Azaya 32 - Yálá laawoo hɛɓɛ (dc)

Tɛlimo tɔɔlaa

¹ A kɛ tii tɔɔmun gaa pai kɛi dɔɔlaa kɛi a tələnmolaa, nɔi ɲɛ̨i tɔwɔ nuą diɛ nɔi ɲąąwooɓo a tɛ̨ą pələ.

² Di tɛi tɛi kaa pai kɛi a nu mąąkilɛi, hvaŋą tɔwɔ; di ɓo a tulɔ teen ɉii. Di kaa pai kɛi yɛ tɛɛyáɠaa gbáli kələn ɉu; yɛ kwɛni kɛnɛ̨ɛ̨ nįnį́n lɔi hukpalaa hu.

³ Gɛɛ kaa nuą ɲɛ̨i la hva kɛa kpulu, mɛ̨nį mɛ̨n nuą wəli a kɛ a dɔɔ a nɛlɛɛ.

⁴ Nuąi da kpɛlin mɛ̨nį ɓa, di kaa pai kɛi tɔɔi a di nwąnąi, diɛ mɛ̨nį mukulaa kaa; nuąi kɛi mumu, di nɛ̨n yɛ pənə di la, diɛ hvaa ɉa-ɉa, ɛlɛɛ nuą diɛ gulɔ ɉu kɔ́lɔn.

⁵ Di hvo kɛa pai kilikpɛɛɲəimun gɛi a lɔi nąmu, di hva kɛ hvulumun mą nu kɛnɛ̨.

⁶ Yaan, kilikpɛɛɲəimun nwɛi, ɓowo wooɠaa ɓə a mo, yɛ mɛ̨nį ɲɔ̨n gili tee gwəi, a túwɔ́ a nɛ̨ŋɛ̨n ɉəɠə mun dúwɔ́ pələ. Yɛ Yai-Laa laa mąątea woo ɓo, nui pulú aa gbɔlɔɔn, yɛ nɛɛ a gwəi howolo, nui kpələ wɛli kaa mą, yɛ nɛɛ a yá wɛli.

⁷ Hvulumun nwɛi, gɛ mɛ̨nį kəlee a kɛ lɔ a hvulu, a mɛ̨nį ɲɔnŋaa kili tee gwəi, yɛ mąąwɛli nuą nwun na pili la a lɛɛ woo, ə mą kɛ a mąąwɛli nuąi tii, di wɔ tɛ̨ą mɛ̨nį li.

⁸ Kɛlaa, kaalon nwɛi, kaalon giliŋąhiɛ ɓə gaa mą, ɲɛ̨i pɔ̨nɔ̨ mɛ̨nįɠaa lɔ ɓə a ɲee lɔ ɉu.

Nɛ̨ɛ̨ai kiliŋąhiɛ hvo diɛ

⁹ Nɛ̨ąą! Kaai mɛ̨nį ta hva ka lii kulɔ kaai, 'ka ka wəli tɔɔ, nɛ̨ɛ̨lɛa kaai kiliŋąhiɛ hvo kaai, 'ka ka wəli tɔɔ ka nwóó mɛ̨n;

¹⁰ Kwɛlan dɔ̨nɔ̨ a tɛɛ hvóló taɠaa da laa mɛ̨i, ka mąą kaa pai kpɛlin ɉii, a kɛ tii kɛa daa kpɛɛ a mɔ̨nun deɛ, mɔ̨nun dee mɛ̨nį hva kɛa kɛ ɉu.

¹¹ Ka mąą kaa pai kpɛlin, kaai ɲɛ̨i mɛ̨nį ta hva ka lii kulɔ kaa, ka nwun mini-mini ə yɛɛ a kaa, a kaa ŋɛ̨i kiliŋąhiɛ hvo kaai, ka ɉəɠəɠaa kulɔ kaa, ka ka kpuwuluɓo, ka həɠə kpulon ka niŋəi.

¹² Kaa ka woo laa, kaa ka kəŋə hu tuwo, kaa wɔlɔ ka wɔ yɛɛkɔwɔ lɛlɛɛɠaa mɛ̨i, kaa wɔlɔ ka wɔ mɔ̨nun nɛlɛɛɠaa mɛ̨i.

¹³ Ɲąąlən gbɔlɔ kaa tɛi, nwɔ́ nu huwui nwɔ lɔi hu, yɛ tɛ gwəinɛ̨ɛ̨ kulɔ pɛlɛ́ɠaa kəlee mɛ̨i, yɛ tɛ ɉɛli pu taa hu.

¹⁴ Dɔɔmun ŋą pɛ́lɛ́i aa lɛɛ a vowolo, daai tii kɛ naa hvɛɛ a nukan, aa lɛɛ a gboloon, ɲee kpu kpu da daa mąą kpɛ hį́i, daa lɛɛ a huwɔ pɛlɛi a yələ kəlee mɛ̨nį, a hoohvaalənŋaa di wɔ kwəinɛ̨ɛ̨ kulɔi, da taatɛlɛɛɠaa laamįi…

Líílaa kaa pai kɛi a tələnmo yíi dɔlɔ

¹⁵ Ə lɛɛ ɉu, Yálá nwɔ Kilii ə həɠə yələi ə pa gu pɔ. Nąąlɔwai tii, lɔi pun a mąą pənə a nɔw-yɛa lɛlɛɛ, nɔw yɛ lɛlɛ yɛ wɛla wulu.

¹⁶ Tələnmolaa kaa pai daa tɔɔi lɔi pun ɉu, tɛ̨ą mɛ̨nį yɛ hee nɔw-yɛa.

¹⁷ Tɛ̨ą kaa pai ɓai a liilaa; tələnmolaa yɛ pa yɛnɛ̨ɛ̨ wəli pulu laɠi, a yələ kəlee mɛ̨nį.

¹⁸ Nwɔ́ nu huwui kaa pai heei liilaa lɔi hu, di wəli pulu laɠiɛ di wɔ pɛlɛ́ɠaai mu, hvįįtɔɔ ɲąąlaɠiɛ hu.

¹⁹ Kɛlaa, daa hu kaa pai kalai a hanwon gbuɠulu laa pɔɔ ɛlɛɛ, daa mąą yɛ yɛɛ kpɔ kɛnɛ̨.

²⁰ Ka nwun na kaa pai nɛ̨ɛ̨i, ka káá pai ka wɔ tíiɠaa kɛi tɛɛyáɠaa kwɛlɛ, kaa ka wɔ nįŋɛ̨ɠaa, da ka wɔ ɓɛlaaɠaa lɛɛ laa di kpɔwɔ ɓa, ka hva di kpulɔn.