Azaya 36 - Yálá laawoo hɛɓɛ (dc)Gɔi Asiri tɔɔmun ə bɛlɛ Ɉerusalɛmə ɓa 1 Ezekiasə nwɔ tɔɔlaa gwɛlan bow nąąn nąą, Asiri tɔɔmun Senakeribə ə kɔ́ pɛlɛ Ɉuda taa kpɛa-kpɛaa kəlee diɛ, ə gəlee hon. 2 Asiri tɔɔmun, ə lɛɛ Lakisə, ə nwɔ kɔ́kuláái gɛnɛ̨mun dɔɔ, tɔɔmun Ezekiasə pɔɔli Ɉerusalɛmə, da kɔlaɠa kpulu kɛnɛ̨. Ə pa, ə tɔɔ ɲá nwuɔ̨ pələ ya haɠai, ɉəɠə waa pələ kwɛlɛ. 3 Dɔɔ pɛlɛ́ ɲąąwooɓomun, Ɛliakimə yaai a Hilkiyahu lon, da ɉɛɓɛ́ kɛmun lon Sɛvna, da noloɓomun Yoa, yaai a Asafə lon; di kulɔ, diɛ li guláá tii laakwiɛn ɉii. 4 Gɔ́laɠa nwun nąmu yɛ nuą tii diɛ: «'Ka li, kaa Ezekiasə ɓa: Dɔɔmun gɛnɛ̨i a Asiri tɔɔmun, nwoo ka, yɛ: Lə kpɔɔ ɓə laa ə́ kilitɔɔmą? 5 Yɛ́ kɛ diɛ: Woo ɲąą taanɔ̨n gbən, a pɛli liɛwoo da huwalawala tɛɛi nu pɔ kɔ́ hu! Gbɛɛ kpɔ ə́ kilitɔɔi mą, yɛ́ kulɔ nwóó mu? 6 Ə́ kili hvo tii yáá dɔɔ Eziptə ɓai, a veen gbaɠa hu yali laa nɛ̨ɛ̨ tii! Nui lɔpee a tunwɔ̨n mą, a lɔ ɲee hu, yɛ ɉaɠa; bələ ɓə Faraɔn Eziptə tɔɔmun a gɛ la, a nui lɔpee a gilitɔɔmą. 7 Ə́ kaa nwɔ̨nɔ̨ kɛi mą: Yai-Laa ɓə a ku wɔ Yálá, ya ɓə kwa ku kilitɔɔmą. Kɛlɛi yaa tii ɓə Ezekiasə ə nwɔ haláá kulɔiɠaa taɠa, da gɛɛnąąɠaai da gɔ laa? Yɛ kɛ Ɉuda lɔi da Ɉerusalɛmə taa diɛ: Ɉaláá kulɔi ŋɛ̨i ɓɛ Ɉerusalɛmə, nąą ɓə mąąnɛ̨ɛ̨ ka pa kaa kwɛli hvilɛn naa mą. 8 Akɛ hulɔnu ɓaa yɛ́, nwɔ́ mɛ̨nį námu Asiri tɔɔmun paa pɔlɔn dɔɔ! Yá gɛ tii, ŋą́ hoo waa hveelɛ tɛɛ ə́ pɔ; akɛ yá pɛli nuą hɔlɔɓoi, di tɛ gəlee mɛ̨i. 9 Yɛ́, yá pɛli gɛi nwɔ́ kilɛn-nąŋąlon daanɔ̨n gbən yɛ pu ə́ tɔwɔ, a námu nwɔ kɔ́ kuláa nogolo laamun da; yɛ́i ə́ kilitɔɔ Eziptə ɓa, ŋą kɔ́ kɔ́-wotoloɠaa, da ŋą hoo gilɛ həɠə nuą diɛ? 10 Və́ hvólómun kɛ bɔ, və́ kɔ́ pɛlɛ nɔi ɲɛ̨i ɓa ɉu wolo mɛ̨nį ɓa Yai-Laa tɛɠii; Yai-Laa yaa kpinįi ɓə kɛ mą́ą́: ‹'Kɔ́ pɛ́lɛ́ nɔi tii ɓa, ə́ ɉu kalaɠala.