Azaya 33 - Yálá laawoo hɛɓɛ (dc)Kpalo ɓɛlaai kɛɛ kala mun ma 1 Kpalo ɓɛlaai yɛ́, yɛ́i kɛɛ kalai ə́ ɓɛlaa diɛ, yaan, da hvo ta kala li yɛ́, yɛ́ ə́ ɓɛlaa ɓowo, yaan di hvo ta ə́ ɓowo li. Ya pa kpɛɛi gɛɛ kalaai tii ɓa, di kaa pai da kalai lɔ yɛ́, yá pa kpɛɛi a mowo ɓoi tii kɛɛ a ə́ ɓɛlaa, di kaa pai ə́ ɓowoi. 2 Yai-Laa! 'Ku ɲɛ̨imąąwɛli kaa, yɛ́ ɓə ku kilitɔɔ yɛ́; ku hvaŋą lɔ a yələɓɔ pələ tɛi tɛi kəlee; yɛ́ ku nwun mąąɓo mɛ̨nį kpɔluɔ hu. 3 Yələ gbąnąą a gɛ, nuą da kɛ pui, yá ə́ muhəɠə, lɔiɠaa da taɠa, 4 diɛ ka wɔ kɔ́ hon bu gee mɛ̨i, yɛ peeləɠaa, diɛ pu mɛ̨i yɛ ɉaiɠaa da kɛi pu hɛn mɛ̨i. 5 Mąąwiɛ kaa Yai-Laa ɓa, mąąhɔlɔɓo, gaa heeni yələi pələ; aa Siɔn laahvɛɛ a tɛ̨ą mɛ̨nį da tələnmolaa. 6 Ə́ wɔ yɛnɛ̨ɛ̨ laa hɔn mo hɛn ɓa pai kɛi, a ɓalo mɛ̨nį nwɔ hɛn gɔw, kili mɛ̨nį, mɛ̨nį kɔ́lɔn ŋąą, da nu ɲɔwuɔ Yai-Laa ɓa, yili ɓə pai kɛi a gwɛlin. Nɔi kaa wɔlɔi Yálá yɛ nwɔɔ nąą kɛ ɉu 7 Ka káá gaai; Ariɛlə nuą kaa tómąi gwəli hɛ̨ąɠaa, niilaa-wɛlɛɛ ɓo nuą kaa wɔlɔi kpɔ a di nwąnąi. 8 Bələɠaa mɛ̨i tɔɔ ton ton; nu ta hvo kɛa tɛɛi bələɠaa pɔ, daa mįnɛ̨ hukala, daa di yee kulɔ daaɠaa mu; nu mɛ̨nį ɓɛlɛ hvo kɛa mą. 9 Nɔi kaa haa wɔlɔ ɓoi, yɛ kpala; Liban aa nwumɛ̨, yɛ kpala, Sarɔn aa kɛ yɛ Ɉurdɛn ɲa-ɓoloon bɔ lɔi, Basan da Karmɛlə wuluɠaa di laa aa pu. 10 Yai-Laa yɛ diɛ; múhəɠə hiɛ li kɛa, gáá kɛa haŋąi ŋį́ tɔɔ, Náá mąą kaa kɛa pai wiɛi. 11 Ka koo həɠə a mɔ̨nun gban, kaa ka laa yɛɛ a dɛ̨ɛ̨ kpoloon, ka nɔ̨ɔ̨ kaa pai kɛi a nwɔ̨n, yɛ ka kələn. 12 Nɔi nuą kaa pai kɛi kələn ɉii yɛ kpolo kɔ́w, di kaa pai kɛi yɛ, ɲąąlənŋaai da dee, nwɔ̨n ɲɛ gələn. 