Azaya 37 - Yálá laawoo hɛɓɛ (dc)Ezekiasə ə nwun dɔɔ a Yálá kwəi mɛ̨nį-hu kulɔmun Esai 1 Di woo mąn tɔɔmun Ezekiasə ə mo, ə mąąhəɠəɠaa hu ɓɛla, ə mąąwɛli həɠə too gwąną, ə li Yai-Laa hvɛli pɛlɛ́ mu. 2 Yili pulu ə dɔɔ pɛlɛ́ ɲąąwooɓomun Ɛliakimə, da ɉɛɓɛ́ pɛ̨ɛ̨mun Sɛvna, ɛlɛɛ nu pɔlɔ pɔlɔɠaai kpɔ di kaa ɉaláá laa həli nuą lɔwai, ə di tɔɔ Yálá kwəi mɛ̨nį hu kulɔmun Esai pɔɔli, yai a Amɔsə lon, mąąwɛli həɠə toɔ di kəlee di kwąną. 3 Ə gɛ də li diɛ mą: Ezekiasə woo ka, yɛ: «Haa kəlee hvólói kaa a lii kələn gwəi hvóló, hutɔɔ hvóló, da nwumɛ̨ hvóló, lon ɉinąą daa di nwun gulɔ di lee kwəi, kɛlaa lon-gaa hvąŋą hvo di lee yəi. 4 Gbəli kaa laa, Yai-Laa ə́ wɔ Yálái kaa pai gɔ́kuláái tii woo mɛ̨n ɉii, yai nwɔ mɛ̨nį nąmu Asiri tɔɔmun ə dɔɔ la yɛ Yálá hvulúmąą lalan, gbəli gaa pai ɉutɔɔi nwooɠaai tii mąą mɛ̨nį ɓa, yai Yai-Laa ə́ wɔ Yálái aa mɛ̨n, 'ə́ woo tɛ bɔ pələ, ə́ vɛli nu kpəli woloi aa lɛɛ ɓɛ mąą mɛ̨nį ɓa.» 5 Tɔɔmun Ezekiasə nwɔ kɛlaɠaai di pa Esai pɔ. 6 Yili yɛ diɛ: «'Ka li kaa ka wɔ mɛ̨nį nąmu ɓa, Yai-Laa yɛ: hvo ɲɔw nwooɠaai tii ə́ mąn mąą mɛ̨nį ɓa, yai Asiri tɔɔmun ə nwɔ kɛlaɠaai tɔɔ la, diɛ pa mɛ́lɛ kpɛɛi la mą́ą́.» 7 Mɛ̨nįi gáá pai bui nwəlii ya ka: «Di kaa pai wɛlɛɛ ta ɓoi mą, gaa pai pənəi ə li nwɔ lɔi hu, gáá pai gɛi di baa laa a ɓɔwa kwɛa, gbɔ-kpɔɔ lɔi hu.» 8 Gɔ́kuláai tii ə pənə ə li Asiri tɔɔmun bɔ, yili aa kɛ kɔ́ pɛlɛ Livna taa ɓa, ə bələ mąn diɛ mą tɔɔmun aa kɛ həɠə Lakisə daai. 9 Mąąhɔlɔɓo, Asiri tɔɔmun ə bələ mɛ̨n diɛ mą Nubi tɔɔmun Tirhaka aa muhəɠə yɛ pa kɔ́ pɛlɛi mą. Bələi tii mɛ̨n Asiri tɔɔmun ə mo, ə nuą tɔɔ Ezekiasə pɔ yɛ mą: Asiri tɔɔmun ə pənə nwɔ̨nɔ̨ ə nuą tɔɔ Ezekiasə pɔ 10 «'Ka li kaa Ɉuda tɔɔmun Ezekiasə ɓa: ‹Hvo ə́ kpɔwɔ lɛɛ laa ə́ wɔ Yálái ə́ kaa ə́ kilitɔɔi mą yɛ ə́ ɓowo, yɛ kɛ yɛ́: Ɉerusalɛmə hvo pai tooi Asiri tɔɔmun ɲee ɲą.› 11 Yɛ́ kpinįlee, mɛ̨nįɠaai kpɔ Asiri tɔɔɓɛlaa daa naa nɔiɠaai kpɔ di di kɛ a haláá hɛnŋaa diɛ, kɛlɛi, gəlee bələ aa həli yɛ́-e; ya ɓə yɛ́, ə́ kaa pai kulɔi ɉu? 12 Nɔiɠaai ną́nni di di hu wolo wolo di wɔ yáláɠaa di mɔ̨ɔ̨ Gozan kulɔ mɛ̨nįi, da Haran, da Rɛsɛfə, da Edɛn lonni, diɛi tii kɛ Telassarə? 