Azaya 3 - Yálá laawoo hɛɓɛ (dc)

Ɉuda lɔi hu mɛ̨nį ɲąą hvo mą

¹ A tɛ̨ą hɛn kpɔ a pɛli kpɔmąą tɛɛi, Ɉerusalɛmə da Ɉuda lɔi di pɔ, Nąmu Yai-Laa Mɛ̨nį Kəlee ŋą Hééɓomun kaa pai, gəlee kulɔi di yəi; yɛ ə kɛ a ya, yɛ ə kɛ a kɔ̨nɔ̨n.

² Yɛ ə kɛ a huwalawalamun, yɛ ə kɛ a kɔ́ kuláa; ə mą kɛ, kiti teemun da Yálá kwəi mɛ̨nį hu kulɔ mun; ɛlɛɛ, tɔlu kpɛmun, da hulɔgolo.

³ Yɛ ə kɛ a yala nąmu, yɛ ə kɛ a kalanɉon; yɛ ə kɛ a liɛwoo kɛmun, yɛ ə kɛ a ɲąmuątaa tɔlukpɛmun, ə mą kɛ, a pənən gɛmun.

⁴ Lɛapɛlɛɛ ɓə gáá pai ɉeei di mɛ̨i, a di ɲąąwooɓo nuą; diɛ di ɲąą woo ɓo yɛ bələi a tɛ la di nwun ɉu.

⁵ Nuą kaa pai kɛi hvaa pɛlɛi di kee ɓa, nu kəlee yɛ pɛlɛ ɉeeyɔwɔ ɓa, lolokolo yɛ tɔɔ hulɔgolo la, nu kpoloon yɛ tɔɔ nu ɓɛlɛmąą la.

⁶ Gɛ pələi tii, nu ta kaa lɔ pai kpalai nąnnon mą di nąn ɲəi bɛlɛ́n, yɛ kɛ mą: «Ə́ wɛi, gbaawii kaa ə́ kwąną, hee ku nwunna, nu kpəli woloi ŋɛ̨i ə kɛ ə́ yee mu.»

⁷ Nąąlɔwai, yili kaa pai kɛi mą: «Wululaa kɛmun vaa a ɲą́ą́, kɔ̨nɔ̨n, həɠə da hvo ɲə́i bɛlɛ́n; ka hva pɛli gɛ́i a nɔi ɲąąwooɓomun.»

⁸ Ɉerusalɛmə aa kalin, Ɉuda lɔi yɛ too; mąąhɔlɔɓo, di ka lɔ Yai-Laa ɓɛlɛ too mɛ̨nį hu a di hvaa woo, da mɛ̨nįɠaai da kɛ naai mą.

⁹ Di ɲɛ̨́i tɔɔ pələ ɓə a di mąą kɛla hvaa ɓo, di wɔ nɛ̨ŋɛ̨n tii tɔɔ di ɲɛ̨́i, yɛ bələi Sodomə ə gɛ la, di hva noo, di mąąwɛliɛi, diɛ mąąwɛli mɛ̨nį laa di kpɔwɔ ɓa.

¹⁰ Ka mo kaa diɛ: tələnmomun nwun na nɛ̨ɛ̨i, hvó gaai kaa pai gɛ tíi dɔlɔ mįi.

¹¹ Kpalo ɓɛlaai mɛ̨nį ɲɔn gɛmun mą, hvó gaai mąąwɛli mɛ̨nį hɛlɛ ŋąąi nwun mɛ̨i, di kaa pai ɉon ɉii, yɛ bələi ə gwɛli la a dúwɔ́ pələ.

¹² Éé kə́! Nwɔ́ nu huwui! Nwɔ́ nu huwui laanɔ̨nwɔ̨ ɓomun gaa a tunun, nɛ̨ąą ɓə mun nɔi ɲąąwoo kaa di la; Éé kə́! Nwɔ́ nu huwui! Nuąi ka ɲɛ̨́i tɔwɔ di kaa ka lan ɉi, di kaa pələ lɛi kaa a viənŋąą.

