Azaya 24 - Yálá laawoo hɛɓɛ (dc)

Lɔi kaa pai lɛɛi a gboloon

¹ Ka kɛɛ kaa! Yai-Laa kaa lɔi hu kalai, yɛ nɛɛ a gboloon, gaa lɔi mɛ̨i hɛnŋąą kalaɠalai, yɛ ɉu hee ɓo nuą taɠa taɠa.

² Ɉaláá laa həli nuą, da nɔi lonnii, luwɔ nąmu, da nwɔ luwɔi, luwɔ leenɛ̨ą, da nwɔ luwɔ nɛ̨ɛ̨nu, lɔwɔtɔɔmun, da lɔwɔtíɲɛ̨ yamun, hiɲɛ̨n gɛmun, da hɛn nąmu, kwələ tɔɔmun, da kwələ həɠəmun.

³ Nɔi hu aa kala kpɔ tɛ̨ɛ̨ tɛ̨ɛ̨, di ɉu hɛnŋąą kəlee həɠə, di nɔi kulɔ bihɛi, yɛ bələi Yai-Laa ə mo la.

⁴ Lɔi kaa wɔlɔi, ɉu yɛ kala, yɛnɛ̨ɛ̨ kəlee kaa kulɔi nwului, ɉu yɛ kala, lɔi mɛ̨i hee ɓo nuą lɔwai, nu kpɛa kpɛa kaa kulɔi di wului.

⁵ Nɔi nuą ɓə, nɔi kɔ́hɔɓoi, mąąhɔlɔɓo, daa dɔ́n nwooɠaa lɛɛ laa, di hvo díɓoɠaa kɛ li, mįnɛ̨i di ɉəɠə a yələ kəlee mɛ̨nį, daa nɛɛ laa.

⁶ Yili ɓə gɛi nɛ̨ŋɛ̨nnaa yɛ nɔi kala, nuąi nɔi mɛ̨i, diɛ ɓə ɉu mɔ̨nɔ̨ mįi. Yili ɓə gɛi yɛnɛ̨ɛ̨ nuą diɛ kələn, daa lɛɛ lɔ kɛa ɠɛlɛɛ-ɠɛlɛɛ.

Daa mąą wɛliɛ, lɔɔ hvo kɛa laa, kwəinɛ̨ɛ̨ hvo laa

⁷ Haa aa too nɔɔ nįnɛ̨ ɓa, viɲə kpɔlɔ kaa kpalai, nuąi kɛ yɛnɛ̨ɛ̨ ɲąąnɛ̨ɛ̨ hu, diɛ ɲiŋɛ̨.

⁸ Dulu woo nɛ̨ɛ̨ɠaa di hvo kɛa tɔɔi, ɉɛli pu nuą tín aa kpɛla mą, gwɛnįn nwoo nɛ̨ɛ̨ hvo kɛa tɔɔi.

⁹ Di hvo kɛa wələ tooi lɔɔ mɛ̨i, diɛ gbələ, nɔɔ kpəɠiɛi aa nwąną gbələ nuą la.

¹⁰ Daa hvowoloi aa too, bɛlɛ kəlee laa kpuloɔi, nu hva pɛli lɔi da mu.

¹¹ Di kaa lɔɔ kwɛlii gwəliɠaa pɔ, kwəinɛ̨ɛ̨ mɛ̨nį kəlee aa kpɛɛ, kwəinɛ̨ɛ̨ kəlee aa kpɛɛ nɔi.

¹² Mɔ̨nɔ̨ kɛnɛ̨ lɔ ɓə kɛa daa kwəi, daa kpon aa kala, yɛ too.

¹³ Nɔi hu, nɔi lonnii lɔwai, gaa lɔ yɛ olivə kpan ɉu kwɛliɛ, yɛ da kɛi mɔ̨nun gban ɉu kwɛli, mɔ̨nun deɛ pulu.

Gu Nąmu Laa tɛ mɛ̨nį nɔi kɔ́lɔ kəlee

¹⁴ Yiiɠaai tómąi a di woo kɛnɛ̨ di kaa Yai-Laa laa mąąwɛi. Di kaa pilii yələi gboloyá kwɛlɛ pələ.

¹⁵ Di kaa Yai-Laa mąąwiɛi hvóló mɛlai pələ, diɛ Yai-Laa, Israɛlə nwɔ Yálái mąąwiɛ, gboloyá hɛ̨ąi lɔiɠaa hu.

¹⁶ Ku kaa wələ woo mɛ̨n ɉi, yɛ həɠə lɔi kpɛlai pələ, yɛ kɛ diɛ: «Ɓáá ə lɔ təlinmo Yálá ɓa.» Ya ɓə ŋą́ kɛ diɛ: Ŋą́ą́ kpɔlɔɔn! Ŋą́ą́ kpɔlɔɔn! Nwún na ɲɔ̨nwɔ̨ɔ̨i, ɲaba lɔ nuą daa ɲaba lɔ mą́ą́. Ɲaba ka, ɲaba lɔ nuą daa ɲaba lɔ kɛnɛ̨.

Nu ta hvo pai kulɔi Yai-Laa yee wolo ɓa

¹⁷ Ɲɔw, lɔwa, da ɓaalə, yili ɓə gaa a yɛ́i a nɔi lon ə́ wɛi.

¹⁸ Nui pai pui mąąɲɔw woo tɔwɔ, a too nowa hu, nui pai kulɔi nowa hu, a kɔ́ a maalə. Yələ kpon aa tee, lɔi kɔ́wɔ hvilɛn ɉiiɠaa diɛ kpɛlin.

¹⁹ Lɔi aa ɓɛla ɓɛla, lɔi yɛ taɠa taɠa a gbuɔ kpuɔ, lɔi hiɠi-híɠi aa ɓo kpɔ a nwala nwalaa.

²⁰ Lɔi kaa tɔɔi takpa takpa yɛ lɔɔ hon, aa hviyɛn yɛ hə́lə́kpuwulu, nwɔ nɛ̨ŋɛ̨n aa wiɛ mą, a too, hva pɛli muhəɠəi.

²¹ Mąą yələi tii, Yai-Laa kaa pai nwoo tooi ɉu, yɛ tɔɔ yələkwəi kɔlaɠaɠaa la yələ, ɛlɛɛ, lɔi mɛ̨i pələ, yɛ tɔɔ lɔi mɛ̨i tɔɔɓɛlaa la.

²² Di kaa pai di pui di kee mɛ̨i nowa hu, di ɓo a luwɔɠaa; diɛ di lɔ gaho ŋą, ɛlɛɛ, ɉu a kwɛa, di di kiti tee.

²³ Ɲąnįn ɲɛ̨i mąą kaa pai wɛlii, nwumɛ̨ ə tɛ a hvóló, a tɛ̨ą, Yai-Laa Mɛ̨nį Kəlee ŋą Hééɓomun ya ɓə tɔɔlaa kɛi Siɔn yee nwuɔ̨; da Ɉerusalɛmə daai, nwɔ mąąwiɛ hu galanɉonŋąą ɲɛ̨i ɓa.