Azaya 39 - Yálá laawoo hɛɓɛ (dc)Nuąi Merodakə-Baladan ə di tɔɔ 1 Nąąlɔwai, Baladan lon Merodakə-Baladan, yai kɛ a Babilonə tɔɔmun, ə hɛɓɛ́ tɛɛ Ezekiasə ɓa, da ɉamąɠaa; mąąhɔlɔɓo, aa kɛ bələ mɛ̨n diɛ kɛ diɛ Ezekiasə ə kɛi ɲɔ̨n gɛ, kɛlaa gɔlɔi aa pɔ̨nɔ̨. 2 Nuąi tii pa mɛ̨nį ə Ezekiasə kwəinɛ̨ɛ̨ kpɔ kɛnɛ̨, nąąlɔwai, ə nwɔ walii, nwɔ hɛnii, nwɔ ləɠi yili-hɛnŋąąi, mąątí wulɔ kun nɛ̨ɛ̨ɠaai, nwɔ kɔ́ kɔ́ kwɛli hɛnŋąąi da ɲəi hɛn gɔw kəlee lɛ nuąi tii diɛ; Ezekiasə nwɔ pɛlɛ́i mu hɛnŋąą da nwɔ lɔi hu hɛn da hvo lɛɛ pulu, yii hvo nɛ nuąi tii diɛ. 3 Nąąlɔwai, Yálá kwəi mɛ̨nį hukulɔ mun Esai ə pa ə tɔɔmun Ezekiasə kaa, yɛ mą: «Lə mɛ̨nį ɓə nuąi tii di mo yɛ́, ɛlɛɛ, di həɠə mį?» Ezekiasə yɛ mą: «Di həɠə kpɔ kwɛaala, kpɔ Babilonə diɛ pa di woo pilii mą́ą́.» 4 Esai yɛ mą: «Lə ɓə di gaa ə́ yəi bɛlɛ́n?» Ezekiasə yɛ mą: «Hɛn kpɔ gaa ɲə́i bɛlɛ́n, ɲə́i hɛn gɔw ta hvo laa yii və́ nɛ li diɛ.» 5 Nąąlɔwai kɛa, Esai yɛ Ezekiasə ɓa: «Ə́ wəli tɔɔ Mɛ̨nį Kəlee ŋą Hééɓomun Yai-Laa woo ɓa, yɛ mą: 6 Lɔwai taɠaa kaa pai həlii, ɉɛnŋąąi kpɔ ə yəi bɛlɛ́n, yai kpɔ ə́ nąnni di diɛ̨ gee mɛ̨i, ə həɠə kpɔ di wɔ lɔwai ɓa ə lɛɛ ɉu háákəlee, di kaa pai lii a gəlee Babilonə lɔi hu, hɛn lɔpee ta hvo pai lɛɛi; Yai-Laa woo li. 7 Di kaa pai lii a ə́ lonnii tamąą, yiiɠaai a ə́ kwəi lonnii, diɛɠaai ə́ kaa di kaai; di kaa pai daɠaai ɓɛlai di ɓo Babilonə tɔɔmun ɲəi gwəlii.» 8 Ezekiasə ə Esai woo pulu pənə, yɛ mą: «Woo lɛlɛɛ ka tii yáá mo yɛ həɠə Yai-Laa pɔ pələ.» Ə kɛi kɛa mo gwəi pələ, yɛ kɛ diɛ; ɓɛlɔwai gáá ni la vúlu kɔ́wɔ ŋą, liilaa kaa pai kɛi ku lɔwai, ɲɔw hva too nu ta hu. |