Azaya 22 - Yálá laawoo hɛɓɛ (dc)

Ɉerusalɛmə kwəinɛ̨ɛ̨ hɛn lɔpee ta hvo lɛɛ li ɲəi

¹ Mɛ̨nį kponąąi di mo yɛ hvilɛn ɉíįn kaa ɓoloon ma ya ka: Lə ɓə kɛ yai, ká ə́ wɔɔ nuąi kəlee ka káá ka ɲąą kpɔn ɉi ɲələi pɛ́lɛ́ ɲįmąn mu?

² Kaa daa kwəi tin gulɔ lɔ, nu kəlee yɛ gɛ lɔ ɲɛnɛ̨ɛ̨ ɉuwu-ɉuwu, daa kəlee ə ɓo kwəinɛ̨ɛ̨ hu, lə ɓə kɛ? Ə́ wɔ nuąi daa haa, di hvo haa li a kɔ-kɔ-ɓɔwa laa pɔɔ, di hvo di paa li kɔ́ hu.

³ Ə́ wɔ kɔ́ ɲɛ̨itɔwɔ nuą kəlee daa pu, daa di hon a kɔluwɔɠaa, di hvo mąn kilɛn ɲąą lɔwa li diɛ, nuąi kpɔ di di kaa, di gəlee hon a kɔluwɔ, ya pa daa kɛ pu kpɔ daa li kwɛala.

⁴ Yii hu kɛa, gáá kɛi kaa: ka ka ɲɛ̨i həɠə mą́ą́, ŋį́ wɔlɔ kpɔ a ɲąąnwąnąą, ka hvo tɔɔ kaa kɛ, ka káá ɲɛ̨́i kpalai, nwɔ́ lɔi hu nɛ̨ɛ̨gbɛla, hu kala mɛ̨nį ɓa.

⁵ Mąąhɔlɔɓo, Nąmu Yai-Laa Mɛ̨nį Kəlee ŋą Hééɓomun aa yələ ɲɔwɔ̨ɔ̨ laa ɓɔ ku mɛ̨i, a ɲɔw kɛnɛ̨ nwɔ yələ, a nuą pu yələ, nu hu yɛ pu mą, Ɉį́į kaa ɓoloon ŋą hįį kpoloon ta aa pu, tómą woo yɛ tɔɔ ɲee nwuɔ̨.

⁶ Tonwą-taɠa kaa Elamə yəi, ə ɓo la wotoloɠaa hu, hooɠaa diɛ ɲala, Kirə yaan aa mąą kpɛ hə́mə́ həɠə.

⁷ Ə́ wɔ nɛ̨́ŋɛ̨ lɛlɛɛɠaai, laahvɛɛi a kɔ́ kɔ́ wotoloɠaa, gɔ́ kɔ́ wotoloɠaa daa di tɔɔi kulɔ ɉį́i laɠaa.

⁸ Daa Ɉuda mɛ̨ikpuluhəɠə kulɔi mɛ̨i. Mąą yələ, bɛlɛ́i ɲɛ̨i kɛ nwɛla hu pələ, ya ɓə ka ɲɛ̨i həɛi kɛ mą, ɓɛi gɔ́ kɔ́ hɛnŋąą kaa laa.

⁹ Ka káá gaai, daa wolo tamąą tee, daa Davidə nwɔ taaleei mąą tinɛ̨n na. Kaa ya tiɛ̨ ɓɛi da ɲá pu laa, ɉɛɠɛɛ pələ, mɛ̨i kaa mɛ̨nį ɓa.

¹⁰ Kaa Ɉerusalɛmə pɛlɛ́ɠaa lonon, kaa pɛlɛ́ɠaa pu, kaa daa mąąkpɛ hįį huwiɛ a bɔlɔ kɔ́w.

¹¹ Kaa yá pui takpɛli pɛli ɉį́i hveelɛi lɔwai, a ɲa pui pɔlɔ pɔlɔ mąą hvalin. Kɛlaa nui a mɛ̨nį kəlee ɲɛ̨i kulɔ, ka hvo ka ɲɛ̨i hee li bɔ pələ, nui wɔlɔ aa pɛlɛ mɛ̨nįɠaai tii kəlee kɛɛ ɓa, ɉu aa kwɛa, ka hvo gaai.

¹² Mąą yələi tii, Nąmu Yai-Laa Mɛ̨nį Kəlee ŋą Hééɓomun, ə kɛ bɔ kɛ, ka wɔlɔ, ka ka woolaa, ka ka nwun gbəlaan mo, ɛlɛɛ, ka mąąwɛli hee ɓo.