13 Mįnɛ̨ ɓə kələi dɔɔɓɛlaa ŋɛ̨i kaa laa: Hamatə nwɛi, Arpadə nwɛi, Lairə nwɛi, Sefarwaimə tɔɔmun nwɛi, Hena nwɛi, ɛlɛɛ da Iwa nwɛi?» 14 Ezekiasə ə ɉɛɓɛ́ hon nuąi di di tɔɔ di yəi, ə ɉu woo ɓo, ə lɔ Yai-Laa yəi bɛlɛ́n, ə ɉɛɓɛ́ hu hvólóon Yai-Laa líila. 15 Ə Yai-Laa hvɛli, yɛ kɛ mą: 16 «Yai-Laa Mɛ̨nį Kəlee ŋą Hééɓomun, Israɛlə nwɔ Yálá yɛ́i heenin mąąkpɛ malakaɠaa lɔwai, yɛ́ tanɔ̨n gbən ɓə ɓaa a yɛnɛ̨ɛ̨ tɔɔlaaɠaa kəlee di wɔ Yálá, yɛ́ ɓə yələ kɔ́lɔn da lɔi di pəli. 17 Yai-Laa! 'Ə́ wəli tɔɔ, ə́ nwóó mąn! 'Ə́ ɲɛ̨́i laaɓo, Yai-Laa, Senakeribə kaa, mɛ̨nįɠaai gaa moi ə́ di mąn, yai aa nuą tɔɔ diɛ Yálái hvulúmąą lalan. 18 Yai-Laa! Tɛ̨ąą li! Asiri tɔɔɓɛlaa daa nukanŋaa hu kala da di wɔ lɔiɠaa. 19 Di di wɔ haliɠaai kələn, kɛlaa ɉaliɠaai tii di hvo kɛ a Yálá. Di kɛ lɔ a nu yee kɛ kolóɠaa, a wulu, a wala kɛti a kwɛni; ɛlɛɛ Asiri tɔɔɓɛlaa di di hu kala. 20 Kɛlaa, Ə́ wɛi, Yai-Laa, ku wɔ Yálá, ku kulɔ ɲəi, ə gɛ yɛnɛ̨ɛ̨ tɔɔlɔiɠaa kəlee di pɛli ɉu kɔ́lɔn ɉi diɛ kɛ, yɛ́ tɔ̨nɔ̨ lɔ ɓaa a Yai-Laa.» Esai ə Yálá kwəi mɛ̨nį laa həli Ezekiasə ɓa 21 Amɔsə lon Esai ə nuą tɔɔ diɛ li moi Ezekiasə ɓa, diɛ mą: «Mɛ̨nii Yai-Laa Israɛlə nwɔ Yálái ə mo ya ka, yai tii ə́ ə́ woo tɛ bɔ pələ Asiri tɔɔmun Senakeribə mąą mɛ̨nį hu: 22 Mɛ̨nįi Yai-Laa kaa moi, yɛ hvilɛn Senakeribə ɓa ya ka: «Siɔn nɛ̨ɛ̨gbɛla aa tɛɠɛɓo ə́ hu, yɛ yɛlɛ yɛ́, Siɔn nɛ̨ɛ̨gbɛla, mąąɲąŋąą, Ɉerusalɛmə nɛ̨ɛ̨gbɛla, kaa gɔn gbɛlaan ɉi a yɛ́, ə́ pulu pələ. 23 Gbɛɛ ɓə tii ə́ nalan yɛ mɛlɛ kpɛɛ mąi? Gbɛɛ ɓə tii ə́ kɛi ə́ woo həɠə mąi? Ɛlɛɛ, yɛ́ ɲɛ̨itɛ kulɔ lai? Israɛlə nwɔ Mąąhəɠəmun ɓə. 24 Yaa Ną́mu lalan a nuąi ə́ di tɔɔ, ɛlɛɛ yɛ́ kɛ diɛ: ‹Nwɔ́ kɔ́ kɔ́ wotoloɠaai kpulu kɛnɛ̨ pələ, ŋą́ą́ tɛ yeeɠaa tonna, ɓɛi nuą di kɛi di loo laa Liban lɔi hu, ɓɛi nu takpɛli hvo kɛi pɛli həlii laa, ŋą́ą́ tɛ laa, əgɛ, ŋą́ nwɔ hɛan gbɛa-kpɛaɠaa tee, da nwɔ kpitili lɛlɛɛɠaai, ŋą́ həli kpɔ nɔi kpɛlai, ŋą́ həli kpɔ ɲee tonna lə́ɠə́-lə́ɠə́ ɓa. Ŋą́ həli kpɔ nwɔ lɔwɔi nɛlɛi ɓa. 25 Ŋą́ yálɔwaɠaa tee, gɛ́ di hu yá kpələ, Eziptə yá pɛlɛɛɠaa kəlee daa kpála gɔ́wɔ mu.