Azaya 42 - Yálá laawoo hɛɓɛ (dc)Yálá nwɔ tímun 1 Nwɔ́ tímun ga, yai dɔ́ɔ́ bulu, ŋą́ ɉəɠə mɛlaa lɔwai, gbíni ɓa mun ni, ya ɓə ŋą́ nwɔ́ Nį́i too ɉu, gaa pai hįį takpɛliɠaa di wɔ kiti mɛ̨nį kulɔi pɔ̨nɔ̨ŋą. 2 Hvo pai kɛi tómąi, hva hvaa lɔ tii yaɠa yaɠa, nwoo hvo pai kɛi tɔɔi kwəli hɛ̨ąiɠaa, 3 Hvo pai hveen gbaɠa woloɔ huyalii, nwɔ̨n nən gaa liɛliɛ, hvo pai gbəli luwun ɉii, ga pai kɛi tɛ̨ą ɓoi a nelee. 4 Nwɛi, vįi hvo pai kpɛɛi, di hva ɲee pɛlɛ lɔi ɓa, hvo kɛ li a kiti mɛ̨nį hee gban ɲą lɔi mɛ̨i, ɛlɛɛ, gboloyá hɛ̨ąi lɔiɠaa ɲɛ̨i kaa nwɔ tɔ́n nwooɠaa tɔwɔ. 5 Yálá woo ka! Yai a Yai-Laa! Yai yələkɔlɔn bɛli, Ə ɉu lɛan, yai lɔi kpalan naa, hɛn kpɔ a ɓá, gəlee ə ɓo ɉu, ɛlɛɛ, nu kpului kpɔ puu ni mɛ̨i, ya ɓə di nɔ̨ɔ̨ too di hu, nuąi da hiɛ mɛ̨i, Ya ɓə a di lɛɛ yɛnɛ̨ɛ̨. 6 Ɲą́ą́i a Yai-Laa, ŋį́ ə́ təli tələnmolaa hu, ŋį́ ə́ hon a ə́ yee, ŋį́ ə́ tɔɔ a dee, gɛ́ ə́ kɛ a ɲą́ą́ kwa nu huwuɠaa ku lɔwai pɔnnaa kpɛɛmun, a huwu takpɛliɠaa di wɔ kɛɛpnon. 7 Yɛ́ ɲɛ̨ipu nuą ɲɛ̨i hvólóon, yɛ́ gaho nąmįną kulɔ di wɔ gahoi ŋą, nuąi kpinį pɛlɛ́ mu kpono ŋą, yɛ́ di kulɔ laa. 8 Ɲą́ą́ ɓə a Yai-Laa, ɛlɛɛ, náá li; ɛlɛɛ, nwɔ́ mąąwiɛi və́ pai dɛɛi nu takpɛli pɔ, ə mą kɛ mą́ą́tɛnɛ wələi mąąnɛ̨ɛ̨ di doo mą́ą́, vá dɛɛ haliɠaa pɔ. 9 Tɔwɔ-tɔwɔ mɛ̨nįɠaa di wɛi, daa tɛɛ, ɲą́ą́ nwɛ̨́i, mɛ̨nį nįnɛ̨ɠaa ɓə gáá di lɛɛi tɔwɔ, gɛ́ di hukulɔ; gɛɛ di hvo teɠa kɛ pai həlii, diɛ ka tii gáá di mąą mɛ̨nį hukulɔi kaa. 10 'Ka wələ nįnɛ̨ too Yai-Laa ɓa, 'ka mąątɛ̨nɛ̨ wələ too ə həɠə kpɔ lɔi kpɛlai pələ, ə mą kɛ gboloyá da ɉu hɛnŋąą kəlee, gboloyá hɛ̨ąi lɔiɠaa, da di hu nuą. 11 Gbalə lɔi da ɉu taaɠaa, daaɠaai Kedarə kaa ɉu heeni, gəlee di di woo tɛ, kwɛni ŋą nuą di tómą a kwəinɛ̨ɛ̨, di lɛɛ ɲee ton na, di huluun nwoo ə tɔɔ. 12 Nuą di Yai-Laa laa tɛ, di mąątɛ̨nɛ̨ wələɠaa too gboloyá hɛ̨ąi lɔiɠaa hu. 13 Yai-Laa kulɔ hiɛ ka tii, yɛ kɔ́kuláa, gaa yɛ kɔ́ kɔ́ mun, gaa nwɔ lii kələn gwəi ɲąątɛi, yɛ gɔ́ huu pili, yɛ tómą, yɛ li ɲowoɠaa pɔ pələ yɛ kpakolo. 