Azaya 15 - Yálá laawoo hɛɓɛ (dc)Kɛɛ ə kala Moabə 1 Mɛ̨nį kponąąi ɓo Moabə laa mɛ̨i, ya ka: Gbinii Arə-Moabə ə too la, ə lɛɛ a taa kpoloon. Gbinii Kirə-Moabə ə too la ə lɛɛ a taa kpoloon. 2 Nuą kaa tɛi Divɔn haláá kulɔ pɛlɛ́ mu, diɛ wɔlɔ laa. Moabə kaa nwoo laai Nebo yee da Madaba yee nwuɔ̨; daa nwun gəlee kalaan, daa kpɛlɛ kəlee pu. 3 Nuą daa di mąą yili a ɓíi haɠa gwəliɠaa pɔ, nu kəlee kaa nwoo laai bɛlɛ́ɠaa kwɛlɛ, da gwəli hąąiɠaa, di ɲɛ̨iyá yɛ pu wuuu. 4 Hɛsbɔn da Eleale diɛ gboo təli, nu a kɛ Yasa daai, yɛ mɛ̨n. Yili mąą mɛ̨nį ɓa Moabə kɔ́ kulááɠaa kaa tómąi, liikpələ hvo da yəi. 5 Gáá wɔlɔi Moabə mɛ̨i, pu nuą daa həli kpɔ Soarə, daa həli Ɛglatə-Selisiya. Diɛ Luhitə yee kpukpu tɛ a wɔlɔ, diɛ tómą a ɲąą nwąnąą Horonaimə pələɠaa pɔ. 6 Nimrimə ya aa lɛɛ a kɛɛnąą mąą wɛliɛ, galatiliinŋąą daa kpala, di hva kɛa pənə di hvo tɛ; wulu ta laa hvo ŋą. 7 Ɉɛn gɔw woloi ni gaa di yəi, di kaa diɲɛ̨i Mɛlɛ kpulu mu yá pulu pələ. 8 Gboo təli woo aa Moabə lɔi kəlee kulɔ, wɔlɔ woo aa həli kpɔ Ɛglaimə, yɛ həli Elimə yálɔwa la. 9 Divɔn yaɠaa laa hvɛɛi a ɲąmą, gáá nwɔ̨nɔ̨ Dimɔn nwɔ mɔ̨nɔ̨i ta pɛlɛi mą, Moabə nuąi da kulɔ ɉu, a diɛi pai lɛɛi nɔi, ŋą́ yala hvilɛn di pulu. |