nwumɛ̨. 12 Gwɛli-yɔwmun a nwɔ tɔ̨nɔ̨i ɲąąli hulɔ-nwɔ̨n ɓa, a gwɛli lɔ nwɔ̨n ɉu, a kpɔlu, yɛ gɛlɛ a humu, nu yeekɔn vąŋą kɛnɛ̨ nwɔ kóló li. Kɛlaa pulu a ɉon, vąŋą kəlee a kpɛɛ! Awala gbələ, aa mąn kpɔlɔɔn. 13 Wulu haɠamun nwɛi, a nwulu kɔ́ɔn, ə pɔɔ gɛ mą ni a tiɠi, yɛ kɛa ɉaɠa a kpaawɔ, a gɛ tii, vilənŋąą diɠi pɔɔ ɓa, a goloon ɉu kɛ yɛ nu kɛ pələ, kpɔlɔɔ yɛ nu ɲɛ̨ilain ɲą́ą́lee, diɛ hee pɛlɛ́n. 14 Da wulu walawala lɛlɛɛ ta tee, yɛ bələi kpitili kaa la, əgɛ mąą ə wiɛ, awala kɛtii, da kpitili bɔn, da wiyɛ, da nwɔ wulu kɛ a wulu yii vąŋą kɛnɛ̨, lɔwɔi wuluɠaa lɔwai. Di mąn hɛan ɉi, kɛlɛi tulɔ ɓə a pu mą, yɛ kɛnɛ̨. 15 Kwɛi lɔ li nuą yəi, diɛ gələn, da da həɠə, diɛ di kwɛlɛɓo mą, diɛ da həɠə, diɛ di kɔ̨nɔ̨n ɲili mą. Nwului tii lɔ ɓə a da həɠə, ə ɉaɠa a gɛnɛ̨, yɛ pɛlɛ níi la, yɛ gɛ nwɔ yálá li, yɛ da pɛli a háli, yɛ kwɛli hvilɛn mą. 16 A bələ tɔ̨nɔ̨ tɔɔ nwɔ̨n mą, ɉuwɔi yɛ ə pa mįi, ə naa nwɛ̨ą, ə mɔ̨n, ə mįi, ə pilɛ la, yili pulu, aa kɛi gwɛlɛɓo, yɛ kɛ diɛ: «Ee kə! Gáá gwɛlɛɓoi kpɔ, gɛ́ ɲąąnɛ̨ɛ̨ kulɔ, wələən yɛ kulɔ mą́ą́!» 17 Yili pulu, gbəlii tii kɛa a lɛɛ, ə bɛli a hali, ə gɛ a nwɔ yálá, yɛ kwɛli hvilɛn mą, yɛ pɛlɛ nií la, yɛ mąą mɛ̨nį laa həli mą, yɛ kɛ mą: «Málo! Mąąhɔlɔɓo, yɛ́ lɔ ɓə a nwɔ́ yálá!» 18 Di hvo mɛ̨nį kɔ́lɔn, di hva mɛ̨nį kpaɠala kaa, mąąhɔlɔɓo, di ɲɛ̨i kpinį pələ diɛ, di hva pɛli kɛɛ kaai, di kili wala wala pələ, mɛ̨nį ta hva pɛli lɔi di kili hu! 19 Di kili hva mɛ̨nį hukpɛ, di hva kpɛli di kiliŋąhiɛ, di hvo kɛ mą: «Ŋą́ą́ háá bələ tɔ̨nɔ̨ kələn nwɔ̨n ɉu, ŋą́ą́ bələ tɔ̨nɔ̨ kɛ a gɔnɔ̨n ɲili kwɛi, ŋą́ą́ huwɔ mɔ̨n dəŋą ɓa, ŋą́ą́ mįi, ɛlɛɛ gbuɔ woloi aa lɛɛ, ya ka gáá pɛlɛi gɛ́ kwɛli hvilɛ mą!» 20 Luwu kpɛli-kpɛli ɓə kanąn