Azaya 21 - Yálá laawoo hɛɓɛ (dc)Babilonə too mɛ̨nį 1 Mɛ̨nį kponąąi di mo gboloyá kwɛlɛ lɔi pun naa mɛ̨i, ya ka: Bələi lɔ tulɔ hvaŋą a tɛɛ la Negɛvə lɔi hu, bələ lɔ ɓə kɔ́ kaa pai həɠəi la nɔi pun mąą ɲɔwuɔ hu pələ. 2 Mɛ̨nį kponąą ta ka ŋɛ̨i, di nɛ mą́ą́ hįi pələ. Pulu kulɔmun, yɛ pulu kulɔ mɛ̨nį kɛ, kɛɛ kalamun yɛ kɛɛ kala. Elamə nuą, 'ka tɛ! Medi nuą, 'ka ka wɔ kɔlaɠai pɛlɛ! Gáá woo laa wooɠaa kəlee kpɛɛi. 3 Ya ka ŋɛ̨i níí kəlee kaa kpɛlin ɉii ɉú, mɔ̨nɔ̨ aa wolo mą́ą́, yɛ́ kwəinwąną a wolo nɛ̨ɛ̨nu ɓa, yɛ mɔ̨nɔ̨ mįi, mɛ̨nįi gáá mɛ̨n ɉii, aa ɉú pu mą́ą́, gɛɛi gáá gaai, aa vínnaton. 4 Ɉú aa pu mą́ą́, mą́ą́ yɛ kpɛlin a ɲɔw, yələwulii pɔ hvaŋą laɠii gíli ə kɛ mą, aa mąąpənə ɲə́i a mąąɲɔw hɛn. 5 Daa kɔ̨nɔ̨n bɛli, mąąkpɛ kɛ nuą, kaa mąąkpɛ kɛi, nuą diɛ di laa mįi, diɛ di kpələ, 'ka ka muhəɠə, yala nąmįną, ka gɔ́ kɔ́ hɛnŋąą pɛli. 6 Mɛ̨nįi Yai-Laa ə mo mą́ą́, ya ka, yɛ mą́ą́: «'Li, ə́ mąąkpɛɛ kɛmun dɔɔ, yɛ bələi kaa, yii a gaa, ə mo. 7 A kɔ́ kɔ́ wotolo kaa hoo hveelɛ diɛ ɲala, nu ta ə ɓo hoohvaalən mɛ̨i, nu takpɛli ə ɓo ɲɔ̨nwɔmɛ̨ɛ̨ mɛ̨i, ə gɛ kpɔ a nɛlɛɛ, ə nąą mąąkpɛɛ!» 8 Gɛɛnąą mąąkpɛɛmun aa tómą, yɛ kɛ diɛ: Ną́mu, ŋą́ túwɔ́ tɔɔni dɔ́ɔ́i, gɛ́ bələi kaa, ŋį́ yíi tɔɔni dɔ́ɔ́i, gɛ́ bələi kaa. 9 Ɉɛn pai ya ka: Nu ta kaa wotolo hu, hoo hveelɛ diɛ ɲala, ə pələ pili mą́ą́, yɛ mą́ą́: «Aa too! Aa too! Babilonə aa too! Nwɔ hali mąą nįnįnŋąą kəlee kaa nɔi ɓa, di hu aa yali.» 10 Yɛ́i ŋɛ̨i Ną́mu aa ə́ tan, yɛ bələi da mɔ̨nun dan na, mɛ̨nįi ŋį́ mɛ̨n, yɛ kulɔ Yai-Laa Mɛ̨nį Kəlee ŋą Hééɓomun la, yai a Israɛlə nwɔ Yálá, ya ka ŋɛ̨i gáá ɉukulɔi yɛ́. Edɔmə mąą mɛ̨nį 11 Mɛ̨nįi kponąąi di mo a Duma laa, Woo kɛnɛ̨ ta kaa tɔɔi nwə́lii, yɛ həɠə Seirə pələ, yɛ kɛ mą: «Taa mąąkpɛmun! Kpini aa həli mį? Taa mąąkpɛmun! Kpini aa həli mį?» 12 Daa mąąkpɛmun yɛ mą: «Yələ kaa ɓɔi, kpinį yɛ nwɔ̨nɔ̨ pɛlɛ. Ka kɛ nwɔ̨nɔ̨ bɔ ka kɛɛ mąąnin gɛ, 'ka pənə ka pa.» Mɛ̨nįi hvilɛn Arabə lɔi ɓa 13 Mɛ̨nį kponąąi di mo a Arabə lɔi laa. Ka káá líi yíi Arabə nwɛla hu, Dedan hiɛ kulɔ nuą. 14 Tema lɔi hu nuą, nui kpələ wɛli kaa mą, 'di naakwiɛn a yá, nui tii pui, 'di naakwiɛn a kɔ̨nɔ̨n, 15 mąąhɔlɔɓo, di kɛi pu kɔ́ kɔ́ ɓɔwa tɔwɔ, diɛ həɠə kɔ́ kɔ́ ɓɔwa ɲąąliɛ tɔwɔ, kilɛn daa ɲala ɉu, di kɛi həɠə ɲɛ̨i tɔwɔ, gɔ́ ə hviyɛn di mɛ̨i. 16 Mɛ̨nįi Yai-Laa ə mo mą́ą́, ya ka, yɛ: Aa lɛɛ a kwɛlan dɔ̨nɔ̨, kpɔlɔ a kwɛlan dɔ̨nɔ̨ ɲąąkpalaa Kedarə mąąɲįnɛ̨n, ɉu yɛ kala. 17 Ɛlɛɛ, Kedarə nwɔ kilɛn bili nuą, dɛi tɛi lɔ ɓə pai lɛɛi; Yai-Laa Israɛlə nwɔ Yálái ɓə mo. |