›» 11 Ɛliakimə, da Sɛvna, ɛlɛɛ Yoa diɛ gɔ́kuláá tii ɓa: «Mɛ̨ni ɓo yɛ́ tinuą diɛ a Aramə woo, kwa nwooi tii mąn; hvo hvaa a Ɉude woo, nuąi tii daa mąąkpɛ hįi ɓa di hvo pa nəi mɛ̨n.» 12 Gɔ́kuláa yɛ diɛ: «Ka nąmu ɓə mɔ̨ɔ̨ námu ə dɔ́ɔ́ gɛ́ pa mɛ̨nįi ɲɛ̨́i ɓoi mą, a wala kɛti kaa? Nuą tii heeni daa mąąkpɛ hįi mɛ̨i diɛ ɓə; diɛi ŋɛ̨i kɛa kanąn ɉu, diɛ di kpo mįi, diɛ di wɛlaayá kpələ, diɛ hvəi?» 13 Gɔ́kuláai tii ə tɔɔ, ə tómą a nwoo kɛnɛ̨, a Ɉude woo, yɛ diɛ: «Ka ka weli tɔɔ dɔɔmun gɛnɛ̨, Asiri tɔɔmun nwoo ɓa. 14 Tɔɔmun yɛ kaa: Ezekiasə hvo ka ɓowo, hva pɛli ka ɓaloi. 15 Ka hvo Ezekiasə lɛɛ laa hvo kɛ kaa; Ka ka kilitɔɔ Yai-Laa ɓa, hvo gaai, gaa kɛi kaa: Yai-Laa kaa pai gu kulɔi mɛ̨nįi, yili hva ɉəɠə mą. Daai ɲɛ̨́i hvo pai tooi Asiri tɔɔmun ɲee ɲą. 16 'Ka hvo ka wəli tɔɔ Ezekiasə woo ɓa, kɛlaa, mɛ̨nįi Asiri tɔɔmun gaa moi ya ka: ‹Ka gu too nɛ̨ɛ̨laa hu, ka ka kpɔwɔ tɛɛ bɔ́, ka gɛ tii, nu tɛi tɛi kaa pai nwɔ tíi mą mįi, ə nwɔ hihɛn ma mįi, yɛ gbələ a nwɔ yálɔwai hu yá.› 17 Ə lɛɛ ɉu gɛ́ pa lii a kaa lɔi takpɛli hu, ə ɓo yɛ bələi ka wɔ lɔi kaa la; ɓɛi mɔ̨nun da lɔɔ nįnɛ̨ di kaa laa, lɔi yii kɔ̨nɔ̨n gaa ɉu, da hihɛn ɲɛɛ. 18 Ka hvo Ezekiasə lɛɛ laa hvo ka ɓowo, yɛ kɛ kaa; Yai-Laa kaa pai ka kulɔi mɛ̨nįi, a kɛ tii, nɔi takpɛliɠaai tii di wɔ yáláɠaai di pɛli mɔ̨ɔ̨ di wɔ taaɠaai kulɔi Asiri tɔɔmun ɲəi? 19 Hamatə da Arpadə di wɔ yáláɠaai kaa mį? Sefarwaimə nwɔ yáláɠaai kaa mį? Di mɔ̨ɔ̨ pɛli Samari kulɔi ɲee ɲą? 20 Nɔiɠaai kpɔ tii nɛlɛ ɓə nwɔ yáláɠaai di pɛli di nwɔ taaɠaai kulɔi ɲéé ɲą? Yai Yai-Laa kaa pai Ɉerusalɛmə kulɔi ɲéé ɲą́?» 21 Nuą di di laa pilɛ, di hvo nwoo pulu pənə, mąąhɔlɔɓo, tɔɔmun ə kɛ diɛ: «'Ka hvo nwoo pulu pənə.» 22 Dɔɔ-pɛlɛ́ ɲąąwooɓomun Ɛliakimə yai kɛ a Hilkiyahu lon, da ɉɛɓɛ́ kɛmun Sɛvna, da Asafə lon Yoa, yai kɛ a noloɓomun, di pənə di pa tɔɔmun Ezekiasə pɔ di mąą həɠəɠaa huɓɛlaa, di gɔ́kuláái tii wooɠaa kəlee hu kulɔ mą. |