Azaya 28 - Yálá laawoo hɛɓɛ (dc)

Hvaŋą kɛnɛ kaa pai Samari lɔi kalai

¹ Kpalo ɓɛlaai Ɛfraimə lɔɔ honŋąą di wɔ kpɔwɔ ŋąąkɛnɛ̨ ɓɔlɔi ɓa, nwulu powaɠaai daa yohva, diɛi kɛ a Ɛfraimə mąąyili hɛn ɲɛ̨i tɔɔɠaa, diɛi ɲa ɓoloon nɛlɛɛ hui, kaai lɔɔ yee aa tɛɛ kaai.

² Ną́mu nwɔ kɔ́ kuláa huwalawalaai ka, gɛ pələ ə ɓo yɛ hanwon tulɔ, yɛ kɛɛ kala hvaŋą; yɛ yánwąną kulɔ tulɔ; gaa pai hɛn gəlee ɓəleen ɉii yɛ di pu lɔi ɓa,

³ di kaa pai di kɔ́wɔ tɔɔi, Ɛfraimə lɔɔ honŋąą di wɔ ɓɔlɔ ɲɛ̨i tɔɔi mɛ̨i;

⁴ ɛlɛɛ nwulu powa tii a di mąąyili hɛn, yai gaa ɲa-ɓoloon nɛlɛɛɠaa hui, di kaa pai kɛi yɛ wulu mąąhulaai a ɓa tɔwɔ, gaa hiɛ nu ɓa, aa mą wɛan ɉu, aa bili na.

⁵ Mąą yələi tii, Yai-Laa Mɛ̨nį Kəlee ŋą Hééɓomun, a kɛ a ɓɔlɔ ɲɛ̨i tɔɔ, ya ɓə a kɛ a nwɔ nu huwui gbəli nwɔ tɔɔ ɓɔlɔ, da mąąyili hɛn;

⁶ Yálá kaa pai kɛi a dələnmo kiti teemun kili, ə ɓo a nuąi gɔ́ kpɛi daa ɓa, di wɔ hu walawala.

Nɔɔ honŋąąi yɛ́lɛ́i Yálá kwəi mɛ̨nį hukulɔ mun ma

⁷ Ɉaláá laa həli nuą da Yálá kwəi mɛ̨nį hukulɔ nuą kəlee, lɔɔ aa di nwun ɉu lan, nɔɔ kpəɠiɛɠaai tii kaa di tɔɔi takpa takpa; lɔɔ aa di nwun ɉu lan ɲee aa tɛɛ diɛ, nɔɔ kpəɠiɛɠaa tii kaa di tɔɔi takpa takpa; di nwɔ hį́iɠaa kili yɛ kpɛɛ di ɲą, diɛ lan ɉukulɔi.

⁸ Laamįi kɛɛnąą kəlee laahvɛɛi a di ɓaɠi kun, kɛɛnąą ta hvo laa a nɛlɛɛ.

⁹ Diɛ gɛ tii, di woo laa diɛ: «Gbɛɛ ɓə yɛ́ ə́ mɛ̨nį lɛ mą? Mɛ̨nįi ə́ kaa gaai, yɛ́ ə di hukulɔ gbɛɛ ɓa? Yɛ́ ə́ mo lɛapɛɛlɛɛi daa di laa kulɔ ɲįnį ɓa a nįnɛ̨ diɛ?

¹⁰ Ə́ woo laai lɔ: Taa taa dɛ; taa taa dɛ, paa paa pa.

¹¹ Bələ ɓə gɛ pələ kaa la, yili kaa a yɛlɛ kulɔ ɉu woo, yili kaa a nwɛ̨ą woo, nwooi yili ɓə Ną́mu kaa pai hvaai ɉu nu huwui ŋɛ̨i pɔ.

¹² Ə gbɛa mo diɛ, yɛ diɛ: Hviitɔɔ lɔwai aa həli, nui viikpɛɛ, ka nɛɛ laa ə vįitɔɔ, kɛɛnąą ɲąąlaɠiɛ ka.» Kɛlaa di hvo gɛ di hvo di wəli tɔɔ nwoo ɓa.

¹³ Yili ɓa, Yai-Laa hvaa woo kaa pai kɛi di wəlii a: Taa taa dɛ; taa taa dɛ, paa paa pa. Naa kulɔi lɔwai, da kɛi hiɛ, diɛ too di kpowo ɲɛ̨i ɓa, diɛ di hɛ̨ą yali, diɛ too hɛlɛn ŋą, di hva pɛli kulɔi ɉu.

Bɛlɛ́ kɔwɔ hvilɛn gwɛni

¹⁴ Ka ka wəli tɔɔ Yai-Laa woo ɓa, kaai ɓaa a yɛlɛ mąą kɛ nuą, kaai nu huwui ŋɛ̨i ɲąąwooɓoi Ɉerusalɛmə.

