Azaya 31 - Yálá laawoo hɛɓɛ (dc)

Eziptə hvo ɓaa hɛn da

¹ Nuąi yɛɛi Eziptə, kpalo ɓɛlaai diɛ, di kaa lii kpɔn mąą kwɛlii laa, di kaa di kilitɔɔi hooɠaa diɛ; diɛ di kili lɛɛ kɔ́ kɔ́ wotoloɠaa diɛ, mąąhɔlɔɓo, di kpulu kɛnɛ̨ɛ̨i. Diɛ di kilitɔɔ ɉoo gilɛ həɠə nuą diɛ, mąąhɔlɔɓo, di tamąąi. Kɛlaa, di kili lɔpee ta hvo tɔɔ li Israɛlə nwɔ mąąhəɠə mun ɓa, di hvo Yai-Laa kwɛlii.

² Ya pa yai tii kpɛli nwɛlɛɛi, a pɛli mɛ̨nį ɲąąnwąnąą laai nu ɓa; ɛlɛɛ, yii a mo, hva ɉəɠə mą. Gaa muhəɠəi nu ɲɔ̨nwɔ̨ɔ̨ɠaa laa ɓa, da mɛ̨nį ɲɔ̨n gɛ nuąi tii di kaa di təlii kpɔn mąą tɛɛ mɛ̨nį ɓai.

³ Eziptə mun gaa lɔ a nu, yálá hvə li, nwɔ hooɠaai di kaa lɔ a huwɔ, malakaɠaa hvə li. Ɓɛlɔwai Yai-Laa kaa pai ɲee haŋąi la, mąąkɔ̨nwɔ̨ kɛ mun gaa pai kalin ɉii, nui di mąąkɔ̨nwɔ̨i yɛ too; di kəlee di nwun na a pili a gee.

Yai-laa kaa pai Ɉerusalɛmə maa kɔnwɔi

⁴ Mɛ̨nįi Yai-Laa ə mo mą́ą́ ya ka, yɛ diɛ: Akɛ yala hilɛ, a wala kɛti yala lon, a kɛi kpəɠi gɔ̨nɔ̨n mɛ̨i, taatɛlɛɛ pulu nuą di mą pa a di kpulu kɛnɛ̨, di tómą woo hva mąąɲɔw, di tín va nii kulɔ mą. Bələ ɓə Yai-Laa Mɛ̨nį Kəlee ŋą Hééɓomun kaa pai yɛɛi la Siɔn yee nwuɔ̨, nwɔ yee kpu kpui mɛ̨i, kɔ́ kɔ́ mɛ̨nį ɓa.

⁵ Bələi lɔ nwɛ̨niɠaa da di koon naa ɓo la, bələ lɔ ɓə Yai-Laa Mɛ̨nį Kəlee ŋą Hééɓomun kaa pai Ɉerusalɛmə mąąkɔ̨nwɔ̨i la; gaa pai mąąkɔ̨nwɔ̨i yɛ gulɔ mɛ̨nįi, gaa pai mąąhvaalɛɛi, yɛ nwun mąąɓo.

⁶ Israɛlə lonnii, nui kaa ka pulu tɔɔ mą a ɉu kwɛa, ka pənə ka pa bɔ.

⁷ Mąą yələ, nu kəlee kaa pai nwɔ wali halii da nwɔ hɛni halii pilii, diɛi tii kaa kpinįi ka bɛli nɛ̨ŋɛ̨n gɛɛ hui.

⁸ Kɔ kɔ́ ɓɔwa yii hvo a nu kan ɲəi ɓɔwa, ya ɓə pai Asiri paai, nu kan ɲəi ɓɔwa hvee pai ɉu kalai, gaa pai pui kɔ́ kɔ́ ɓɔwa ɲɛ̨i tɔwɔ, ɛlɛɛ, nwɔ kɔ́ kɔ́ laŋąąi di kaa pai lɛɛi a luwɔ kóló kɛ nuą.

⁹ Nwɔ kwɛni kpuwului kaa pai pui a ɲɔw, da kɛi nwɔ kɔ́ nwun nąmįnąąi təli, diɛ mun diɛ pu a gilɛ. Yai-Laa woo li, yai nwɔ nwɔ̨n kaa Siɔn, ɛlɛɛ nwɔ kpaɠa nwɔ̨n ə ɓo Ɉerusalɛmə daai.