Azaya 16 - Yálá laawoo hɛɓɛ (dc)

Moabə yɛ Ɉerusalɛmə ə kpɔnmąą tɛɛ ɓɔ

¹ Ka nɔi tɔɔmun nwɔ ɓɛlaa lon tɛɛ, yɛ həɠə la Sela nɔi pun ɉu, di li la Siɔn nɛ̨ɛ̨gbɛla nwɔ yeei nwuɔ̨.

² Moabə nɛ̨ɛ̨lɛa kaa pai kɛi yɛ nwɛ̨niɠaai daa di kpɛ di taa ŋą, diɛ pu, diɛ Arnɔn ya teen.

³ Diɛ kɛ diɛ: «Ku liɛwoo ɓo, ku tɛnɛn dɔɔ, ka ka nwun dɔɔ, ka woo ta ɓo, a hvóló tɔɔ nwun ma; ə́ nįnįn bɛlɛ yɛ kpinį, nuąi daa too di hu, di di mąąkilɛ ə́ hvaŋąn mu, əgɛ, di hvo nəi pa nuąi pui di kaa.

⁴ Moabə nuąi di mąąkilɛi, di pɛli heei ə́ kɔ́wɔ mɛ̨i, 'kɛ a di mąąkilɛ pɛlɛ, nɔi hu kalamun ŋɛ̨i tɔwɔ. Nwɛ̨ą mɛ̨nį ə kpɛɛ, nɔi hu kalamun ə həɠə laa, nuąi hee ku mɛ̨i di kulɔi nɔi.

⁵ Wɛlikɛmąąlaa a dɔɔkpəlin hee gbilin, ɛlɛɛ, Davidə yəi bɛlɛ́n, kiti tee mun ɉaŋąą kaa pai heei laa, yɛ tɛ̨ą hu kpɛ, ɲee mąąhulaa mɛ̨nį ɲɛ̨i kulɔi.»

Ɉerusalɛmə hvo Moabə woo mu hon ni

⁶ Kwaa Moabə nwɔ kpɔwɔ ɲąą kɛnɛ̨ ɲɔ̨nwɔ̨ɔ̨ bələ mɛ̨n, nwɔ ɲɛ̨i tɛ mɛ̨nį, nwɔ kpɔwɔ ɲąą kɛnɛ̨i, nwɔ ɓələn, vilɛn ŋąą la kpɛli kpɛli mɛ̨nį pulu.

⁷ Ya ka kɛa Moabə kaa wɔlɔi Moabə mɛ̨i, diɛ di kee hon a wɔlɔ, di liikələn ŋąą di kwəi, diɛ ɲiŋɛ̨ a kwəi pili mąą, Kirə-Harɛsɛtə taa kpoloon mɛ̨i.

⁸ Mąąhɔlɔɓo, Hɛsbɔn yɛɛ kɔ́wɔɠaa daa koloon, da Sivma nwɔ viɲə yɛɛɠaai, yai nɔɔ ə kɛi nɔi ɲąąwooɓo nuą hon. Viɲə yɛɛɠaa tii, ə kɛi kpɔ li yɛ həli Yazerə, yɛ pu kpɔ nɔi pun ɉu, gbɔlɔ yɛ gboloyá teen.

⁹ Kwa Yazerə ku kaa wɔlɔi Sivma nwɔ viɲə yɛɛɠaa mɛ̨i, gáá ka yɔwɔi a ɲɛ̨́iyá, yɛ́, Hɛsbɔn ka Eleale; hvó gaai, ə́ wɔ mɔ̨nun dee kwəinɛ̨ɛ̨, da nɔɔ pɛli kwəinɛ̨ɛ̨, mąą aa hvalin a kɔ́ mɛ̨i woo.

¹⁰ Kwəinɛ̨ɛ̨ da yɛlɛ woo daa kpɛɛ ɲeeɠaa nwuɔ̨, ɛlɛɛ, di hvo kɛa mąnąi, di hvo kɛa di yee lɔwai viɲə yɛɛɠaa hu, di hvo kɛa lɔɔ kulɔi, gwəinɛ̨ɛ̨ wələɠaa daa kpɛɛ.

¹¹ Níi kaa kpɛlin ɉii gwə́i, yɛ gwɛni ɲɛli, Moabə mąą mɛ̨nį ɓa, níi yɛ dumo gwə́i Kirə-Hɛrɛsə mąą mɛ̨nį ɓa.

¹² Di kaa pai Moabə kaai, vinna tɔ́n ŋąą, yɛ tɛ nwɔ haliɠaai kɔ́i, yɛ li nɛ̨ɛ̨mąą hvəi nwɔ haláá kulɔ pɛlɛ́i mu, Kɛlaa, ɲee hvo pai lɔi mɛ̨nį ta kɛi.

¹³ Nwooi Yai-Laa ə mo yɛ hvilɛn na Moabə ɓa, ɉu aa kwɛa, ya ka tii.

¹⁴ Yiihu kɛa, Yai-Laa yɛ: «Gɛɛ kwɛlan ɉaaɓa hvo tɛɛ, Moabə nu kpɛa-kpɛaa, da nɔi lonnii kəlee di ɓɛlɛ a kpɛɛ diɛ, da lɛɛ lɔ tɛi tɛi, nu kpəli hva lɛɛ a hɛn ɲąą mąą.»