Azaya 27 - Yálá laawoo hɛɓɛ (dc)

¹ Nąąlɔwai, Yai-Laa kaa pai nwɔɔ tooi ɉu, a nwɔ kɔ́ kɔ ɓɔwa ɲąąliɛi, gɛnɛ̨, vaŋą kɛnɛ̨; yɛ hvilɛn na Leviatan pulu, yai a gaalə kɛnɛ̨i, a gaalə hu kpəlaan-gbəlaanŋąąi; gaa pai gboloyá hu Gbaatow-gbonoi tii paai.

Yai-Laa da nwɔ tíi

² Nąąlɔwai tii, ka wələ too díi lɛlɛɛi ɓa!

³ Ɲą́ą́, Yai-Laa, ɲą́ą́ ɓə ɲɛ̨́i kɛi mą, gɛ́ ya pu mą a yələ kəlee; ŋą́ yíi mąą kpɛi, gɛ́ túwɔ́ ɉu, ə gɛ nu hvo pa nəi lɔ laa.

⁴ Níi hvo kɛa holi li; ŋą́ ɲąąlən gaa laa, da kala kpili, ŋą́ą́ mą yili diɛ a kɔ́, gɛ́ gəlee kələn.

⁵ Kɛlaa nui a gɛ́ a mąąkpɛmun, kwa yaa kwa liilaa mįnɛ̨ həɠə, kuɔ yɛnɛ̨ɛ̨ kɛ liilaa hu.

⁶ Voló yiɠaai pai pai, Ɉakɔbə hamuɠaa kaa pai ɓɔn ɉi, Israɛlə kaa pai powai, dɛlinŋąą diɛ kulɔ, gaa pai yɛnɛ̨ɛ̨ laa hvɛɛi a ma.

⁷ Ə di kɛlɛ mɔ̨ɔ̨ yɛ bələi ə di kɛlɛ-nuą kɛlɛ lai? Ə di paa mɔ̨ɔ̨ yɛ bələi ə di paa nuą paa lai?

⁸ Ə di kiti tee, a di kpɛi ə mo, di kulɔ nɔi hu, ə di kpɛ a nɔ̨ɔ̨ hvaŋą, a gbooyee hu hvaŋą tɛɛi tɔ̨nɔ̨

⁹ Bələ ɓə Ɉakɔbə nwɔ nɛ̨ŋɛ̨n kaa pai waai laa mą; mąąhvaalɛɛi di mo, bələ ɓə dɔlɔ kaa pai kɛi la, gaa pai ɉaláá kulɔi kwɛniɠaa hon ɉii, yɛ kwɛni a kɛ a gələn ŋąą da ya pu mą; di hva kɛa ɉaláá wuluɠaa da hvóló mąą nįnįnŋąą haŋą di hvo dɔɔ.

¹⁰ Daai tii mąątínɛ̨n ŋąą, gaa pai lɛɛi dɔ̨nɔ̨ kon ɉu, a taatɛlɛɛɠaa laamįi kpomó, nɛɛi gbɔwɔ ɓa yɛ lɔi pun, nįŋɛ̨ lon gaa pai pai yɛ naa mįi laa; yɛ laa laa, yɛ wulu laaɠaa mįi.

¹¹ Ɓɛlɔwai nwulu woŋoɠaa da kpala la, nɛ̨ą da pa di nwɔ̨n naa ɉu, a tɛ̨ą, kili hvo nu huwui ŋɛ̨i ɓa; ya ɓə gɛi, nui di pɛli, hva di mąąwɛli kaa. Nui di kulɔ hva di ɲɛ̨imąąwɛli kaa.

Gɔ luwuɔɠaa kaa pənəi diɛ pa

¹² Mąą yələ, Yai-Laa kaa pai nwɔ mɔ̨nun kɛlɛi, ə həɠə Eufratə ya ɓa, ə həli la Eziptə yai ɓa, kaa ɓə di kaa pai ka həɠəi ɉu, yɛ ka həɠə ɉu tɛitɛi, kaai a Israɛlə lonnii.

¹³ Mąą hvólói, túlu kɛnɛ̨ woo kaa pai tɔɔi, nuąi kɛ daa pili, di kaa pai həɠəi Asiri lɔi hu diɛ pa; da nuąi ta di di kpɛ Eziptə lɔi hu, di kaa pai pɛlɛi Yai-Laa lííla, ɲee mąąhəɠɛɛ nwuɔ̨ Ɉerusalɛmə.