Azaya 13 - Yálá laawoo hɛɓɛ (dc)

Babilonə mąą mɛ̨nį

¹ Mɛ̨nįi kponąąi Amɔsə lon Esai ə gaa, yɛ hvilɛn na Babilonə ɓa, 'ka mo mą, kaa mą:

² «'Ka tɛ yee ta nwuɔ̨, ɓɛi lɔwɔ hvo laa, 'ka ɉilɛyili tɛ ɲələi, 'ka tómą, 'ka ka yee tɛ yələi, 'ka di təli galanɉonŋąą yəi bɛlɛ́ laaləi,

³ Nwɛ́i, nwɔ́ kɔ́kuláaɠaai ŋį́ di həɠə ɉu a nwɔ́ɔ́, ŋą́ą́ di təli, ŋą́ą́ kɛla tɔɔ nwɔ́ kɔ́kuláa yɛlɛɛɠaai pɔ, a diɛi tii ɲɛ̨́i pɔ̨nɔ̨ mɛ̨nį kaa a di kwəinɛ̨ɛ̨ mɛ̨nį, diɛ nwɔ́ liiholii nwąnąkulɔ.»

⁴ 'Ka di hu tín mɛ̨n ɲeeɠaa hu, gaa yɛ nu kpulu kɛnɛ̨, 'ka nɔiɠaa hu tín mɛ̨n, lɔiɠaa ɲąąkpɔn ŋąąi, Yai-Laa Mɛ̨nį Kəlee ŋą Hééɓomun, kaa nwɔ kɔlaɠaɠaai mɛ̨i kaai, di kaa lii kɔ́ ɓa.

⁵ Di kaa həɠəi kwɛala lɔi hu, yələkɔlɔn gbɛlai pələ, Yai-Laa da nwɔ liiholii nwąnąkulɔ hɛnŋąąi, di kaa pai nɔi kəlee huwoloi,

⁶ 'Ka haa wɔlɔ ɓo, a gboo təliɛ, Yai-Laa nwɔ hvólói həli hiɛ ka, a kɛɛ kala hvóló, yɛ həɠə kɛɛ kaamun bɔ.

⁷ Yili ɓə gɛi, nu kəlee yee hu a haa, hviikpɛɛ aa lɔ nu kəlee kɔ́lɔi.

⁸ Ɲɔw aa too di hu, di mąą yɛ kpɛlin, diɛ mɔ̨nɔ̨ mįi, diɛ kpɛlaan gbɛlaan yɛ nɛ̨ɛ̨nu a kɛi kwəinwąną kɛ, diɛ di kee kaa a kwəi pili, di ɲɛ̨i kɔ́w aa kpɔlu yɛ nwɔ̨n dəŋą.

⁹ Yai-Laa nwɔ hvólói ka pai, a liiholi kɛnɛ̨ da lii kələn gwəi, nu mąąhvaalɛɛ mɛ̨nį hvo ɉu, yɛ nɛ̨ŋɛ̨n ɉəɠə nuą ɲąąyíi, nɔi yɛ lɛɛ a mąąwɛli lɔi.

¹⁰ Yələkwəi pɛmɛ̨lɛ̨n-gɔwɠaa, da di kpulu heeiɠaa, di hva kɛa lən, hvóló hu a kpinį a muhəɠəi lɔwai, ɲąnįn va kɛa hvələ.

¹¹ Gáá pai nwą́nąkulɔi yɛnɛ̨ɛ̨ ɓa, ɉɔn ɲɔ̨nwɔ̨ mɛ̨nį ɓa, gɛ́ nwą́nąkulɔ nwąnąlɔ nuą diɛ, di wɔ nɛ̨ŋɛ̨nŋąąi mąą mɛ̨nį ɓa, gɛ́ kpɔwɔ ɲąąkɛnɛ̨ kulɔ tɛɠɛɓo ɉu nuą yee pɔ, gɛ́ nu mɔ̨nɔ̨ɓo tɔɔɓɛlaa, di wɔ ɓələn mąą yɛɛ.

¹² Gáá pai nuą lɛɛi tɛi tɛi, a nɛ̨ɛ̨ mąn hɛni laa tooɔi, a nɛ̨ɛ̨ mąn Ofirə hɛni tamąąi.

¹³ Gáá pai yələkɔlɔn ɉiɠi-hiɠi ɓoi, lɔi yɛ kpɛlin ɉeei, Yai-Laa Mɛ̨nį Kəlee ŋą Hééɓomun ɲɛ̨i tɔwɔ, a ɲələi nwɔ liiholii kaa pai muhəɠəi la.

¹⁴ Nąąlɔwai tii kɛa, nu kəlee kaa pai lii nwɔ nuą pɔ, nu kəlee yɛ pu yɛ li nwɔ lɔi pɔ pələ, diɛ laŋin yɛ lomąi di kaa gbɛi, yɛ taatɛlɛɛ kpului ɲąąkpɔn mun və mą.

¹⁵ Nui lɔpee di pai gaai, da baa, nui lɔpee di kaa pai ɉon ɉii, kɔ́ kɔ́ ɓɔwa a doo.

¹⁶ Da di lonnii huwolo lɔi ɓa di ɲɛ̨i ɓa, diɛ di wɔ pɛlɛ́ɠaai mu hɛnŋąą taɠa taɠa, diɛ too di nɛ̨ąni mɛ̨i.

¹⁷ Gáá pai Medi nuą ɲąątɔɔi diɛ, di wɛi, di mąąkpaan vo wali ɓa, diɛ hɛni hviiɓo.

¹⁸ Di kaa pai kɛi ɓɔi ɉilɛlɛa hu a di wɔ kilɛnŋąąi, di hvo pai nɛ̨ąą kwəi lon da mąąhvaalɛɛi, di ɲɛ̨iyá hvo di hu, di hvo lɛapɛlɛɛ mąąwɛli kaa la.

¹⁹ Babilonə, lɔi ɲɛ̨ilon! Yai a Kalde nuą ɲɛ̨i pɔ̨nɔ̨ hɛn, gaa pai kɛi yɛ Sodomə da Gomorə, diɛi tii Yálá ə di hukala.

²⁰ Nu hva kɛa hee laa a yələi lɔpee ta, a lɛɛ a lɔi pun a kwɛlan gəlee mɛ̨nį, ə mą kɛ, Arabə mun mə, hvo pai nwɔ həɠə pɛlɛ́i tɔɔi laa; ə mą kɛ, taatɛlɛɛ pulu nuą, di hvo pai kɛi tɔɔi laa.

²¹ Lɔwɔ ɲąąleeɠaa ɓə pai kɛi tɔɔi laa, muúɠaa diɛ bɛlɛ́ɠaa laahvɛɛ, nwɛ̨niɠaa diɛ di taa tɔɔ laa, ɛlɛɛ, haaɲąmuąą diɛ mąną laa.

²² Hvuluɠaa diɛ di kee woo mu hon, tɔɔ pɛlɛ́ɠaa mu, kwɛliɠaa di ɓo nu kpɛa-kpɛaaɠaa di wɔ pɛlɛ́ lɛlɛɛɠaai mu, nąąlɔwai kaa lɛɠɛi, Babilonə nwɔ hvóló tii hu hvo kɛa kwɛa li.