Azaya 14 - Yálá laawoo hɛɓɛ (dc)Yálá kaa pai nwɔ nuąi ɲɛ̨imąąwɛli kaai 1 Yai-Laa kaa pai Ɉakɔbə mąąwɛli kaai, gaa nwɔ̨nɔ̨ pai Israɛlə kɛi a niiɓa mun, ə pənə ə ɉee nwɔ lɔi hu; nwɛ̨ąą diɛ pa di pɔ, diɛ kanąn Ɉakɔbə nwɔ pɛlɛ́i ɓa. 2 Lɔiɠaa kaa pai di yee heei Ɉakɔbə nwɔ pɛlɛ́i mu, diɛ pənə diɛ li a diɛ di kaa lɔi hu. Israɛlə nwɔ pɛlɛ́i kaa pai Yai-Laa nwɔ lɔi hɔlɔɓoi a nwɔɔ, di nwɛ̨ąą tii kɛ a di nwɔ luwɔ nɛ̨ą da luwɔ hinąą; a diɛi tii di kɛ di yəi luwɔlaa hui; Ɉakɔbə a pənə ə nuąi tii kɛ a di wɔ luwɔɠaa, ə hee nuąi kɛi di mɔ̨nɔ̨ ɓo di mɛ̨i. Babilonə tɔɔmun ɉaa pələ 3 Ɲələi Yai-Laa kaa pai hvitɔɔ yɛnɛ̨ɛ̨ tɛɛi la ə pɔ, ə́ wɔ mɔ̨nɔ̨ɠaai da ə́ wɔ hviikpɛɛɠaai pulu, da nuwɔ laa ɲąąnwąnąąi ə kɛ ɉu, gəlee pulu, 4 ya nwələi ŋɛ̨i too a Babilonə tɔɔmun naa, yɛ kɛ mą: Nuą mɔ̨nɔ̨ ɓomun tii nwɔ yɛnɛ̨ɛ̨ laa ə kulɔ pələ kɛ ləi yoo? Nwɔ ɲɛ̨itɛlaai ə kulɔ pələ kɛ ləi ɲəi yoo? 5 Yai-Laa aa mɛ̨nį ɲɔ̨n gɛ nuą di wɔ gbɔn huyali, aa tɔɔɓɛlaa di wɔ nuą kɛlɛ gbɔn huyali, 6 a yai tii kɛi nuą kɛlɛ a liiholii, vii hvo kɛi kpɛɛ nuą hulɔwai, yɛ hee lɔiɠaa mɛ̨i a ɲąąnwąnąą, yɛ di mɔ̨nɔ̨ ɓo, ya ka daa hvilɛn bulu, di hvo ɲɛ̨imąąwɛli kaai. 7 Lɔi aa hvįįtɔɔ hɔlɔɓo, yɛ tómą a kwəinɛ̨ɛ̨. 8 Ə mą kɛ wuluɠaa, di kaa kwəinɛ̨ɛ̨ kulɔi ə́ mąą mɛ̨nį ɓa, ɛlɛɛ, yii kɛa ə́ kaa laani lɔi ɓa, Liban kpitiliɠaa kaa kɛi diɛ: «Nui kɛi ku pɔn, hva kɛa tɛ ɓɛ hvo ku pɔn.» 9 Ə́ pa mɛ̨nį bələ mɛ̨n ɲąmuątaa ə mo, níi kaa kulɔi mą, yɛ haa nuą nwun, ə́ laakwiɛn mɛ̨nį ɓa, yɛ yɛnɛ̨ɛ̨ tɔɔɓɛlaa kəlee həɠə di wɔ tɔɔkpəlin hu. 10 Di kəlee diɛ di woo həɠə mą, diɛ kɛ mą: «Ɓɛ kaa li, Yáá kɛ yɛ kuɔ! Yɛ́ kpɛli mąn, hvaŋą hvo kɛa ə́ yəi!» 11 Ə́ wɔ mąąwiɛ aa lɔ lɔi mu, ə pɛlɛ la ə́ wɔ túlú wooi ɓa, kpəəli pɛlɛɛ daa di haɠa pɛlɛ ə́ mu, ə́ yii həɠə ɓaa kolo pɛlɛɛ. 12 Ə́ kulɔ pələ kɛ ləi yələi yɛ́ too yələ kwəi hvələ hɛn gɛnɛ̨, yələɓɔi lon? Di ə́ pili pələ kɛ ləi, yɛ́ too lɔi ɓa, yɛ́i lɔiɠaa lɔ ə́ yee mui? 13 Ə́ kɛi kɛ diɛ: «Gáá tɛi yələkwəi, gáá nwɔ́ tɔɔ kpəlin ɉeei Yálá nwɔ pɛmɛ̨lɛ̨n-gɔwɠaa mɛ̨i pələ, gáá lii ŋį́ hee yáláɠaa di wɔ ɲąąkpɔn ɲee nwuɔ̨, ŋį́ hee kpɔ ɲələkwəi leelee. 14 Gáá pai tɛi tulɔ kpinįnŋąą mɛ̨i, gáá pai kɛi yɛ Hɛn Gəlee mɛ̨imun Yálá.» 15 Gɛ pələ kaa ləi yai, yáá yɛɛ lɔi mu pələ, yáá yɛɛ kpɔ ɲɔ̨muątaa kpon ɉu. 16 Nui lɔpee a ə́ kaa, a ɲɛ̨i hee yɛ́ hįį, yɛ ə́ kaa hveelɛ hveelɛ, yɛ kɛ diɛ: «Nui lɔi ə kɛi kpɛlin dɔwɔ ya ɓəi, yai kɛi tɔɔlɔiɠaa too, yɛ́ li mɔ̨ɔ̨? 