Azaya 40 - Yálá laawoo hɛɓɛ (dc)

Israɛlə hvaŋąlɔ mɛ̨nį Ka nwɔ́ lɔi hvaŋąlɔ

¹ 'Ka nwɔ́ nuąi hvaŋąlɔ, 'ka di hvaŋąlɔ, ka wɔ Yálái woo li.

² 'Ka Ɉerusalɛmə níí lɔ, 'ka nolo ɓo ə həli mą, kaa mą: Nwɔ luwɔ kóló kɛ hvólóɠaai daa kpɛɛ, ɉutɔɔi lɔwai aa tɛɛ kɛa, mɛ̨nį ɲɔ̨nŋaai ə gɛ, aa yili mąą hvɛla hɔlɔɓo Yai-Laa yəi gee mɛ̨i hveelɛ.

³ Woo ta kaa tɔɔi yɛ kɛ diɛ: 'Ka Yai-Laa nwɔ pələi pɛli, nɔi pun ɉu, 'ka bələ pɛlɛɛɠaa kəlee haŋą;

⁴ 'Ka moloonŋaa kəlee laahvɛɛ, 'ka ɲeeɠaa kəlee taɠa; 'ka nowa pɛlɛɛɠaa kəlee hu kpulu, 'ka bələ hu heɛɠaa kəlee haŋą.

⁵ Nąąlɔwai, Yai-Laa nwɔ mąąwiɛ kaa pai kulɔi pɔ̨nɔ̨ŋą, nɔ̨ɔ̨nɔ̨ɔ̨-hɛnŋąąi kpɔ di kaa lɔi mɛ̨i, gəlee kaa pai gaai, diɛ kɛ Yai-Laa ka tii aa hvaa!

⁶ Woo ta kaa kɛi diɛ: «Loloɓo», dɔ̨nɔ̨ yɛ kɛ mą: «Ŋą́ kɛ lə?» Nwooi tii yɛ mą: «Yii yá mo ya ka, kɛ diɛ: Nu kanŋaa yíi hvo kwɛa li, di kaa lɔ yɛ kala tiliin, di hu hvo wala wala li hvo tɛɛ wulu powa ɓa.

⁷ Kala tiliin a haa, bowa a yohva, ɓɛlɔwai Yai-Laa nwɔ hvaŋąi a tɛɛ la; bələ kpɔlɔ ɓə nu kanŋaa kɛ pələ kaa la.

⁸ Kala tiliin a kpala, bowa ə yohva; Kɛlaa, guɔ Yálái woo nwɛi gaa lɔ laa a yələ kəlee.»

⁹ Ə́ wɛi, 'tɛ yee tɔɔ ta nwuɔ̨, ə́ woo kulɔ kpɔ a hɔ̨ɔ̨, Siɔn, wɛlɛɛ lɛlɛɛ ɓomun, 'ə́ woo kulɔ, hvo ɲɔw, Ɉerusalɛmə, wɛlɛɛ lɛlɛɛ ɓomun; 'mo Ɉuda taaɠaa diɛ, yɛ diɛ: «Ka gu wɔ Yálái ka!»

¹⁰ Ną́mu Yái-Laa ka! Gaa pai a hvaŋą, yeetɛɛmąą laa kaa ɲəi, nwɔ hvɛla kulɔ kɛ hɛn kaa ɲəi, nwɔ ɲąąkɛlɛ hɛn ə ɓo ɲəi.

¹¹ Gaa yɛ ɓɛlaa mɛ̨ikaa mun, ɲɛ̨i kaa nwɔ ɓɛlaaɠaai diɛ, a ɲee haŋą lɔ nwɔ ɓɛlaaɠaai di lɛɠɛ di kee ɓa, yɛ mɛlaa lonnii pɛlɛ ɲee kɔ̨nwɔ̨n ɉu, yɛ mɛlaa kɔ̨nwɔ̨leeɠaa pɛlɛ kɛɛnąą ɲąąlaɠiɛ ɓa.

Gbɛɛ ɓə da pɛli Yálá kɔɔn ɉii mą

¹² Gbɛɛ ɓə gboloyá laa, yɛ yələ kɔ́lɔn gɔwɔn a ɲee, gbɛɛ ɓə lɔi kpalan naa, ə yee tɔɔhɛnŋaa həɠə mį? Yɛ di tɔɔ pələ kulɔ gee mu?

¹³ Gbɛɛ ɓə Yai-Laa Kiliŋą pono, ɛlɛɛ, mɛ̨nįɠaai a di kili tee gwəi, yɛ di kɛmun nɛ mą?

¹⁴ Gbɛɛ ɓə ə nwun dɔɔ la, mąą nu yɛ giliŋąpɔ̨nɔ̨, yɛ tələnmo pələ lɛ mą, yɛ kili tɛɛ bɔ, yɛ mɛ̨nį kɔ́lɔn bələ lɛ mą?

¹⁵ Lɔiɠaa kaa lɔ yɛ yai a ɓɔ kɔ́wɔ wolo ɓa, yɛ hvilɛn tən tən; di kaa yɛ munuun gbala, a gboloyá hɛ̨ąi lɔiɠaa kpəŋə ɲee ŋą, yɛ bili yələi, yɛ munuun.