Ɲɛ̨itɔwɔ nuą kiti tee mɛ̨nį

¹³ Yái-Laa aa pa gití haɠa ɓa, aa haŋą aa tɔɔ nu kanŋaa kiti tee mɛ̨nį ɓa.

¹⁴ Yai-Laa kaa nwɔ lɔi hu kalanɉonŋąą, da ɲɛ̨itɔwɔ nuą təlii kiti ɓa, yɛ kɛ diɛ: «Káá ɓə, káá tɛ nwɔ́ kələ́i ɓa, ka hvo ɉɔɔ li! Kaa too mąąwɛli nuą mɛ̨i, di wɔ hɛnŋąąi di ɓo ka yəi bɛlɛ́n.

¹⁵ Lə mɛ̨nį ɓa ka hee nwɔ́ nu huwui mɛ̨i, kaa mąąwɛli nuą hon a di ɲɛ̨i paa pələ? Nąmu Yai-Laa Mɛ̨nį Kəlee ŋą Hééɓomun woo li!»

Yálá kaa Ɉerusalɛmə nɛ̨ąą kiti teei

¹⁶ Yái-Laa yɛ: yii Siɔn nɛ̨ɛ̨lɛa kaa ɓələn gulɔi, da kɛi hiɛ daa di ɲɛ̨i pili yələi, diɛ nuą ɲɛ̨i kwɛli, di hiɛ diɛ di wilɛn gbɛlin, diɛ di kɔ́wɔ kwaną talanən bɛlɛɛ tin dɔɔ;

¹⁷ Ną́mu Yálá kaa pai kpowólo pui Siɔn nɛ̨ɛ̨lɛa nwuɔ̨, Yai-Laa kaa pai di mąą kpoloon ɉii.

¹⁸ Mąą yələ, di mąąyili hɛnŋąąi tii a dalanən bɛlɛɛ-pɛlɛɛi, a voló da ɲąnįn mąą nįnįnŋąą Yai-Laa kaa pai gulɔi diɛ.

¹⁹ Wəlii kwɛliɠaa, yee kwąną kwɛlii a yɔwɔn bɛlɛɛ, da nu nwun mɛ̨i kpulu həɠə ɓɛla pɛlɛɛ,

²⁰ nwun nɛɠa mu yili həɠə ɓɛla, kɔ́wɔ kwąną kwɛli, hɛ̨ąyili kɔ́lɔ, mąątí wulɔ, yee kwaną kwɛli,

²¹ yee kpuɔ ɓa kwɛli, hunwɛ̨i kwɛli,

²² hɛli həɠə, biliɉu, kilɛn ɉəɠə, yee pɔ ɓíi,

²³ gaaɉu, həɠə mu həɠə kwɛlɛɛ pə-pə, nwuɔ̨ ɓɔlɔ, ə mą kɛ, həɠə ɓɛla hoolɛɛ.

²⁴ Wulɔ kun nɛ̨ɛ̨, mąą a hvalin a hɛn nulɔ kun, hɛ̨ą yili kɔ́lɔ mąą a hvalin a gɔtɔ yɛli, nwun naa lɛlɛɛ mąą a hvalin a nwun gbəlaan, həɠə lɛlɛɛ mąą a hvalin a mąąwɛli həɠə di wɔ lɛlɛ mąą a pənə a kwɛli kələn bɔɔ.

Ɉerusalɛmə kalaninŋąą

²⁵ Ə́ wɔ hinąąi da haa kɔ́ kɔ́ ɓɔwa yəi, ə́ wɔ kuláaɠaai di haa kɔ́ hu.

²⁶ Siɔn taa kaa pai ɲiŋɛ̨i, yɛ nwoo laa; a lɛɛ a ɲee howolo, ə ɓo heeni lɔi ɓa.