Azaya 17 - Yálá laawoo hɛɓɛ (dc)

Damasə mąą mɛ̨nį

¹ Mɛ̨nįi kponąą di mo yɛ hvilɛn na Damasə, ɓa ya ka: Damasə hvo kɛa pai lɛɛi a taa, gaa pai lɛɛi a taa kpoloon.

² Daaɠaai ɲee mu, nu hvo kɛa pai lɛɛi di hu, di kaa pai lɛɛi a taatɛlɛɛɠaa pɛlɛi, ɛlɛɛ, nu ta hvo pai kɛi di kpɛi.

³ Ɛfraimə mąąkpɛ hįi hva kɛa kɛ mą, tɔɔlaa hva kɛa kɛ Damasə, Aramə nuąi pai kulɔi ɉu, di hvo pai kɛi a hɛn da, di yee hva tɛɛ Israɛlə nu huwu gbəli ɓa, Yai-Laa Mɛ̨nį Kəlee ŋą Hééɓomun woo li!

⁴ Mąą yələi tii, Ɉakɔbə hvaŋą ta a kulɔ mą, goo haɠa a wolo, kəŋə la ə tee.

⁵ Yɛ bələi kpɔlɔ da mɔ̨nun diɲɛ̨ la gee mɛ̨i mɔ̨nun deei lɔwai, diɛ mɔ̨nun gɔnŋąą tiɛ̨ gee mɛ̨i, mɔ̨nun gbaɠa tɛi tɛi lɔ ɓə kɛa a lɛɛ Refaitə yɛɛ kɔ́wɔ hu.

⁶ A kɛ kpɔlɔ yɛ towələ pu yələ, towələ taa hveelɛ haaɓa ɓə a lɛɛ nwulu hu kpɔ kwɛaa la, towələ taa nąąn a wala kɛti, lɔɔli ɓə a lɛɛ nwonwoɠaai ɓa, diɛ, Israɛlə nwɔ Yálá, Yai-laa woo li.

⁷ Mąą yələi tii, nu a ɲɛ̨i tinɛ̨n gɛa ə ɉee bɛli mun bɔ pələ, yɛ Israɛlə nwɔ Mą́ą́həɠə mun gaa.

⁸ Hva kɛa ɲɛ̨i hee ɉali kɔ́iɠaa diɛ, ɓɛi ə bɛli a ɲee; ɉɛnŋąąi ɲee kpiɛ ə di kɛ, hva ɲɛ̨i hee di pɔ pələ, ɉali mąą nįnįnŋąą da voló mąąwiɛ hɛnŋąą.

⁹ Mąą yələi tii, ə mąą kilɛ taaɠaai da lɛɛ a taa kpoloon, da lɛɛ a taa kpoloonŋąą; lɔ yɛ bələi nɔ̨wɔ̨ ɲɔ̨nŋąą, da ɉali kɔ́iɠaa di lɛɛ la a lɔwɔ pun ɲeeɠaa nwuɔ̨ Israɛlə lonnii ɲɛ̨i tɔwɔ, nąą kəlee a lɛɛ a lɔi pun.

¹⁰ Mąąhɔlɔɓo, yaa lɛ̨ą ə́ ɓalo Yálá ɓa, ə́ mąąkilɛ kwɛni kili hvo lɛɛli ə́ ɲą, ə́ lííɓa wuluɠaa ɓə ə́ kaa ɉin ɉii, yɛ́ nwɛ̨ą wuluɠaa hin.

¹¹ Ɲələi lɔ yá di hin na, ə́ ɲɛ̨i a lɛɛ diɛ, diɛ kɛnɛ̨, ɛlɛɛ yələ wala pɔ, yɛ́ kɛa di ɓa kulɔ, Kɛlaa di mįi lɔwai a həli lɔ, di ɓa ə kwɛlɛɛn, ɲɔ̨n tii ɉali hva kɛ.

Doomɛ̨i kɛ nuą kpɛ mɛ̨nį

¹² Mąąwɛli mɛ̨nį ka! Nu kpulu kɛnɛ̨i lono hvo mą, di huluun nwoo kaa tɔɔi, di huluun nwoo yɛ tɔɔ, yɛ gboloyá a kɛi huluun, di kaa huluun ɉii yɛ ya leeɠaa da kɛi huluun.

¹³ Lɔiɠaa diɛ gɛ lɔ ɉuwu ɉuwu yɛ ya hvɛɛ. Yálá a tómą di mɛ̨i, diɛ pu diɛ li kwɛa la, da di kpɛ, yɛ yee hu hvaŋą a hee mɔ̨nun gala hu, diɛ li yɛ tulɔ hvaŋą a hee laakpala hu yɛ li la.

¹⁴ Yələ a kɛi wulu, ɲɔw kɛnɛ̨ yɛ nu hu pu mą, gɛɛ yələ hvo ɓɔ, hɛn da hva kɛa kɛ laa, nuąi da too ku mɛ̨i, di kɛ pələ kaa pai kɛi tii, nuąi da too ku yəi hɛnŋąą hu bələ ɓə di kɛ pələ kaa pai kɛi la.