Azaya 23 - Yálá laawoo hɛɓɛ (dc)

Tirə mąą mɛ̨nį

¹ Mɛ̨nįi kponąą di mo yɛ hvilɛn Tirə ɓa, ya ka: 'Ka gboo təli, Tarsisə ya ɲą kələnŋąą, mąąhɔlɔɓo, daa ka wɔ taai wolo! Pɛlɛ́ hvo kɛa laa! Kələn dɔɔi hvo kɛa laa! Di kɛɛ həɠəi Siprə lɔi hu pələ ɓə di kulɔ la mɛ̨i.

² Gboloyá hɛ̨ąi lɔi hu nuą, 'ka tɔɔ tín a ɲɔw, kaai Sidɔn yɔw kɛ nuą da kɛ tɛɛi gboloyá ŋą, diɛ hɛnŋąą tɛɛ ka pɔ.

³ Ɲá kpɛa kpɛaɠaa, Nilə kwɛlɛ tíiɠaai, ɲá kɛnɛ̨i kwɛlɛ mɔ̨nunŋaa, diɛ ɓə kɛ a ɉɔlɔɓo hɛnŋąą; Lɔiɠaa di wɔ lɔ́wɔ́-taa kɛnɛ̨ li kɛ.

⁴ Nwumɛ̨ aa tɛ a yɛ́, Sidɔn, gboloyá kwɛlɛ taa walawala! Gboloyá kaa kɛi diɛ: «Və́ kwəinwąną kɛ li, və́ lon gaa li, və́ lon ɉinąą kulɔ li ɉu, və́ lon nɛ̨ąą ɲąąkɔn ni.»

⁵ Eziptə a pa Tirə mąą mɛ̨nįɠaai tii mɛ̨n ɉii, mąą kaa pai kpɛlin ɉi

⁶ 'Ka gboloyá teen, ka həli Tarsisə; 'ka gboo təli, gboloyá hɛ̨ąi lɔi hu nuą.

⁷ Akɛtii Ka wɔ taai, a gwəinɛ̨ɛ̨ kulɔ taai, ya ɓəi? A yai wɔlɔ daa dɔɔ ɉu aa kwɛai, ɛlɛɛ, yɛ li kwɛala lɔiɠaa hu, yɛ hee nąą mɛ̨i?

⁸ Gbɛɛ ɓə mɛ̨nįi tii mąą nwun dɔɔ kɛ a Tirə laa? A Tirə ŋɛ̨i kɛi tɔɔɓɔ́lɔ́ɠaa ɲąąkwɛlɛ? Tirə nwɔ yɔwɓɛlaa di kɛ a lɔi ɲąąwooɓo nuą, nwɔ lɔwɔtɔɔ nuą di ɓo a lɔi mɛ̨i nu kpɛa kpɛaɠaa

⁹ Yai-Laa Mɛ̨nį Kəlee ŋą Hééɓomun ɓə, yili mąą kili tee gwəi, ɉɛnŋąąi diɛi tii da di mąąwiɛ, yɛ di wɔ kpɔwɔ ɲąą kɛnɛ̨ ɲɛ̨i paa yɛ ɓɛlɛkpɛɛ lɔi mɛ̨i nu kpɛa-kpɛaɠaa diɛ.

¹⁰ Tarsisə nɛ̨ɛ̨gbɛla, yɛ́ lɔi dɔlɔ kulɔ, a ɲəi kwɛaa, yɛ bələi Nilə kaa la, mąąhɔlɔɓo, yá ɲą kələnŋaa tɔɔi hvo kɛa laa.

¹¹ Yai-Laa aa gboloyá kɛlɛ a vaŋą, aa tɔɔlɔiɠaa hu kpɛlin. Yɛ Kanaan ɓa, ə́ wɔ kɔ́taaɠaa pu.

¹² Yɛ diɛ: Sidɔn nɛ̨ɛ̨gbɛla, daa hee ə́ mɛ̨i, hvá kɛa kwəinɛ̨ɛ̨ kulɔ. Ə́ muhəɠə, 'li Siprə pələ, ə mą kɛ nąą ɓə, hvó pai hvįįtɔɔ hɔlɔɓoi laa.

¹³ Ə́ ɲɛ̨i hee Kalde lɔi ɓa: nu huwu tii hvo kɛa yɛnɛ̨ɛ̨. Asiri aa nąą kɛ a lɔwɔɲąąleeɠaa taa ŋą, daa kɛ daaɠaa mąąkpɛ pɛlɛ́ɠaa tɔɔ, daa hįįɠaa tɔɔ diɛ; Asiri aa nąą lɛɛ a huwɔ hu.

¹⁴ 'Ka gboo təli! Tarsisə yá ŋą kələnŋąą, mąąhɔlɔɓo, daa ka wɔ kɔtaa wolo.

¹⁵ Nąąlɔwai da lɛ̨ą Tirə ɓa, kwɛlan bow mɛ̨ihveelɛ yee mu, yai a tɔɔmun dɔ̨nɔ̨ ŋą. Gwɛlan bow mɛ̨ihveelɛi tii a tɛɛ, mɛ̨nįi nwələwoo ə mo yɛ hvilɛ na nwɛlikɛ nɛ̨ɛ̨nui ɓa, yili a həli Tirə ɓa; yai ə kɛ mą:

¹⁶ 'Gwɛnįn ɉəɠə, ə́ daa mąą tínɛ̨n, yɛ́i a hinąą kəlee di nɛ̨ą, yɛ́i daa lɛ̨ą yɛ́i. 'Vɛli kɛ a ə́ nwąnąi, bənə ə́ ə́ wɔ wələɠaai too, ə gɛ ə́ kili ə too nuą ŋą.

¹⁷ Kwɛlan bow mɛ̨ihveelɛ a tɛɛ, Yai-Laa kaa pai Tirə mąą mɛ̨nį ɲɛ̨i kulɔi, ə pənə ə nwɔ yɔwii kɔ́wɔ tɔɔ, ə pənə nwɔ̨nɔ̨ yɛ gbɔwɔ kɔ́lɔ lɔwɔ́tɔɔ yɛnɛ̨ɛ̨ tɔɔlɔiɠaa kəlee diɛ.

¹⁸ Kɛlaa ɉɛn a ɉɔlɔɓo, da dɔlɔɠaa, da gəlee laakwɛlanmo Yai-Laa ɓa; di hva di ɲąąkpɔn gee ɓa, di hva di pu gee mɛ̨i. Ɉɛn gɔwi tii kəlee da kɛ a, nuąi heeni Yai-Laa lííla, di kɔ̨nɔ̨n, diɛ pilə ɉu, diɛ həɠə lɛlɛɛɠaa hɔlɔɓo ɉu a lamun ɉəɠəɠaa.