Azaya 2 - Yálá laawoo hɛɓɛ (dc)

¹ Nwɛlɛɛi Yai-Laa ə mo Amɔsə lon Esai ɓa hįį pələ, yɛ hvilɛn na Ɉuda lɔi da Ɉerusalɛmə taa ɓa, ya ka:

Nu kəlee pa mɛ̨nį Ɉerusalɛmə daai

² Gaa pai kɛi a yələ ta, gbukpui ɲɛ̨i Yai-Laa hee pɛlɛ́ kaa mɛ̨i, gaa pai kɛnɛ̨i, ə tɛɛ ɲeeɠaa diɛ, nąąlɔwai, hį́i kəlee kaa pai pai bɔ.

³ Lɔi tamąą hu nuą kaa pai pai bɔ, di kaa pai kɛi diɛ: «Ka tɛɛ, gwə li Yai-Laa nwɔ yee ɓa, Ɉakɔbə nwɔ Yálá nwɔ pɛ́lɛ́i mu, ə gu kalan a mɛ̨nįi mąąnɛ̨ɛ̨ gu gɛ, kpaalə yii a vaa ɓo, gu tɛɛ la.» A tɛ̨ą, Siɔn daai ɓə Yai-Laa nwɔ tɔ́n nwoo ə həɠə laa, A tɛ̨ą, Ɉerusalɛmə daai ɓə nwoo a həɠə laa, yɛ həli guɔ.

⁴ Ya ɓə pai hį́i kəlee yee lɔi gee hu, ya ɓə pai nuą lɔwai mɛ̨nįɠaa hutɔɔi, di wɔ ɓɔwa kwɛaɠaai ɓə gaa pai bɛlɛi gee ɓa, di gɛ a kali, di wɔ kpalaɠaai ɓə di kaa pai gɛi a mɔ̨nun dee kɛlɛlɛ, lɔi ta hva kɛa kɔ́ pɛlɛ mɛlan ma, lɔi ta hva kɛa kɔ́ kɔ́ɔ mąą kwɛli.

⁵ Kaai ɓaa a Ɉakɔbə nwɔ pɛ́lɛ́i, 'ka tɛɛ ka gwə li, ka gu bɛlɛ gee ɓa, gu hiɛ Yai-Laa nwɔ kɛɛ pɔ̨nɔ̨i hu.

Yálá nwɔ kiti tee hvóló

⁶ Yálá! Yáá lənə ə́ wɔ nu huwui ɓa, diɛi ɓaa Ɉakɔbə nwɔ pɛ́lɛ́i, mąąhɔlɔɓo, nɔiɠaai ɲɛ̨i vóló həɠəi pələ, di túwɔ́ pələ ɓə gaa di yee pɔ. Bələi lɔ tɔlukpɛ mɛ̨nį ka laa Filisti nuą yee pɔ, bələ lɔ ɓə ə́ wɔ nuąi da gɛ la, ə́ wɔ nuąi da hį́i takpɛliɠaa da kɛ mɛ̨nįɠaa tɛɛi gee pulu.

⁷ Nɔi, laahvɛɛi a wali da hɛni, ɉɛn gɔw ɲɛ̨n deei hvo mą. Nɔi laahvɛɛi a hoo, nwɔ wotoloɠaai lonon və mą,

⁸ Nɔi laahvɛɛi a haliɠaa, ɉɛnŋaa tii diɛ kpinįi di bɛli a di yee, diɛ kwɛli hvilɛn mą.

⁹ Nu kanŋaa kaa pai pɛlɛi, nuą di di mąą yɛɛ, di di laa pɛlɛɛ pɔ́lɔ́ ɓa! Hvó pai di mąą hvaa lɛɛi.

¹⁰ Ka ka loo kwɛniɠaa mu, ka lɔ lɔi mu, ə gɛ ka həɠə Yai-Laa nwɔ liiɲąnwąną tɔwɔ, ka həɠə nwɔ nwąną kulɔ vaŋą tɔwɔ.

¹¹ Kpɔwɔɲąą kɛnɛ̨ nuą, mąą a yɛɛ, ɲɛ̨itɛ nuą di kwɛli hvilɛn, a mąą yələi tii, Yai-Laa yaa tɔ̨nɔ̨ gbən ɓə mąąwiɛ a kɛ mą.

¹² Yai-Laa Mɛ̨nį Kəlee ŋą Hééɓomun, aa hvóló ta həɠə ɉu, ə gɛ, ə kiti tee, nuąi da di kpɔwɔ kaa a nu kpɛa-kpɛa, di hunɛ̨ɛ̨, a di mąą yɛɛ.

¹³ Liban kpitiliɠaai, di kwɛa kwɛaa, da Basan wɛla, a gəlee kiti tee.

¹⁴ Nwɔ kiti a həli ɲee kpɛa-kpɛaɠaa da ɲee kpukpuɠaa diɛ, diɛi yeetɛɛmąą laa kaa di yəi.

¹⁵ A həli kpɔ daa mąąkpɛ ɉįi walawalaɠaa diɛ, da di mɛ̨i kaa pɛlɛ́ɠaa, diɛi nu hva kpɛli lɛɠɛ diɛ.

¹⁶ A həli, Tarsisə nwɔ ya ŋą kələn gbɛa-kpɛa diɛ, da ya ŋą kələn nɛlɛɛɠaa.

¹⁷ Nuą di wɔ kpɔwɔŋąą kɛnɛ̨ mąą a yɛɛ, nuąi di huɲąŋą kɛnɛ̨, da di laa pɛlɛi pɔlɔ ɓa. Mąą yələi tii, Yai-Laa yaa tɔ̨nɔ̨ gbən ɓə mąąwiɛ a kɛ mą.

¹⁸ Haliɠaai kpɔ da kwɛli hvilɛn diɛ, gəlee da lɔ gbąį.

¹⁹ Ka lɔ gwɛni woloɠaa hu, ka lɔwa tee ka lɔ ɉu, ə gɛ, Yai-Laa nwɔ liiɲąnwąnąai pai, ka pu ka həɠə dɔwɔ, ka ka mąąkilɛ nwɔ nwąną kulɔ vaŋąi tɔwɔ, ɓɛlɔwai gaa pai muhəɠəi la, lɔi hutɔɔ mɛ̨nį ɓa.

²⁰ Ɲələi tii a həli, ɉaliɠaai di bɛli a wali da hɛni, diɛ kwɛli hvilɛn mą, da nɛɛ kpəɠəiɠaa da lɔwɠaa di yəi.

²¹ Di ka pai kɛi lɔi kwɛni woloɠaa hu da kwɛni ɓɛlaɠaa mu, ə gɛ, di pu di həɠə Yai-Laa nwɔ liiɲąnwąną tɔwɔ, diɛ di mąąkilɛ nwąną kulɔ hvaŋą tɔwɔ, ɓɛlɔwai gaa pai muhəɠəi la, lɔi hutɔɔ mɛ̨nį ɓa.

²² Ka hvo ka kilitɔɔ nu ɓa, yai nwɔ yɛnɛ̨ɛ̨ ka lɔ nɔ̨w yəi, mɛlɛ kɛɛ nąą ɓaa mį?