Azaya 38 - Yálá laawoo hɛɓɛ (dc)

Ezekiasə ŋą ɲɔ̨n gɛ mɛ̨nį da gɔlɔi pɔ̨nɔ̨ mɛ̨nį

¹ Nąąlɔwai, ɲɔ̨n nwala wala ta ə pɛlɛ Ezekiasə ɓa a baa ɲɔ̨n. Yálá kwəi mɛ̨nį hu kulɔ mun Esai Amɔsə lon, ə pa, yɛ Ezekiasə ɓa: «Mɛ̨nii Yai-Laa ə mo ya ka, yɛ; 'Ə́i hvɛli ə́ yəi bɛlɛ́n nuą diɛ, mąąhɔlɔɓo, hvo pai kulɔi ɲɔ̨n ŋɛ̨i hu, ə́ haa hiɛ ka.»

² Ezekiasə ə ɲɛ̨i tínɛ̨n bɛlɛ́ nwąną ɓa pələ, yɛ Yai-Laa hvɛli.

³ Yɛ kɛ mą: «Ee kə! Yai-Laa, nɛ̨ɛ̨ yɛ́, ə́ kiliŋąhiɛ, ə́ vilɛn bələi ŋą́ túwɔ́ la ə́ ɲɛ̨i ɓa a tɛ̨ą da kwəi kwələ laa; mɛ̨nįi kɛ a nɛ̨ɛ̨ yɛ́, ya ɓə ŋą́ kɛi gɛ.» Ezekiasə ə wɔlɔ kpɔ kɛnɛ̨.

⁴ Nąąlɔwai, Yai-Laa ə mo Esai ɓa, yɛ mą:

⁵ «'Li, yɛ́ Ezekiasə ɓa: Yai-Laa, ə́ nąn Davidə nwɔ Yálái yɛi: Ŋą́ą́ ə́ wɔ hvɛli wooi mɛ̨n, ŋą́ą́ ə́ ɲɛ̨i yá kaa. Gáá kwɛlan bow kɔ́w lɔɔli pɛlɛi ə́ wɔ yɛnɛ̨ɛ̨ ɓa.

⁶ Gáá pai ə́ kulɔi Asiri tɔɔmun ɲəi, yɛ́, ka daai ŋɛ̨i. Gáá pai daai ŋɛ̨i mąąkɔ̨nwɔ̨i.

⁷ Yai-Laa nwɔ wɛlɛɛ ka gáá moi yɛ́, bələi ə́ kaa pai gbaɠala kaai la, yɛ́ kɛ Yai-Laa kaa pai nwoo pɔ mɛ̨nį kɛi, bələ ka:

⁸ Ə́ ɲɛ̨i hee, Akazə nwɔ hvólói kɛ aa laa kpɔlɔ ŋą, gáá bənəi ŋą́ dɛ nwun ma.» Ɛlɛɛ, vóló ə pənə ə tɛ nwun ma.

Ezekiasə nwɔ wələ woo

⁹ Ɉuda tɔɔmun Ezekiasə kulaa ɲɔ̨n ɉu, nwələi ə doo, ya ka:

¹⁰ Ŋą́ kɛi kɛ diɛ: «Ŋą́ą́ lɛɛ kpɔlɔ həlii nwɔ́ yɛnɛ̨ɛ̨ ɲąą nɛ̨ɛ̨ ɓa, gɛ́ li! Gɛ́ lii haa nuą pɔtaai, gɛ́ kɛa pa lɛɛi laa, gɛ́ nwɔ́ kwɛlan gbəli kɛ laa!

¹¹ Ŋą́ kɛi kɛ diɛ: Və́ kɛa pai Yai-Laa kaai, nu hvulúmąąɠaa di wɔ lɔi hu. Və́ kɛa pai ɲɛ̨́i kwəleen veelɛi tɔɔi yɛnɛ̨ɛ̨ nu kan mą, ɓɛi hɛn gəlee daa tɔɔ lɔ laa tin.