ŋąą mą, gili ɲąą pɛlɛ pələ, yɛ gbɔwɔ nwun ɉu lan; hvo pai kulɔi ɉu! Yələ ta, hvo pai kɛi diɛ: «Ɉɛn ɲɛ̨i ɲə́i, aa ɓowo hɛn gbɛli kpɛli ɓəi?» 21 Ɉakɔbə, mɛ̨nįi ɲɛ̨i kili ə too ə́ ɲą, Israɛlə, nwɔ tímun mąą a yɛ́, ŋį́ ə́ pɛli a nwɔ tímun, Israɛlə, 'hva pɛli yá laai gɔ́lɔi. 22 Ŋą́ą́ yɛ́ kulɔ nwoomulaa waa yɛ tulɔ kpinįn a waa yələi, ŋą́ą́ yɛ́ túwɔ́ pələ ɲɔ̨nŋąąi taɠa, yɛ bələi nąląąn a taɠa la: pɛ̨nɛ̨ ə́ pa bɔ́, mąąhɔlɔɓo, ŋą́ą́ ə́ nwun mąąɓo. 23 Yələ kɔ́lɔn, 'tomą a kwəinɛ̨ɛ̨, mąąhɔlɔɓo, Yai-Laa aa gɛ mɛ̨nį kɛ, 'ka ɓələn a kwəinɛ̨ɛ̨, lɔi mu pələ lɔiɠaa, yeeɠaa, 'ka tómą a kwəinɛ̨ɛ̨, ə mą kɛ wɛla, da ɉu wuluɠaa, mąąhɔlɔɓo, Yai-Laa aa Ɉakɔbə nwun mąąɓo, ɛlɛɛ aa nwɔ mąąwiɛ lɛ Israɛlə lɔi hu! Nu huwu kəlee ka kwɛli hvilɛn Yálá ɓa 24 Mɛ̨nįi Yai-Laai ə́ nwun mąąɓo, gaa moi ya ka: a yai tii ə́ mąąkwɛli, ə́ ɓo nii ə́ lee kwəi, yɛ kɛ yɛ́: Ɲą́ą́ ɓə gáá a Yai-Laa, yai hɛn gəlee pɛli; ɲą́ą́ danɔ̨n gbən mə yələ kɔ́lɔn ɉuhvólóon, ŋį́ lɔi laa, gbɛɛ kpɔ ɓə kpɔmąą tɛɛ bɔ́? 25 Ɲą́ą́ ɓə ŋą́ kwɛlɛɛn gɛɛ kaa nuą woo lɛɛ a kpɛli, gɛ́ tɔlukpɛ nuą nwun ɉu kɛ wulu-wulu, gɛ́ kilimąą nuą kili laa pɛlɛ pulu pələ, gɛ́ di wɔ kili kɛ ɲəi mɛ̨nįɠaa hu kpinį. 26 Gɛ́ nwɔ́ tímun hvaa woo pɔ mɛ̨nį lɛɛ mą, gɛ́ nwɔ wɛlɛɛɓo nuą, woo hu nɛ̨ɛ̨, ɲą́ą́ ɓə kɛ Ɉerusalɛmə ɓa: «'Ə́ laa ə hvɛɛ a nu kan», gɛ́ Ɉuda taaɠaa diɛ: «'Ka pɛ̨nɛ̨ ka tɔɔ a nįnɛ̨», yii kpɔ kala, ŋį́ gəlee pu nįnɛ̨ kɔ́lɔi. 27 Ɲą́ą́ ɓə ŋą́ kɛ gboloyá ɓa: «'Kpala, gáá pai yá kpɛa kpɛaɠaa kpalai!» 28 Ɲą́ą́ ɓə ŋą́ kɛ Sirusə ɓa: «Yɛ́ ɓə a nwɔ́ taatɛlɛɛi mɛ̨imun!» Gaa pai nííɓa mɛ̨nįɠaa kəlee ɲɛ̨i kulɔi, Gaa pai kɛi Ɉerusalɛmə ɓa: «'Ə́ pɛ̨nɛ̨ ə tɔɔ!» Ɛlɛɛ yɛ kɛ diɛ: «'Ka pɛ̨nɛ̨ ka Yálá nwɔ pɛlɛ́i hvilɛn a nįnɛ̨!» |