Azaya 29 - Yálá laawoo hɛɓɛ (dc)Di kɔ́ pɛlɛ Ɉerusalɛmə taa ɓa yili pulu di nwun mąąɓo 1 Kpalo ɓɛlaai yɛ́ Ariɛlə! Ariɛlə! Daai Davidə ə kɔ́ pɛlɛ mą; kwɛlan dɔ̨nɔ̨ aa laa gwɛlan tii mɛ̨i, ka gwɛlan ɉu hɛliɠaa kəlee lɛɛ laa ɲələ ə həli. 2 Gáá pai heei Ariɛlə ɓa, di kaa pai kɛi di woolaai, diɛ ɲiŋɛ̨; gaa pai kɛi ɲə́i a kuláá ta. 3 Ŋą́ kɔ́ pɛlɛ yɛ́, yɛ bələi Davidə ə gɛ la; ŋį́ ə́ mąątinɛ̨n ŋį́ doo gee hu ɲą́ą́ gbɛli, gɛ́ galaɠaa tɔɔ, gɛ́ ə́ mąątinɛ̨n na. 4 Ə too pələ, ə woo kaa pai kɛi yɛ a kɛli kulɔ lɔi mu pələ ə woo a kolo, yɛ kulɔ munuun ɉu, ə woo kaa pai kɛi yɛ haaɲąmu woo, yɛ kulɔ lɔi mu pələ, gaa pai kɛi kulɔi munuun ɉu, yɛ tɔɔ yɛ kwəlee woo. 5 Ə yowoɠaa kpulu kaa pai kɛi yɛ lɛɠɛ hunwɔ̨, Ə́ mɔ̨nɔ̨ɓo tɔɔɓɛlaa kpulu a kɛ yɛ mɔ̨nun galai hvaŋą kaa líila. Ɛlɛɛ kpɔlɔ ɲąą ɓa, 6 Yai-Laa Mɛ̨nį Kəlee ŋą Hééɓomun, kaa pai woloi lɔ yɛ́ kpulu, yələgbąnąą hu, lɔi kpɛlinŋąą hu, tin gɛnɛ̨ɛ hu, hvaŋą kɛnɛ̨ɛ̨ hu, a tulɔ hvaŋą kɛnɛ̨, da kɛɛ kala nwɔ̨n nən ɉu. 7 Gaa pai kɛi yɛ da kɛi hį́i ɓo, yɛ nu a kɛi mɛ̨nį ta kaa hį́i pələ, nuąi tii gɔ́ pɛlɛ Ariɛlə ɓa di yəi, a nuąi kpɔ tii kɛi gɔ́ pɛlɛ mąi, diɛ vąną, diɛ hee ɉu. 8 Gaa pai kɛi lɔ yɛ pulu ną́mu a kɛi kɔ̨nɔ̨n mįi hį́i bələ, yili pulu a ɲįnąąɓo, goolon ə ɓo a voɠolo, a wala kɛti ə ɓo yɛ nui gwaną kpalaa, a hį́i ɓo, yɛ ya kpələ, yili pulu a ɲįnąąɓo, kpələ wɛli aa vii kpɛɛ, Bələ ɓə nuąi ŋɛ̨i damąą kɛ pələ kaa pai kɛi la, diɛi kɛi kɔ́ pɛlɛ Siɔn yee ɓa. Ɲɛ̨i pu laa da lɔɔ hon nąa 9 Ka kwəi ə pili kaa, hvaa hvo kulɔ ka la, ka ɲɛ̨i ə pu, ka lɛɛ lɔ kɛa tii; ka kɛ tɔɔi takpa takpa, kɛlaa hva kɛ a lɔɔ laa pɔɔ, ka kɛ ka yee pɛlɛi ɓɛ-ɓɛ, Kɛlaa lɔɔ laa hva kɛ ɉu. 10 Mąąhɔlɔɓo, Yai-Laa aa kwəi pilimąą hvə kaa, Yálá kwəi mɛ̨nį hukulɔ nuą, aa ka ɲįnąą kpulu, kɛɛ kaa nuą, aa ka nwun mɛ̨i kpulu. 11 Mɛ̨nį hu pɔ̨nɔ̨ɔ̨ tii, hu kpinįɛi kaa ɲɛ̨i ɓa, yɛ hɛɓɛ́ laakpulɔɔ hu mɛ̨nį, yaai da dɛɛ hɛɓɛ́ kɔ́lɔnmun bɔ, diɛ mą: «ɉɛɓɛ́i ŋɛ̨i hu woo ɓo», yaan yɛ diɛ: «vá pɛli ɉu woo ɓoi mąąhɔlɔɓo, naa kpulɔɔi.» 