Azaya 18 - Yálá laawoo hɛɓɛ (dc)Kusə mąą mɛ̨nį 1 Kpalo ɓɛlaai yɛ́! Nubi yáɠaa kwɛlɛ lɔi, yá ɲą kələn ɉu tín a tɔɔ laa, yɛ kwɛlɛɛn goon ɉu tín. 2 Yɛ́i ya kɛ ə́ wɔ kɛlaɠaa tɛɛi gboloyá ŋąi, kələnŋąą hu, diɛ pa ɲáɠaa ŋą. Kɛla kɔ́wɔ mąąhulaaɠaa! 'Ka li, nɔi tii ɉu nuą yee muhəɠɛɛ, di kpɛlɛ hvo diɛ, di pɔ, a yai tii, gwɛlɛ lɔiɠaa da ɲɔw mą kpɔ kɛnɛ̨i; a nɔi hvaŋą kɛnɛ̨i tii, ɉeɛ lɔiɠaa mɛ̨i, yá kpɛa-kpɛaɠaa di ɓo ɉu. 3 Yɛnɛ̨ɛ̨ nuą kəlee, kaai lɔi mɛ̨i, ɓɛlɔwai di kaa pai ɉilɛyili tɛi la ɲeeɠaa nwuɔ̨, 'Ka ka nwun muhəɠə, 'ka gaa! Ɓɛlɔwai di kaa pai dúlu hvɛɛi la, 'ka ka wəli tɔɔ! 4 Mąąhɔlɔɓo, Yai-Laa ə kɛ mą́ą́: «Gáá pai lɛɛi heeni ɉééi, gɛ́ kɛɛ kaa, ɉéɛ kpɔ kpɛ, yɛ bələi hvóló tɛɛ nwun mą wəleen gɛnɛ̨i la, gbaalən ə ɓo mą; yɛ bələi lɔ luwu luwu a pɛlɛ la mɔ̨nun deei lɔwai.» 5 Gɛɛ di hvo kpɛɛ a hihɛnŋąą ma kulaa, ɓɛlɔwai ɉiwuluɠaa da kpɛɛ la a powaa, bowa yɛ kɛa mąąpənə a ma, yɛ pa kpɔlui, da gulɔ, di pənə di nwonwo kpalaɠaa tee di gulɔ ɉu. 6 Kɛlaa, di kaa pai gəlee lɛɛi a ɲee hu nwɛ̨niɠaa, da lɔwɔ huwɔɠaa di wɔɔ, nwɛ̨niɠaa kaa pai pai diɛ hvóló laa teɛɛ kɛ laa, nɔwɔ huwɔɠaa diɛ hąmą lɔɔ kɛ laa. 7 Nąąlɔwai, nu huwu yee muhəɠɛɛi tii gbɛlɛ hvo mą, a yai gwɛlɛ lɔiɠaa da ɲɔw mą kpɔ kɛnɛ̨i, yai vaŋá kɛnɛ̨ɛ̨ ɉeɛ lɔiɠaa mɛ̨i, gaa pai pai a Yai-Laa Mɛ̨nį Kəlee ŋą Hééɓomun kɔ́ hɛn. A nɔi tii ya kpɛa-kpɛaɠaa kaa ɉu, gwɛlɛ lɔiɠaa diɛ ɲɔw mą kpɔ tii kɛnɛ̨i, gaa pai pai a Yai-Laa Mɛ̨nį Kəlee ŋą Hééɓomun kɔ́ hɛn, ɓɛi Naa kaa laa Siɔn yee nwuɔ̨. |