Amɔsə 9 - Yálá laawoo hɛɓɛ (dc)

Amɔsə nwɔ hįį kaa lɔɔli naa

¹ Ŋą́ Ną́mu kaa tɔɔni ɉaláá kulɔi hįį pələ, yɛ kɛ mą: Bɛlɛ́ dɔɔ muɠaa nwuɔ̨ kɛlɛ, ə gɛ, Yálá hee pɛlɛ́ laaləi ə kpɛlin. Gáá gəlee kɛlɛi di nwuɔ̨, ŋį́ nwolo, Akɛ, da lɛɛ nwɔ̨nɔ̨, ŋį́ di paa. Nu tɔ̨nɔ̨ kpɛli hvo pai kulɔi ɉu, nu ta hvo pai pɛli tɛɛi a gilɛ.

² Ə mą kɛ daa yɛɛ ŋąmua-taa, ŋį́ li laa, ŋį́ di hon. Da di mąąkilɛ yələkɔlɔn ɉu, ŋį́ di kulɔ laa, ŋį́ di yɛɛ.

³ Da di mąąkilɛ Karmɛlə yee ton na, Ŋą́ di kaa, ŋį́ di hon. Di ma lɔ gboloyá mu, ə gɛ, di di loo, ŋį́ mo gboloyá hu hɛnŋąą diɛ, di di ɲin.

⁴ Ə mą kɛ daa li di yowoɠaa pɔ, daa di kpɔɔ tɛɛ yiliɠaai pɔ a luwɔ, ŋį́ mo di yowoɠaa diɛ, di di paa. Ɲɛ̨́i kaa pai kɛi di mɛ̨i, mɛ̨nį lɛlɛɛ kɛ mɛ̨nį ɓa hvəi, Kɛlaa, mɛ̨nį ɲɔ̨n gɛ mɛ̨nį a diɛ ɓə ɲɛ̨́i heɛi la diɛ.

⁵ Nąmu Yai-Laa, Yai-Laa Mɛ̨nį Kəlee ŋą Hééɓomun, yai a ɲeekpiɛ hee lɔi ɓa, nɔi yɛ kpɛlin, mɛ̨i hee ɓo nuą diɛ mąąwɛli hee ɓo, nɔi yɛ hvɛɛ yɛ wolo yɛ ɲa lee ŋɛ̨i Eziptə lɔi hu.

⁶ Yaa tii ɓə aa wɔ mɛ̨nɛ̨i laa yələkɔlɔn ɉu, yɛ nwɔ tɔɔ pɛlɛi kɔ́wɔ hvilɛn lɔi mɛ̨i, yaa ɓə a gboloyá hu yaɠaa kəlee təli, di laa lɔi mɛ̨i. Yaa tii naa ɓaa a: Yai-Laa.

Mɛ̨nį ɲɔ̨n gɛ nuą kiti tee mɛ̨nį

⁷ Yai-Laa yɛ mą: Akɛti, Israɛlə nu huwu, ka hvo mɔ̨ɔ̨ ɲɛ̨́i ɓa yɛ Eziptə nuą? Kɛlɛi ɲą́ą́ ɓə Israɛlə nu huwu kulɔ Eziptə lɔi hu ee? Ŋą́ Filisti nuą kulɔ Kaftɔrə lɔi hu, ŋį́ Aramə nuą kulɔ Kirə lɔi hu! Kɛlɛi yili kpaɠala kaa tii kaa ee?

⁸ Yai-Laa ɲɛ̨i kaa Israɛlə tɔɔmun ɉuwuhu nuą kɛ nɛ̨ŋɛ̨n ma. Yɛ diɛ: Gáá pai di kpɛɛi lɔi mɛ̨i. Kɛlaa, və́ pai Ɉakɔbə huwuhu nuą kəlee laa kpɛɛi lɔi mɛ̨i. Yai-Laa woo li.

⁹ Yiihu, gáá nuą tii, gɛ́ diɛ: Di Israɛlə huwu-huwu ɓo, huwu takpɛliɠaa lɔwai, Di di hu kpɛ, yɛ pələi da hɛnŋąą kpaŋąn na, nɛlɛɛ tɔ̨nɔ̨ kpɛli hva pili, gala yɛ kulɔ ɉu.

¹⁰ Kɔ kaa pai tooi nwɔ́ nuą lɔwai, nuąi hon gaa diɛ, nuąi da kɛ Yálá kwəi máni hu kulɔ nuą diɛ: «Mɛ̨ni ɲɔ̨n tii ə́ kaa mąą mɛ̨nį ɓoi, hvo pai həlii kuɔ, hvo pai lɛɠɛi kuɔ! Gɔi tii kaa pai gəlee paai.»

Israɛlə liilaa mɛ̨nį

¹¹ Ɲələi tii a həli, Davidə nwɔ ɓuwui yɛ ə pu, ŋį́ ɉaŋą ŋį́ dɔɔ a nįnɛ̨, ŋį́ ɉįi laaləiɠaa pɛli, ɓɛ yiiɠaai nąą kaa a gboloon, ŋį́ naa tɔɔ, ŋį́ pənə ŋį́ daai tii tɔɔ, yɛ pələi wɔlɔ ə kɛ la.

¹² Ə gɛ, gɛɛnąąɠaai wɔlɔ kɛ a Israɛlə nu huwu di wɔɔ, Edɔmə lɔi hu, da lɔi takpɛliɠaa hu, ɓɛi náá heɛ mą, di pənə di nąąɠaa hɔlɔɓo. Gɛɛnąąɠaa tii ɓaa.

¹³ Yai-Laa yɛ nwɔ̨nɔ̨ diɛ: Hvoló ta kaa pai həlii, mɔ̨nunŋaa da lɛlɛ, di lɛɛ deei, ɛlɛɛ la ɉu, kɛɛhii lɔwai ə ɉəli, Nuąi da kɛ viɲə ya kulɔi, diɛ gɛ a lɔɔ, da lɛɛ gulɔi, ɛlɛɛ la ɉu, viɲə hii lɔwai yɛ ɉəli. Nąąlɔwai, lɔɔ nįnɛ̨ a kɛ yɛɛi a yee kpukpuɠaa yɛ ya lon. Lɔɔ ya a hvɛɛ ə tɛ ɲeeɠaa kəlee diɛ.

¹⁴ Israɛlə nu huwui di kaa luwɔlaa hu, ŋį́ gəlee nwun mąąɓo, di pa di pɔ lɔi. Di wɔ taa yiiɠaai daa wɔlɔ wolo, da pənə di dɔɔ, di hee ɉu. Da viɲə yɛaɠaa laa, Diɛ nɔɔ kulɔ, diɛ gbələ, Da hihɛn ɲɛaɠaa laa, diɛ mą kulɔ, diɛ mįi.

¹⁵ Nwɔ́ nuą tii, ŋį́ di hee di pɔ lɔi kpɔ tin-tin, Di hva kɛa həɠə laa. Ɲą́ą́ Yai-Laa ə́ wɔ Yálá, nwóó li, gɛ́ diɛ: nɔi tii ŋį́ dɛɛ di pɔ, di hva kɛa həɠə ɉu.