Azaya 41 - Yálá laawoo hɛɓɛ (dc)

Yálá kaa nwɔ hu huwui hvaŋą lɔi

¹ Gboloyá hɛ̨ąi lɔiɠaa, ka ka laa pilɛ nííla, ɛlɛɛ, nuą di di hɛ̨ą yili, di lɛɠɛ ɓɛ, ɛlɛɛ di hvaa, kwa diɛni ku hee kɛa giti ɓa.

² Dələnmo mun həɠə hvóló kulɔi pələ, gbɛɛ ɓə ɲali bulu, yɛ bənə yɛ ba, yɛ lɔiɠaa pɛlɛ gɔwɔ mu, yɛ tɔɔɓɛlaa pɛlɛ lɔi ɓa, yɛ nwɔ kɔ́ kɔ́ nuą kpulu hu kɛnɛ̨ yɛ munuun gbala, yɛ nwɔ tonwąi tamą, yɛ tulɔ hvaŋą a kɛi dɛ̨ɛ̨ kpoloon daɠa taɠa.

³ A hee mɛlaa hu, yili pulu, ə nwɔ li ɓo nɛkpɛlɛɛ, hva kpɛli gɔwɔ hvilɛn lɔi ɓa.

⁴ Gbɛɛ ɓə a mɛ̨nį taaləi tii kɛ? Hvo kɛli nui nu huwu kəlee təli a gɔwɔ tɔɔi lɔwai, Ɲą́ą́, gáá a Yai-Laa, a dɔlɔɔ, bələ lɔ ɓə nwɔ̨nɔ̨ gáá pai kɛi laa ɲąąkpɛɛi lɔwai; ɲą́ą́ ɓə.

⁵ Gboloyá hɛ̨ąi lɔiɠaa da gaa, diɛ ɲɔw, lɔi kpon ɉeei yɛ kpɛlin, da di ɲɛ̨i hee mą, diɛ nąą mąąkpɛɛ, diɛ kɛ ɉuwu ɉuwu.

⁶ Nuą diɛ kpɔn mąą tɛɛ di kee pɔ, diɛ kɛ di kee ni diɛ: «'Gɛ a hulɔnulaa.»

⁷ Gwɛli yɔw mun gaa vulɔ hvɛɛ mun vaŋą lɔi, nui mądalan gaa ɲəi, yɛ ɉumu nąmu hvaŋą lɔ, a ɉali mąą nįnįn nąą kəlee hee kɛa gee la, yɛ diɛ: «Aa pɛli.» Ə gəlee kpɔn kɛa gee ɓa a nɛlɛɛ, hvo pa nee kulɔ gee la.

Yálá tɔɔi Israɛlə pulu

⁸ Kɛlaa yɛ́ Israɛlə, nwɔ́ tí mun, Ɉakɔbə, yɛ́i ŋį́ ə́ həɠə ɉu, kaai a mɛ́lan Abrahamə lonnii,

⁹ kaai ŋį́ ka həɠə kpɔ lɔi kpon ɉeei, ka kɛ kpɔ ɓɛi lɔi a kpəla laa, gɛ́ ka təli, yɛ́ Israɛlə, yɛ́i ŋį́ kɛ yɛ́: «Ŋą́ tímun mąą yɛ́, ŋį́ ə́ həɠə ə́ ɓɛlaa lɔwai, və́ gíli kulɔ li ə́ hu.»

¹⁰ 'Hvó ɲɔw, mąąhɔlɔɓo, gáá ə́ pulu, 'Hvó ə́ liihɛlɛn, mąąhɔlɔɓo, gáá a ə́ wɔ Yálá. Gáá ə́ huwala walai, gɛ́ kpɔn ɲɛ́, Gɛ́ mamįiyee pu ə́ mu, yai tələnmolaa kaa ɉui.

¹¹ Nuąi kpɔ tii kɛ di liikələnŋąą di kwəi ə́ pɔ, di kaali, di kaa pai nwumɛ̨i, di ɓɛlɛ yɛ kpɛɛ diɛ, di kaa pai lɛɛi a nu kpoloonŋąą, diɛ haa, diɛi kpɔ tii kɛi hvaa pɛlɛ yɛ́i.

¹² Nuąi tii ka diɛni ka kɛi vaa kɛi, ə́ kaa pai ə́ ɲɛ̨i laai a diɛ, hva kɛa di kaa, di hu kaa pai kalai, diɛ lɛɛ a kpɛli kpɛli, di hvo pai kɛi a hɛn da, diɛi kpɔ tii ka diɛni ka kɛi gɔ́ kɔ́i.

¹³ Mąąhɔlɔɓo, ɲą́ą́ Yai-Laa, gáá a ə́ wɔ Yálá, ŋį́ ə́ hon a ə́ ɓa-mįi-yee, gɛ́ kɛ yɛ́: «'Hvó ɲɔw, dɔ́ɔ́i ə́ pulu.»

¹⁴ 'Hvó ɲɔw Ɉakɔbə, yɛ́i ŋɛ̨i yɛ kpeeli ɲɛ̨lɛ̨ɛ̨n, Israɛlə, yɛ́i ŋɛ̨i a powa háákəlee, ɲą́ą́ ɓə ŋą́ ə́ mąąkpɔn mąąɓo, ɲą́ą́ Yai-Laa nwóó li; nui a ə́ mąąkpɔn mąąɓo, ya ɓaa Israɛlə nwɔ mąąhəɠə mun.