¹⁶ Liban wuluɠaa di mą tamą, di hva pɛli ɲəi nwɔ̨n dįnįi kwɛi kulɔi, ɉu huwɔɠaa di hva pɛli kɛi ɲəi a haláá hɛn da gəlee kələn.

¹⁷ Lɔi kəlee kaa ɲɛ̨i mu a kpɛli-kpɛli, gaa lɔ yɛ da wala kɛ yɛnɛ̨ɛ̨.

¹⁸ Ka pɛli Yálá kɔ́ɔn ɉi gbɛɛ ɓa, gulɔ mąą hɛn nɛlɛ ɓə ka pɛli dɔɔi gwɛlɛ?

¹⁹ Akɛ ti Hali ɓə, yai yɛlɛkɛmun mə bɛli, diɛ hɛni yá ɓo diɛ bu mą, diɛ wali yá ɓo diɛ bu mą.

²⁰ Nui ɲee hva lɔ, hvo yili ta kɛ, ɲįnįįn naa kpɛli ta ɓə a gwɛli, ə li la yɛlɛkɛmun nɛlɛɛ ta pɔ, yili yɛ ɉaɠa a halii hva dumo.

²¹ Ka hvo yili kpaɠala kɔ́lɔn, ka hvo ta bələ mɛ̨n ni, di hvo ɉukulɔ kaa a gɔwɔ tɔɔ yələ, ka hvo nii lɔi kɔ́wɔ hvilɛn ɉɛnŋąą kaa li?

²² Ɉɛn ŋɛ̨i pɛlɛ ni lɔi nwun mɛ̨i, yili mɛ̨i pələ ɓə gaa laa heeni, a nɔi ŋɛ̨i ɉu nuą kaa yɛ peeləɠaa. Ə yələkɔlɔn ɉɛlɛn yɛ həɠə ɓɛla, ə ɉu lɛan, nuą diɛ pɛlii di taa tɔɔi mu.

²³ A lɔi ɲąąwooɓo nuą lɛɛ kpɔlɔ kpɛli kpɛli, ə lɔi kiti tee nuą kɛ a nuąi tɔlɔi lɔpee hvo di hu;

²⁴ Da lɛɛ lɔ heei, da lɛɛ lɔ di kɔwɔ hvilɛn ɉi, di wɔ tɔɔlaai ɉamu hva kpɛli hvilɛn, A nɔ̨ɔ̨ pu lɔ diɛ, daa mą kpala, tulɔ hvaŋą yɛ li a diɛ yɛ kala kpala.

²⁵ «Gbɛɛ ɓə ka pɛli Gɔ́ɔ́n ɉii mą, kaa gɛ a bɛ́li?» Mąąhəɠəmun nwoo li

²⁶ 'Ka ka ɲɛ̨i muhəɠə kpɔ ɲələi pələ, ka nąą kaa, gbɛɛ ɓə ɉɛnŋąąi tii pɛli? Ya ɓə di kpulu kəlee ɲąąkpɔn, yɛ di tɛi tɛi di təli a di laa, vaŋą kɛnɛ̨ pələ, ɉuwala wala pələ, ɉɛnŋąąi tii ta lɔpee hvo lɛɛ pulu.

²⁷ Lə mɛ̨nį ɓə tii ya kɛ moi Ɉakɔbə, Israɛlə, yá tɔɔ pələ kɛ ləi yɛ́ kɛ diɛ: «Nwɔ́ pələi loɔi Yai-Laa ɓa, mą́ą́ mɛ̨nį ɲɛ̨i kulɔ mɛ̨nį hvo nwɔ́ Yálái ɓa.»

²⁸ Gbaɠala hvo mɔ̨ɔ̨ yɛ́, ɛlɛɛ, hvo ta mɛ̨n ni diɛ kɛ diɛ: Yai-Laa ɓə yələ kəlee Yálá? Ya ɓə lɔi piliɛ gee mɛ̨i pɛli, vii hva kpɛɛ, vaŋą ta hva kulɔ mą; nu hva pɛli nwɔ kili kɛ ɲəi laa kɔ́lɔn ɉii.

²⁹ Nui vaŋą hvo kɛnɛ̨ li, a mąą nu hvaŋą lɔ, nui vii aa kpɛɛ, a mąą nu hvaŋą lɔ.

³⁰ Nu nwunuɠaa hu a haa, di hvii yɛ kpɛɛ, ə mą kɛ kɔ́ kuláaɠaa, di kɔ́wɔ hu a haa, diɛ kɛ di too.

³¹ Kɛlaa nuąi da di kilitɔɔ Yai-Laa ɓa, di hvaŋą ta lɔ ɓə a pɛlɛ mą, da kɛ yɛ da kɛi koon, yɛ kuwɔ́ɠaa, diɛ gilɛ həɠə, di hvii hva kpɛɛ, di kaa lɔ hiɛi, di kɔ́wɔ hu hva haa.