17 Yɛ lɔi mąąpənə a lɔi pun, yɛ taaɠaa wolo, a kɔluwɔ hon, hvo kɛi pənə hvo dɛɛ gaa lɔi hu.» 18 Yɛnɛ̨ɛ̨ tɔɔɓɛlaa kəlee, da laa hvo kulɔ li ɉu, di kaa di hviitɔɔi a di ɓɛlɛ, di wɔ kámąɠaai hu. 19 Kɛlaa ə́ wɛi, daa ə́ pili kwɛaa la, hvó ə́ wɔ kámąi kwɛlɛ, yɛ yəikalalon a nu lii muhəɠə, yɛ nui di baa a ɓɔwa kwɛaa, diɛ ɓɔ di hu, diɛ di pili kwɛni woloɠaa hu, gəlee daa pu ə́ mɛ̨i, yɛ nu powai di kaa dan ɉii a di kɔ́wɔ. 20 Di hvo pai ə́ pɛlɛi diɛ, kámą hu, mąąhɔlɔɓo, yáá ə́ wɔ lɔi kala, yáá ə́ wɔ lɔi hu nuą paa, di hva kɛa nu huwu ɲɔ̨nwɔ̨ɔ̨ laa ɓo kpɔ tanɔ̨n gbɛli. 21 Ka nɛapɛlɛɛ paa mɛ̨nį ɲɛ̨i kulɔ, di nąnni di wɔ nɛ̨ŋɛ̨nŋąą mąą mɛ̨nį ɓa, di hvo pa nəi kɛnɛ̨, diɛ nɔi hon a kɔ́, diɛ hiɛ yɛnɛ̨ɛ̨ nąą kəlee. 22 Yai-Laa Mɛ̨nį Kəlee ŋą Hééɓomun yɛ diɛ: «Gáá pai haŋąi ŋį́ tɔɔ, gɛ́ Babilonə laa hu pu, da dɛɛ pɔɔ kəlee, ə mą kɛ, ɉuwu da bulu nuą. Yai-Laa woo li. 23 Gáá pai nąą kɛi a palayá, a ya nwɛ̨niɠaa taa ŋą. Ŋą́ Babilonə kələ a taŋąn, gɛ́ hɛn gəlee kulɔ laa; Yai-Laa Mɛ̨nį Kəlee ŋą Hééɓomun woo li.» Yálá kaa pai Asiri hu woloi 24 Yai-Laa Mɛ̨nį Kəlee ŋą Hééɓomun ə gwɛla, yɛ diɛ: «Mɛ̨nii ŋą́ naa gwə́i, ɲələ kaa pai həlii, mɛ̨nįi ŋą́ą́ mąą kili tee gwə́i, ɲɛ̨i kaa pai kulɔi. 25 Gáá pai Asiri huyalii nwɔ́ lɔi hu, gáá pai gii gii ɉii nwɔ́ yeeɠaai nwuɔ̨, nuąi kɛ ɉeɛ di mɛ̨i, da ɉəɠə mąą nuą mɛ̨i, nuąi nwɔ tiɛ̨i ə kɛ di nwuɔ̨, diɲɛ̨i tii a həɠə di nwuɔ̨.» 26 Mɛ̨nįi ŋį́ mąą kili tee gwə́i yɛ hvilɛn na lɔi kəlee ɓa, ya ka tii; ɲééi ŋį́ bili lɔi kəlee hu, ya ka tii. 27 Yai-Laa Mɛ̨nį Kəlee ŋą Hééɓomun, a mɛ̨nį mąą kili tee gwəi, gbɛɛ ɓə a pɛli ɉəɠəi mą? A ɲee tɛ yələi, gbɛɛ ɓə a pɛli ɲɛɛi? Yálá kaa Filisti nuą mąą ɲɔwii 28 Gwɛlan tɔɔmun Akazə ə haa la, mɛ̨nį kponąąi di noloɓo, ya ka: 29 Filisti lɔi pilɛɛ gee mɛ̨i, 'hvó tɔɔ yɛ́ kɛ ə́ kaa kwəinɛ̨ɛ̨ kulɔi, gbɔn kɛi ə́ kɛlɛ, ɉuyali mɛ̨nį ɓa, mąąhɔlɔɓo, tumo kaa pai kulɔi kaalə kpuwɔ hu, gbaatow-gbono kaa pai kulɔi tumo hu yɛ koon. 30 Mąąwɛli nuą kaa pai di laa mįi hɔlɔɓoi, yeehowolo nuą diɛ yɛnɛ̨ɛ̨ kɛ liilaa hu. Kɛlaa ə́ wɛi, ŋą́ ə́ hamu paa a pulu, ə́ kpəlii a lɛɛ, ŋį́ yili paa. 31 Kponŋąą, ka ka woo laa, taaɠaa, ka tómą, Filisti lɔi kəlee aa too, nwɔ̨n nulu kaa həɠəi ɲánwuɔ̨ pələ, nu ta hvo gɔwɔ kulɔ mɛlaa kɔ́wɔ pɔ. 32 Gɛlaɠaai nɔi tii ə di tɔɔ, lə ɓə da pɛli moi diɛ? Yai-Laa aa Siɔn taa tɔɔ, nwɔ lɔi hu lonnii, a mąąwɛli nuą, di kɛ laa di nɛ̨ɛ̨ hu. |