¹³ Ya ɓə, ka tɔɔ kaa kwəinɛ̨ɛ̨ kulɔ, kaa hɛli pu! Diɛ nįŋɛ̨ɠaa paa, diɛ ɓɛlaaɠaa nwun dee, diɛ huwɔ mįi, diɛ lɔɔ kpələ, kaa kɛ diɛ: ka gu gu laa mįi, ka gu gu kpələ; mąąhɔlɔɓo, gwa tínąą haa.

¹⁴ Yai-Laa Mɛ̨nį Kəlee ŋą Hééɓomun, yai ɲee a pɛli mɛ̨nį kəlee ɓa ə mɛ̨nįi ŋɛ̨i ɓo mą́ą́, yɛ mą́ą́: Nɛ̨ŋɛ̨n tii hvo pai kulɔi kaa a yələ ta, hvo kɛli ka haa. Nąmu Yai-Laa Mɛ̨nį Kəlee ŋą Hééɓomun, yai ɲee a pɛli mɛ̨nį kəlee ɓa aa gwɛla.

Mɛ̨nįi di mo Sevna ɓa

¹⁵ Nwooi Nąmu Yai-Laa Mɛ̨nį Kəlee ŋą Hééɓomun ə mo, ya ka, yɛ mą: 'Li nɔi ɲąąwooɓomun Sɛvna pɔɔli, yai dɔɔ pɛlɛ́ nwun na, yɛ́ mą:

¹⁶ Lə ɓə ɓɛ ə́ yəi? Ə́ kaayɔwɔ nɛlɛɠaa ɓə ɓɛ, yai ə́ kaa kámą teei ɓɛ, yɛ́ ə́ kámą tee ɓɛ ɲee nwuɔ̨, yɛ́ wolo ɓɔ gwɛni hu, ɓɛi da tínąą ə́ laai pɛli laa?

¹⁷ Ə həli kani yɛ́, laŋąlon nɛlɛɛ, Yai-Laa kaa pai ə́ kpinįn gɛi yɛ ə́ pili kpɔ poɠo-poɠo.

¹⁸ A ə́ pili, yɛ́ kiliɠilin yɛ hɛn gbuɠulu, yɛ́ li lɔi pun gɛnɛ̨ hu. Nąą ɓə ə́ kaa pai haai laa, ka gɔ́ kɔ́ wotoloɠaai kɛi ə́ mąąwiɛ, ɛlɛɛ, di ɓo a ə́ nąmu ŋą pɛ́lɛ́i, mɛlɛ kpɛɛ mąą hɛnŋąą.

¹⁹ Gáá pai ə́ kpɛi ə́ wɔ kolói hu, ŋį́ ə́ tɔɔi kulɔi ə́ yəi.

²⁰ Mąą yələi tii, gáá pai ŋį́ tímun, Ɛliakimə təlii, yai a Hilkiyahu lon.

²¹ Gɛ́ ə wɔ həɠəi too gwąną, gɛ́ ŋą gbaawii hɛ̨ą yili, a ə́ wɔ hɛ̨ą yili kɔ́lɔi, gɛ́ ə́ wɔ huwalawalai tɛɛ bɔ. Gaa pai kɛi a Ɉerusalɛmə nuą di nąn da Ɉuda nwɔ pɛ́lɛ́i nąn.

²² Gáá Davidə nwɔ pɛ́lɛ́i gwɛli laai ɲee ŋą, a naa ɓo, nu ta hva pɛli naa kpului, a naa kpulu, nu ta hva pɛli naa ɓoi.

²³ Gáá pai gbanwoi yɛ wulukpiɛn, lɔi wala wala hu yɛ kɛ a nąn nwɔ pɛ́lɛ́i ɲɛ̨i pɔ̨nɔ̨ tɔɔkpəlin.

²⁴ Nąn nwɔ pɛ́lɛ́i kəlee a kɛ a ɉɛlɛnŋąą mą, mu hɛnŋąą kəlee, gbɛa kpɛa da bɛlɛɛ pɛlɛɛ, ɉɛnɲąŋą pɛlɛɛ pɛlɛɛ kəlee, ə həɠə ɲá haɠa gbamąɠaa diɛ, ə həli la ɲa ləɠiɠaa diɛ.

²⁵ Mąą yələi tii, Yai-Laa Mɛ̨nį Kəlee ŋą Hééɓomun, yɛ diɛ: Nwulukpiɛi tii ŋį́ gbɔn kɛɛnąą wala wala ɓa, gaa pai ɓəleen ɉii, ɉu ə yali, ə too, ɉɛnŋąąi kpɔ tii kɛ di hɛlɛnŋąą mą, gəlee hu a kala, mąąhɔlɔɓo, Yai-Laa ɓə mo.