14 Ŋą́ą́ lamun heeni tin, və́ kɛli hvaa, gɛ́ ɉu hon, gɛ́ ɲiŋɛ̨, vínna yɛ tɔ́n, yɛ nɛ̨ɛ̨nui gaa kwəinwąną kɛi, nɔ̨ɔ̨ heɛ lɔ gə́ŋə hu gɛ̨ɛ̨ gɛ̨ɛ̨. 15 Gáá kɛa pai yeeɠaa da yee kpukpuɠaa di hu taɠai, gɛ́ di mɛ̨i kalaɠaa kəlee laa kpala di ɲą, gɛ́ tɛɛyá kpɛa-kpɛa hu tee a gbįnįn-gbįnįn, gɛ́ powaɠaa hu kpala. 16 Gáá pai ɲɛ̨ipu nuą hvilɛn ɉii pələi di hvo gɔlɔn mɛ̨i, lɔwɔ mu pələɠaai di hvo di kɔ́lɔn, diɛ ɓə da kɛ hiɛi mɛ̨i, gɛ́ kpinį mąąpənə di ɲɛ̨i tɔwɔ a kɛɛ pɔ̨nɔ̨, gɛ́ pələ hu heɛɠaa mąąpənə a ɉaŋąą, gáá pai mɛ̨nįɠaai tii kəlee kɛi, vá dɔ̨nɔ̨ kpɛli lɛɛ laa. 17 Nuąi tii kɛli di kilitɔɔ haliɠaa diɛ, di kaa yalii di pulu a nwumɛ̨ kɛnɛ̨, nuąi da kɛ kwɛli kpɛli kpɛli hɛnŋaa diɛ: «Kaa ɓə ɓaa ku wɔ yáláɠaa!» Yálá kaa haŋąi nwɔ nuąi diɛ 18 Wəli wolo nuą, 'ka mɛ̨nį mɛ̨n! Ɲɛ̨ipu nuą, ka ka ɲɛ̨i hee, ɛlɛɛ ka kɛɛ kaa! 19 Gbɛɛ ɓə kɛ ɲɛ̨i puɔɔ, kɛlɛi nwɔ́ tímun lɔ ɓə kɛ? Gbɛɛ ɓə kɛ nwəli wolɔɔ yɛ nui gáá pai dɔɔi? Gbɛɛ ɓə kɛ ɲɛ̨i puɔɔ ə həli nui aa liilaa hɔlɔɓo bɔ? Gbɛɛ ɓə kɛ nwəli wolɔɔ yɛ Yai-Laa nwɔ tímun? 20 Yáá mɛ̨nį tamąą kaa, kɛlaa hvó ə́ kili lɛɛ li da hu, ə́ wəliɠaa laaɓoɔi, kɛlaa hva mɛ̨nį mɛ̨n. 21 Yai-Laa ə hvaa tii mą, mąąhɔlɔɓo, dələnmoɔi, yɛ nwɔ tɔ́n laa tɛ, yɛ ɲɛ̨i pɔ̨nɔ̨. 22 Kɛlaa, nu huwu ta ka ŋɛ̨i, daa too di mɛ̨i, daa di yəi hɛnŋąą kulɔ di yəi, daa di too gaho ŋą kwɛni woloɠaa hu, daa di lɔ gaho pɛlɛ́ɠaa mu, diɛ di paa, kɛlaa nu ta hvo kɛi di kulɔ ɉu, diɛ too di mɛ̨i, ɛlɛɛ, nu ta hvo kɛi kɛ diɛ: «'Ka pənə ka dɛɛ di pɔ!» 23 Mɛ̨nįɠaai ŋɛ̨i gáá moi, ka nɛlɛ ɓə nwəli tɔɔi mą, yɛ nwəli tɔɔ kpɔ a nɛlɛɛ, yɛ mɛ̨n tínąą mɛ̨nį ɓa? 24 Gbɛɛ ɓə Ɉakɔbə kwɛlɛ diɛ ɉukala? Yɛ Israɛlə tɛɛ toomɛ̨i kɛ nuą pɔ? A kɛ tii Yai-Laa hvəi, a yai tii gu nɛ̨ŋɛ̨n ɉəɠə mąi! A yai tii gu hvo gɛ gu hvo hvilɛn nwɔ pələi mɛ̨i! Ɛlɛɛ, gu hvo gɛ gu hvo gu wəli tɔɔ nwɔ tɔ́n nwooi ɓai? 25 Yili ɓə gɛ yɛ nwɔ lííholi kɛnɛ̨ɛ̨i hiɛ Israɛlə mɛ̨i, kɔ́ mɔ̨nɔ̨ɠaa diɛ hee ɉu; diɛ nwɔ̨n doo ɉu nąą kɔ́lɔ kəlee, ə mą kɛ tii, Israɛlə hvo tí hvo gɔlɔn, Yálá ə gələn, ə diɠi kɛ, ə həli ɉɛ̨ąi, ə mą kɛ tii, yili hvo kɛ Israɛlə ɓa a mɛ̨nį. |