› 26 Ə́ kili hvo mɔ̨ɔ̨ ɉu yɛ́ kɛ ŋą́ą́ mɛ̨nįi ɲɛ̨́i mąą kili tee gwə́i, ɉu aa kwɛa? Ɛlɛɛ, ŋą́ą́ gíliŋąhiɛ mą, ə həɠə kpɔ tɔwɔ tɔwɔ yələ ɓa, Gáá kɛa gɛi yiihu: Yá pɛli mą ə́ taa kpɛa kpɛa mąą pənə a kwɛni hį́iɠaa. 27 Daaɠaai tii hu nuą yee hva li kwɛala, di kaa ɲɔwi, di kwəi aa pili diɛ, di kaa yɛ kpomói kala tiliin, yɛ lɔwɛi wulu laa, di ɓo yɛ pɛlɛ́ kɔ́n mą kala tiliin, di kaa yɛ huwɔ hu tumɔ̨, yai hvąŋą wələənŋąą a hee ɉu. 28 Ə́ kaa heei-yoo, ə́ kaa kulɔi-yoo, ə́ kaa lɔ́i-yoo, gbaɠala kaa mą́ą́, ə mą kɛ ɓɛlɔwai yá kɛ hvɛɛi la mą́ą́, yɛ́ kpɛlin a líiholi. 29 Mąąhɔlɔɓo, yáá kpɛlin mą́ą́ a líiholi, ɛlɛɛ, ə́ wɔ tɛɠɛɓoɉu wooɠaai daa too wə́lii, gáá kwɛli tooi ə́ hunwɛ̨i, ŋą́ hoo la kwɛli too ə́ la, gáá pənəi ŋį́ li a yɛ́ a bələi tii ə́ həɠə la. 30 Mɛ̨nįɠaai tii kɔ́lɔn ɉɛŋąą ka ɲɛ̨i ə́ yəi: Gwɛlan ŋɛ̨́i yeemu, di kaa pai mɔ̨nun gbán ɉu mɔ̨nun mįi, gwɛlan ɲii tii bulu, mɔ̨nun a tiliin gbɔwɔ ɓa yili ɓə da mįi, Kɛlaa gwɛlan ɉaaɓa nąn, 'ka mɔ̨nun ɉin, 'ka dee, 'ka hihɛn ɲɛa laa, ka mą mįi. 31 Nu gbəliɠaai kulɔ gɔ́ hu Ɉuda yəi bɛlɛ́n, yii di nɛɛ laa, ɉamu kaa pa pənəi ə ɓɔn a nįnɛ̨, ɛlɛɛ, yɛ ɓa. 32 Mąąhɔlɔɓo, nu kpəli kaa pai hɔlɔɓoi Ɉerusalɛmə, nuą kaa pai kulɔi Siɔn yee nwuɔ̨. Mɛ̨nį Kəlee ŋą Hééɓomun Yai-Laa nwɔ wɛlikɛmąąlaa ɓə pai mɛ̨nįi tii kɛi. 33 Yili ɓə gɛi, mɛ̨nįi Yai-Laa kaa moi yɛ hvilɛn na Asiri tɔɔmun mą, ya ka: hvo pai lɔi daai ŋɛ̨i hu, hvo pai nwɔ tɔ́nwąɠaai pilii laa, hvo pai woloi daa ɓa a nwɔ kɔ́ kɔ́-kwɛlihɛnŋąąi, hvo pai goto pɛlɛi ɉį́i ɓa. 34 Bələi ə paa la, a pənə ə ɉaŋą la, hvo pai lɔi daa ŋɛ̨́i hu. Yai-Laa woo li. 35 Gáá pai daa ŋɛ̨́i mąąkɔ̨nwɔ̨i, ŋį́ nwun mąąɓo, ɲą́ą́ mą́ą́ mɛ̨nį ɓa, kwa nwɔ tímun Davidə.» Asiri nuą pənə mɛ̨nį, da Senakeribə haa mɛ̨nį 36 Yai-Laa nwɔ malaka ə pa Asiri nuą di wɔ kɔlaɠai hu, ə nu waa nwundɔ̨nɔ̨ yeemɛ́ihaaɓa kɔ́w lɔɔli paa. Yələ wala pɔ, nuą nwun ɉii lɔwai, gəlee di kɛ a di pɔwa. 37 Asiri tɔɔmun Senakeribə ə muhəɠə, ə pənə ə li Ninivə, ə hee laa. 38 Hvóló ta, ə kɛ nwɔ yálái Nisrokə hvɛli pɛlɛ́ mu, yɛ kwɛli hvilɛn mą, nonnii, Adramelɛkə da Sarɛsɛrə di pa di ɓɔwa pu mą, di pu də li Araratə lɔi hu. Non Asaradɔn ə hee dɔɔlaa hu a mąą hvalin. |