13 Kaai tii kwɛaa la, ka ka wəli tɔɔ yii ŋį́ gɛ mą; kaai ka mąąkpua, 'ka nwɔ́ huwalawala kɔ́lɔn. 14 Nɛ̨ŋɛ̨n ɉəɠə nuą kwəi aa pili diɛ Siɔn daai, mɛ̨nį ɲɔ̨n gɛ nuą mąą kaa kpɛlin ɉii, ku nɛlɛ ɓə pai lɛɛi tɔɔni gɛɛ kala nwɔ̨n ŋɛ̨i kwɛlɛ? Ku nɛlɛ ɓə pai lɛɛi tɔɔni? Gaa a kpaɠa nwɔ̨n hva liin. 15 Nui a túwɔ́ a tələnmolaa, yɛ hvaa, lɛɛ hva kɛ ɉu, yɛ lənə hvulu hɛn ɉɔlɔɓo mɛ̨nį ɓa, yɛ ɲee kulɔ nɔgwəi mɛ̨inɛ̨ɛ̨ mu, yɛ nwəli laa kpulu, ə gɛ hvo pa nu paa nwun dɔɔ hu woo mɛ̨n; yɛ ɲɛ̨i laa kpulu, ə gɛ hvo pa mɛ̨nį ɲɔ̨n gaa. 16 Mąą nu ɓə pai ɉeei hɔlɔɓoi yələi pələ, gaa pai mąąkilɛi kwɛni kpuwuluɠaa mɛ̨i, yiiɠaai di mąą tínɛ̨n ŋąą a hį́i; di kaa pai kɔ̨nɔ̨n dɛɛi bɔ, yá hvo pai kpɛɛi ɲəi. Ɉerusalɛmə nwun mąą aa ɓo 17 Ə́ ɲɛ̨i kaa pai tɔɔi tɔɔmun nɛlɛ pələ ɓa, ə́ ɲɛ̨i kaa pai hiɛi nɔi nąą kəlee mɛ̨i. 18 Nui kɛi ə́ mąąɲɔw, ə́ kaa pai kɛi ə́ kiliŋąhiɛi mą, nui kɛi ə́ kɛ kóló mɛ̨i kaa, gaa mį? Nui kɛi ə́ pulu kaa ə wɔɔ? Nui kɛi ə́ wɔ taa walawalaɠaai mɛ̨i kaa gaa mį? 19 Hvo kɛa pai gbɔwɔ ɲąą kɛnɛ̨ nuąi tii kaai, a nu huwui tii, naa woo mɛ̨n naa walaai, diɛi di hvaawoo a nu laa yɛlɛ, nu hva pɛli gulɔ ɉu kɛi. 20 Ə́ ɲɛ̨i hee Siɔn taa ɓa, yai gaa a guɔ hɛliɠaai pu taa, ə́ kaa pai Ɉerusalɛmə kaai, yai gaa a liilaa kɛɛnąą, həɠə pɛ́lɛ́ yii di hva kɛa gulɔ, yai di hva kɛa gɔwɔ hvilɛn nwuluɠaa kulɔ, yai di hva kɛa ɲɛliɠaa kulɔ. 21 Nąą ɓə Yai-Laa kaa pai kɛi laa gu yəi a mɛ̨nį kɛnɛ̨ɛ̨, nąą kaa pai kɛi a yá kpɛa-kpɛa tɛɛ lɔi, da yá heen gbɛa-kpɛa; Kɛlaa, kələn da lɔpee hvo pai tɛɛi laa, ə mą kɛ kələn nɛlɛɛ ɓə, hva tɛɛ laa. 22 Tɛ̨ą li Yai-Laa ɓə a ku kiti tee mun, ya ɓə gaa a ku ɲąąwooɓomun, Yai-Laa ɓə ɓaa kuɔ tɔɔmun, ya ɓə a ku nwun mąąɓo. 23 Ə́ wɔ yɛliɠaa hu aa haa, di hvo kɛa gələn ɉiɛ hɛn ɉon ɉii a nwala walaa, di hvo kɛa húú pilii, nąąlɔwai, di kaa pai doomɛ̨i hɛn gɔwɠaa ɲąąkwɛlɛi la a gbulu kɛnɛ̨ɛ̨; kpɛlɛɠɛlɛn ɲɔ̨n gɛ nuą kəlee di kaa pai kɔ́ hon ɉɔlɔɓoi; 24 Nɔi lon da hva kɛa kɛ diɛ: «Ɲɔn gaa mą́ą́.» Nuąi di kaa heeni Ɉerusalɛmə, di kɛ nɛ̨ŋɛ̨n gaa pai waai diɛ. |