Azaya 19 - Yálá laawoo hɛɓɛ (dc)Eziptə mąą mɛ̨nį 1 'Ka mɛ̨nį kponąą ŋɛ̨i laa həli Eziptə ɓa, 'kaa mą: Yai-Laa ka tii həəni tulɔ kpinįn gɔwɔ mąąhulaa mɛ̨i; yɛ pa Eziptə. Eziptə haliɠaa mąą kaa kpɛlin ɉii Yai-Laa tɔwɔ, Eziptə nwɔ liikpələ yɛ həɠeen gwəi. 2 Yai-Laa yɛ diɛ: Gáá Eziptə nuą ɲąątɛi di kee ɓa, nu kəlee yɛ kɔ́ pɛlɛ gaayɔwɔ ɓa, nu yɛ kɔ́ pɛlɛ mɛlan gaa lon ma, taa yɛ kɔ́ pɛlɛ mɛlan daa ɓa, lɔi yɛ kɔ́ pɛlɛ mɛlan nɔi ɓa. 3 Eziptə kili a kpɛɛ ɲəi, gɛ́ nwɔ kilikɛɲəi hu kala, di kaa pai kɛi di nwun dɔɔi a haliɠaa da kwɛlɛɛngɛ-nuą, diɛ ɲɛ̨ąkpɛ nuą mąąni kɛ, ə mą kɛ tɔlukpɛ nuą. 4 Ŋą́ Eziptə too ɲąąwooɓo kɛ nuą kili wala-walaaɠaa yəi, nwąnąlɔ tɔɔmun da a hee di mɛ̨i, Ɲą́ą́ Nąmu Yai-Laa Mɛ̨nį Kəlee ŋą Hééɓomun, nwóó li. 5 Gboloyá kaa pai kpalai, ɲá lee kɛnɛ̨i yɛ kpala. 6 Ɲá pɛlɛɛɠaa kun gaa pai tɔɔi, Nilə mąą a yɛɛ, yɛ kpala, veengbɔnɔ̨ɠaa da gbaliɠaa diɛ kpala. 7 Nilə kwɛlɛ kalatiliinŋąą, da ɓɛi a pu laa Gboloyá ɓa nąą kala tiliinŋąą, hɛn kpɔ a tiliin ɲá kwɛlɛ gəlee a kpala, di hu a kala, hɛn da hva kɛa kɛ laa. 8 Ɉɔ̨wɔ̨lee kpɛ nuą kaa pai di woo laai, nuąi da kwɛli pili Nilə hu, di kaa pai kɛi wɔlɔi, diŋɛ̨n bu nuą kaa pai kpalai. 9 Ganą hee nuą hvii kaa pai kpɛɛi, ɲee pɛnɛ̨ nuą da ɉəɠə pala nuą di ɲɛ̨i mąą a wɛli. 10 Nɔɔ pɛli nuą kwəi a pili diɛ, kpai lɔɔ pɛli nuą lii yɛ kələn di kwəi. 11 Tanisə ɲąąwooɓo nuą kili kpɛɛi kpɔ di yəi a neelee, Faraɔn nwɔ kalanɉonŋąąi, di kaa a nu tupɛ-tupɛ puɔ gii mɛ̨i; ka pɛli kɛi ləi Faraɔn ɓa: «Gáá a kili mąą mun, a tɔwɔ tɔwɔ tɔɔɓɛlaa yee pɔ mun da?» 12 Ə́ wɔ kilimąą nuąi kaa mį? Yai-Laa Mɛ̨nį Kəlee ŋą Hééɓomun aa mąą kili tee gwəi, yɛ hvilɛn na yɛ́, Eziptə, di mo kani yɛ́, ku nąą kaa. 13 Tanisə ɲąąwooɓo nuą kili kpɛɛi kpɔ di yəi tɛ̨ɛ̨ tɛ̨ɛ̨, Mɛmfisə ɲąąwooɓo nuą diɛ di kpɔwɔ ɓowo, di kaa pai gɛi Eziptə yɛ tɔɔ lɔ takpa takpa, diɛi tii a nɔi lonnii mąą mɛ̨nį nwun ɉon gwɛni. 