¹⁵ Ŋą́ą́ ə́ kɛ a ɉugbun ɲąą kuláa, ə́ kaa pai yeeɠaa ɓuwɔi, yɛ́ di hu taɠa taɠa; ə́ kaa pai yee kpukpuɠaa hunwɔ̨i, yɛ di kɛ a munuun,

¹⁶ ə́ kaa pai di hvɛɛi, hvaŋą yɛ li a diɛ, tulɔ hvaŋą yɛ di taɠa taɠa. Ə́ wɛi, ə́ kaa pai kɛi kwəinɛ̨ɛ̨ hu, Yai-Laa laa hu, ə́ hvaŋą kaa pai lɔi, Israɛlə nwɔ Mąąhəɠəmun haalai.

¹⁷ Nuąi daa di nwumɛ̨, da yee hvowolo nuą, da kɛ kpələ ya hvɛlii, Kɛlaa di hva da hɔlɔɓo, di nɛn ɲɛ kpala di la a kpələ wɛli, Ɲą́ą́ Yai-Laa, gáá pai ɲéé heei di woo mu, Ɲą́ą́i a Israɛlə nwɔ Yálá, və́ pai kulɔi di pulu.

¹⁸ Lɔiɠaai kɛ di hu kpalaa, gáá pai ya kpɛa-kpɛa laai laa, gɛ́ lɔi pun mąąpənə a powa, gɛ́ yá nwun gulɔiɠaa kɛ ɓoloonŋąą hu, gɛ́ lɔi hu kpalaa mąąpənə a ya lɔi.

¹⁹ Gɛ́, hɛan da kpitili, tow wuluɠaa da kələ di hin lɔi pun ɉu, gɛ́ ɓɛlɛ, ɓahi da wiɛ́ di hin, ɓɛi nąą ə kɛ lɔ a kpomó.

²⁰ Nu kəlee diɛ pɛli nąą kaai, diɛ gbaɠala kaa, diɛ tɔɔ a di nwąnąi, di kəlee diɛ gɔlɔn diɛ kɛ, Yai-Laa kɛ tii li, diɛ kɛ Israɛlə nwɔ Mąąhəɠəmun ɓə gɛ.

Haliɠaa di hvo a hɛn da

²¹ Yai-Laa yɛ diɛ: 'Ka pa ka ka wɔ mɛ̨nįi too, Ɉakɔbə nwɔ tɔɔmun yɛ diɛ; 'ka pa ka ka woo hukulɔ.

²² Di pa, mɛ̨nįi pai kɛi di ɉukulɔ, mɛ̨nį tɔlɔɔɠaai tɛɛ, pələi di kɛ pələ ə kɛ la, ka yili kɛ pələ lɛ kuɔ. Mɛ̨nįɠaai di mo, ka nąą kili too ku ŋą, kwa nąą kili lɛɛ ku ŋą, mɛ̨nįɠaai tii ɲələ a ɉəli, ku gbaɠala kaa. A wala kɛti, mɛ̨nįɠaai tinąą pai kɛi, ka yili bələ too ku wəlii, ka gu kəlee, gu nąą mąąkpɔn gu gaa.

²³ Mɛ̨nįɠaai pai kɛi, ka yili noloɓoi, akɛ ti, kwa gbaɠala kaa kuɔ diɛ ka káá a yáláɠaa. 'Ka mɛ̨nį lɛlɛɛ ta kɛ, a wala kɛti mɛ̨nį ɲąąnwąnąą, a kɛ tii kɛa, ka gu kəlee gu hee gu nąą kaa.

²⁴ Kɛlaa kwáá gaa, ka hvo a hɛn da, ka yee hva pɛli mɛ̨nį ta kɛi, nu a ka həɠə ɉu, ɓɛlɛkpɛɛ mąą mɛ̨nį li.

²⁵ Ŋą́ą́ nu təli, yɛ həɠə ɲələi pələ, aa pa, ə lɛɛ hvóló kulɔi pələ, ŋą dəli a naa, gaa ɓɔlɔn ɉii lɔi ɲąąwooɓo nuą mɛ̨i, yɛ da kɛ a palaya yɛ bələi pɔlɔ tan nuą da pɔlɔ tan na.

²⁶ Gbɛɛ ɓə aa ta mąą mɛ̨nį hukulɔ, ə həɠə yɛnɛ̨ɛ̨ kɔwɔ tɔɔi lɔwai ɓa, ku pɛli mąą nu kɔ́lɔn ɉii, yɛ mɛ̨nįɠaai tii lɛɛ kpɔ kwɛaa la, yɛ ɉukulɔ, kuɔ pɛli kɛi diɛ: «Aa kɛ tɛ̨ą ɓo.» Nu ta hvo kɛ nąą lɛɛ li kwɛa la hvo bələ ɓo, ɛlɛɛ, nu ta hvo kpɛli ta nuą kili pu li ɉu, kpələ, nu hvo kpɛli ka woo mɛ̨n.

²⁷ Siɔn mąą mɛ̨nį ɓə gɛ, ɲą́ą́ ŋɛ̨i hvaai, ŋį́ kɛ la a nu dɔlɔɔ gɛ́ pələ mo mą, Ɉerusalɛmə ɓə ŋį́ wɛlɛɛ lɛlɛɛ ɓomun dɛɛ laa.

²⁸ Ŋą́ ɲɛ̨́i laa, və́ nui lɔpee ta kaa li, nui kpɔ nu ə nwun dɔɔ la, hvo kɛ di lɔwai, ŋį́li kɛ nwún dɔɔ a diɛ, diɛ nwóó pulu pənə.

²⁹ Kɛlaa, di kəlee di kɛ pələ ka: Di kaa lɔ a mɛ̨nį ɲɔ̨n dee dee di kɛ kóló hvo a hɛn da, di mąąnįnįn gaa lɔ a hvaŋą kpɛli kpɛli.