¹⁵ Ka káá kɛi diɛ: «Kwa haa ni kwaa mįnɛ̨ həɠə, kwa ɲąmuątaa ni kwaa mįnɛ̨ həɠə; gɛɛ kala ɲɔ̨n tii ə mą pa pai, hvo pai həlii kuɔ; mąąhɔlɔɓo, kwaa lɛɛ kɛ a ku mąąkɔ̨nwɔ̨ hɛn, kuɔ nu ɓowɔɔ kɛ a ku mąąkilɛi.»

¹⁶ Kɛlaa, mɛ̨nįi Nąmu Yálá kaa moi, ya ka: Gáá pai pɛlɛ́ kɔ́wɔ hvilɛn gwɛni laai Siɔn, a kwɛni mąą mɛ̨nį nwąnąą, yai daa mąąkpɛɛ, a bɛlɛ́ nwun ɉon gwɛni; nui a gilitɔɔ mą, gwəi hva pili mą.

¹⁷ Mɛ̨nį haŋąą ɓə pai kɛi a bɛlɛ́ kɔ́ɔn ɲɛli, tələnmolaa ə ɓo a ɉaŋą hɛn, ka mąąkilɛ pɛ́lɛ́i a lɛɛ, hanwon gaa pai ɉukalai, ɓɛi ka káá pai ka mąąkilɛi laa, yá hvɛɛ a nąą həɠə.

¹⁸ Mįnɛ̨i ka haa ni ka ɉəɠə, di kaa pai ɉukalai; mįnɛ̨i ka ɲąmuątaa ni ka ɉəɠə, hvo pai lɛɛi mą. Gɛɛ kala ɲɔ̨n tii a kɛi tɛɛ, gaa pai ka hukalai.

¹⁹ Dɛɛ pələ kəlee, gaa pai kɛi ka hon ɉii. Mąąhɔlɔɓo, gaa pai kɛi tɛɛi a yələwala kəlee, yɛ tɛɛ a hvóló da kpinį, ɛlɛɛ, mɛ̨nįi tii nu a gili kɔ́lɔn, a kɛ a ɲɔw kɛnɛ̨ɛ̨.

²⁰ Ka laa gbin gaa pai kpuɔi, ka hva pɛli ka kɔ́wɔ haŋąi; ɲíi həɠə hukolo pələ, hva pɛli ka mɛ̨i.

²¹ A tɛ̨ą, Yai-Laa kaa pai muhəɠəi a líiɲąnwąną, yɛ bələi ə gɛ la Perasimə yee ɓa, gaa pai vaŋą həɠəi, yɛ bələi ə gɛ la Gabaɔn yɛɛkɔ́wɔi, ɲɔ̨nwɔ̨ yee ə tɛɛ yili ɓa, lə kwəi pilimąą ɓəi! Nwɛ̨ą mɛ̨nį ka.

²² Ka hvo kɛa tɔɔ yiihu, kaa kɛ ka káá yɛlɛmąą kɛi, di hvo pa ka yili yɛli hu yala kaa; mąąhɔlɔɓo, ŋąą mɛ̨n Nąmu Yai-Laa Mɛ̨nį Kəlee ŋą Hééɓomun la, yɛ a nɔi nąą kəlee kala mɛ̨nį gili tee gwəi.

Tíi kɛmun mąa hanwon

²³ 'Ka ka wəli tɔɔ, ka nwóó mɛ̨n, 'ka ka wəli tɔɔ a nɛlɛɛ, ka váá woo mɛ̨n;

²⁴ Akɛtii, tíi kɛmun a kɛ bɔ ə mɔ̨nun ɉɔlɔɓo, yələ kəlee lɔ ɓə mɔ̨ɔ̨ a kɛ la kɛɛhin mɛ̨nį hu, yɛ kɛɛhin, yɛ gbɛɠɛ̨n?

²⁵ Kɛlaa a nąą pɛli kɛa, a mɔ̨nun ɉuwu pili laa, ə kpai hin ɉu, yili pulu ə hɛn da kpɛli hin kɛa ɲɛa laa ɓa.

²⁶ Yaan bələi mąąnɛ̨ɛ̨ ə gɛ la, nwɔ Yálái ɓə a bələ lɛ mą; yɛ mąąkwɛli mą.

²⁷ Di hva mɔ̨nun ɉiɠɛ a mɔ̨nun gɛlɛ gbɔn, Kɛlaa, da mɔ̨nun gɛlɛ a gbɔn, diɛ kpai wɔlɔɔn mą.

²⁸ Da mɔ̨ɔ̨ kpai lɛɛ gbaɠa ɓa diɛ ɉiɠɛ? Kpaa-o! Da gbɛa nwɔlɔ mą a di yee, yili pulu, diɛ ɉiɠɛ.

²⁹ Mɛ̨nįɠaai tii kəlee di həɠə Yai-Laa Mɛ̨nį Kəlee ŋą Hééɓomun pɔ, yai gaa a liɛwoo kɛmunn nɛlɛɛ, mɛ̨nį kəlee kɛ kpaɠala ə ɓo mą.