14 Yai-Laa aa nwun ɉu tinɛ̨n ɲɔ̨n bɛlɛ diɛ, diɛ Eziptə tɔɔ lɔ takpa takpa gɛ mɛ̨nįɠaa kəlee hu, yɛ bələi lɔɔ hon a kɛ tɔɔi la, yɛ ɓaɠi. 15 Nu ta hva kɛa kpaan baa Eziptə ɓa, yɛ ə kɛ a nwun galin, yɛ ə kɛ a nwon, yɛi kɛ a kələ laa, yɛi kɛ a dɛ̨ɛ̨. 16 Nąąlɔwai Eziptə a kɛ lɔ yɛ nɛ̨ɛ̨nu, yɛ ɲɔw, mąą yɛ kpɛlin, ɓɛlɔwai a Yai-Laa Mɛ̨nį Kəlee ŋą Hééɓomun yee kaa la mɛ̨i. 17 Ɉuda lɔi a kɛ a Eziptə mąą ɲɔw hɛn, ɓɛlɔwai lɔpee a naa mąn na, mąą kaa pai kɛ kpɛlin ɉi, mɛ̨nįi Yai-Laa Mɛ̨nį Kəlee ŋą Hééɓomun ə mąą kili tee gwəi yɛ hvilɛn na mą. 18 Nąąlɔwai Eziptə taa lɔɔli kaa pai kɛi Kanaan woo ɓoi, diɛ di kwɛla, diɛ di kpɔwɔ laakwɛlanmo Yai-Laa Mɛ̨nį Kəlee ŋą Hééɓomun ɓa, dɔ̨nɔ̨ laa kaa pai kɛi a Kɛɛ Kala Taa. 19 Mąąi yələi tii, Yai-Laa nwɔ haláá kulɔi ta kaa pai kɛi Eziptə lɔi hɛ̨ąi, Yai-Laa kɔ́ kwɛni ta ə ɓo nɔi ɲɛ̨n ɉu. 20 Di kaa pai kɛi a Yai-Laa Mɛ̨nį Kəlee ŋą Hééɓomun mąą kɛla da gɔlɔn ɉɛn Eziptə lɔi hu. Nuą pai woloi Eziptə ɓa, diɛ kɛ di hee di mɛ̨i, Eziptə nuą da tómą Yai-Laa pɔ pələ, gaa pai di ɓalomun dɛɛi di pɔ, yɛ di mąą kɔ̨nwɔ̨, yɛ di kulɔ ɲəi kɛ. 21 Yai-Laa kaa pai gbɔwɔ lɛi Eziptə nuą diɛ, Eziptə nuą diɛn, da Yai-Laa kɔ́lɔn a volói tii, diɛ gɔ́ a halááɠaa da mɛ̨inɛ̨ɛ̨ɠaa; diɛ mɛ̨nįɠaa laakwɛlanmo Yai-Laa ɓa, ɛlɛɛ, diɛ bɔ mɛ̨nį kɛ. 22 Akɛ, Yai-Laa ə Eziptə nuą kɛlɛ a nwala-walaa, bələ lɔ ɓə gaa pai di ɓaloi la; da pənə da pa Yai-Laa pɔ, gaa pai ɲee heei di mu, yɛ di ɓalo. 23 Mąą yələi tii, pələ kɛnɛ̨ a həɠə Eziptə yɛ li Asiri lɔi hu. Asiri nuą diɛ pa Eziptə lɔi hu, Eziptə nuą diɛ li Asiri lɔi hu. Eziptə nuą da Asiri nuą diɛ kwɛli hvilɛn Yai-Laa ɓa. 24 Ɲələi tii, Eziptə nuą pɛlɛɛ Asiri ɓa, Israɛlə ə kɛ a di haaɓanąą, yili ɓə pai kɛi a nɔi nwɔ lúwɔ. 25 Núwɔ́i Yai-Laa Mɛ̨nį Kəlee ŋą Hééɓomun kaa pai dooi nɔi ɓa, ya ka: «Lúwɔ́ ə kɛ nwɔ́ lɔi Eziptə ɓa da ɉu nuą, lúwɔ́ ə kɛ Asiri ɓa, yai ŋą́ bɛli a ɲéé, lúwɔ́ ə kɛ Israɛlə ɓa, yai a gwɛ́lin!» |