¹² Daa nwɔ́ yɛnɛ̨ɛ̨ wɛan ɲə́i, daa li la kwəa la, yɛ ɓuwu haɠa. Gáá yɛ həɠə palamun, ŋą́ą́ həli nwɔ́ yɛnɛ̨ɛ̨ laa kulɔi, daa nwɔ́ yeei vani tee. Ə həɠə yələ wala pɔ ɓa, gɛɛ kpinį hvo pɛlɛ, yáá mą kpɛɛ a ɉú kalaa.

¹³ Gɛɛ yələ hvo pənə hvo ɓɔ, vá kɛa kɛ a hɛn da. Aa gɔ́wɠaa kəlee wolo, yɛ yala. Ə həɠə yələ wala pɔ ɓa, gɛɛ kpinį hvo pɛlɛ yáá mą kpɛɛ a ɉú kalaa.

¹⁴ Gáá wɔlɔi, yɛ hvólóon, a wala kɛti, yɛ liɛn non, gɛ́ nwóó laa, yɛ tonwənən. Ɲɛ̨́i həɛi ə́ pɔ pələ, ɲɛ̨́i kɔ́lɔn ɉu aa haa: Yai-Laa! Gbánɉu aa haa; mą́ą́ mɛ̨nį ɲɛ̨i kulɔ wɛ!

¹⁵ Ŋą́ pɛli kpɔ kɛi lə, yɛ́ pɛli nwoo mu hon ɉi, mąąhɔlɔɓo, ya kpinįi ɓə mɛ̨nį kɛi? Gáá pai nwɔ́ kwɛlan gəlee kɛi, a niikələn gwəi ŋɛ̨i aa hee mą́ą́i.

¹⁶ «Yai-Laa kaa nwɔ nuą pulu, di kaa pai ɓaloi, ɛlɛɛ ɉaalai ɓə gáá la a vúlú, gɛ́ nɔ̨ɔ̨.» Ə́ kaa pai búi nwúnú kɔ́lɔi, gɛ́ pənə gɛ́ yɛnɛ̨ɛ̨ kɛ.

¹⁷ Nwɔ́ liikələn mąą aa pənə a liilaa. Yɛ́ ɓə nį́į́ mąąkɔ̨nwɔ̨, yɛ́ ɓə gɛ və́ too ɓoloon ɉu, ɛlɛɛ, yaa nwɔ́ nɛ̨ŋɛ̨nŋąą kəlee pili ə́ pulu.

¹⁸ Mąąhɔlɔɓo, ɲɔ̨muątaa hva pɛli ə́ laa tɛi, ə mą kɛ haa, hva pɛli ə́ laa tooi a wələ. Nuąi kɛa daa yɛɛ kámą hu, di kili hvo kɛa tɔɔ li ə́ wɔ tələnmolaa ɓa.

¹⁹ Nui lɔ vulú kɔ́lɔi, yaa tɔ̨nɔ̨ lɔ ɓə a ə́ laa tɛ, yɛ bələi gáá gɛi la haa kəlee. Lon gáá nąn gaa pai ə́ wɔ wɛlikɛmąąlaa hu kulɔi nonnii diɛ.

²⁰ Yai-Laa! Yii yáá gɔ́lɔi pɔnɔ, ku kaa ku wɔ hvɛ́liɠaai pui mą, ku wɔ yɛnɛ̨ɛ̨ kəlee yeemu, Yai-Laa nwɔ pɛlɛ́i mu.

²¹ Esai yɛ diɛ: «'Ka pa a ɓoláá wulu laa, 'ka bɛlɛ dɔɔmun nwɔ hɛn nwąnąą kɛɛnąą.» Gɛɛi tii, tɔɔmun ə ɓalo.

²² Ya ɓə Ezekiasə a kɛ diɛ: «Ŋą́ pɛli gbaɠala kaai ləi gɛ́ kɛ gáá pai pɛlii tɛi Yai-Laa nwɔ pɛlɛ́i mu?»