12 Yili pulu, di dɛɛ nui hvo hɛɓɛ́ kɔ́lɔn bɔ, diɛ yili ɓa; «ɉɛɓɛ́i ŋɛ̨i hu woo ɓo», yaa kpɛli yɛ diɛ: «və́ hɛɓɛ́ kɔ́lɔn.» Gwəi pili mąą mɛniɠaa di hvo ni kpɛɛ li 13 Mɛ̨nįi Nąmu ə mo nu huwui ŋɛ̨i laa mɛ̨i ya ka, yɛ diɛ: Nu huwui ŋɛ̨i a mą́ą́wiɛ lɔ a naaləi, Kɛlaa, di nįį hu pələ mąąkwɛai mą́ą́; ɲɔw mąą laai gaa di hu mą́ą́ mɛ̨nį ɓa, gaa lɔ a nu mɛ̨nį, gaa a mɛ̨nįi daa di mąąkwɛli mą. 14 Yili ɓə gaa mą, gáá kpɔlɔ pai kɛi di kwəi pilii diɛ, a mɛ̨nįɠaai gáá pai kɛi gɛi di lɔwai, yɛ kilimąą nuą kiliŋą pɛlɛ, yɛ mɛ̨nį kɔ́lɔn nuą di wɔ mɛ̨nį kɔ́lɔnŋąą pili di yəi. Ka kɛ Yai-laa kaai yɛ gbɛɛ? 15 Kpalo ɓɛlaai nuąi tii diɛ, diɛi da kɛ mɛ̨nįɠaa kɛi loo pələi, diɛ di wɔ mɛ̨nįɠaai loo Yai-Laa ɓa; diɛ di wɔ lɔwɔi tɔɔ kpiníi, di woo laa diɛ nąąlɔwai: «Gbɛɛ ɓə ku kaai, ɛlɛɛ, gbɛɛ ɓə ku kɔ́lɔn?» 16 Lə mɛ̨nį həɠɛɛ li a gbowola pələ! Da mɔ̨ɔ̨ pɛli ləɠi tɔɔmun ɉon ɉii yɛ ləɠi pɔlɔ? Kóló a mɔ̨ɔ̨ pɛli kɛi gɛmun mą: «Yɛ́ hvə bɛ́li?» Ləɠi kpɛli a mɔ̨ɔ̨ pɛli kɛi diɛ: «Ləɠi tɔɔmun hvo mɛ̨nį kɔ́lɔn?» 17 Nąą aa lɛɛ kpɔlɔ tiikpə, Akɛtii Liban mąą hvo mɔ̨ɔ̨ pai pənəi a hihɛn ɲɛa; ɛlɛɛ hihɛn ɲɛa yɛ nwəla kɛ? 18 Mąą yələi tii, wəli wolo nuą kaa pai ɉɛɓɛ́ hu woo mɛ̨n ɉii, ɛlɛɛ, diɛ kulɔ kpinįi; ɲɛ̨ipunuą kaa pai kɛɛ kaai. 19 Yili pulu, kpɔwɔ mąąyɛɛ nuą diɛ di kwəinɛ̨ɛ̨ Yai-Laa laa hu, ɛlɛɛ yeehowolo nuą diɛ ɓələn, Israɛlə nwɔ Mąąhəɠəmun mąą mɛ̨nį ɓa. 20 Mąąhɔlɔɓo, nɔi mɔ̨nɔ̨ɓo-tɔɔɓɛlaa di wɔ yələi kpɛɛi lɔwai li, yɛlɛkulɔ ɉu kɛ nuą nwun na yɛ pili; ɛlɛɛ, nuąi kpɔ mɛ̨nį ɲɔ̨n gɛ kili kaa di kwəi, di kəlee di kaa pai haai: 21 Diɛ ɓaa nuąi da di ɓɛlaa kiti tee lɔ a di woo, nuąi da hɛlɛn dɛ di ɓɛlaa tɔwɔ kiti hu, nui hɔn və mą, diɛ doo kpinį hu. 22 Yili ɓə gɛi, Yai-Laa, Ɉakɔbə nwɔ pɛ́lɛ́i nwɔ Yálá; yai Abrahamə nwun mąąɓo, vaa woo ka, yɛ: Nwumɛ̨ hvo kɛa pai tɛi a Ɉakɔbə, ɲɛ̨i mąą hva kɛa luwu, 23 Mąąhɔlɔɓo, yii ŋį́ gɛ diɛ, da gaa, nonnii kaa pai Náá mąąhəɠəi, di kaa pai Ɉakɔbə nwɔ Mąąhəɠəmun laa mąąhəɠəi; di kaa pai kpɛlin ɉii Israɛlə nwɔ Yálái lííla. 24 Nuąi lan bələ mɛ̨i, di kaa pai kili hɔlɔɓoi, yiiɠaai di nwun nwala walaa, diɛ kɛa hvaa mą diɛ mɛ̨nį lɛ diɛ. |