Amɔsə 8 - Yálá laawoo hɛɓɛ (dc)

Amɔsə nwɔ hįį nąąn naa ə kɛ a: kpɔlɔ laahvɛɛ a wulu ɓa

¹ Mɛ̨nįi Nąmu Yai-Laa ə nɛ nwɔ̨nɔ̨ mą́ą́ hįį pələ ya ka: Ŋą́ kpɔlɔ ta kaa, naahvɛɛ a wulu ɓa, gəlee kpɔluɔ.

² Yai-Laa ə mą́ą́ləngɛ, yɛ mą́ą́: «Amɔsə! Lə ɓə ŋɛ̨i ə́ kaa gaai ɲə́i?» Ŋą́ nwoo ŋąąpənə, gɛ́ mą: «Kpɔlɔ ka tii, naahvɛɛ a wulu ɓa, gəlee daa kpɔlu.» Yai-Laa yɛ mą́ą́: «Israɛlə nu huwu ŋąąkpɛɛi lɔwai aa ɉəli, və́ pai di hɔn da mąąhvaalɛɛi.

³ Ɲą́ą́ Yai-Laa, hɛn Gəlee Nąmu, gɛ́ diɛ: Volói gáá pai gɛ́ mɛ̨nį kɛi la mɛ̨nįi tii hu, nwələ too nɛ̨ąą ŋɛ̨i di kaa dɔɔ pɛlɛ́ mu, di kaa pai mąąwɛli wələ tooi, powa kaa pai kɛi pui gee mɛ̨i, diɛ di pili ɓɛi lɔpee nąą kəlee. Kɛɛ mąą a haa kɛɛnąą kəlee kpɔ tin.»

Toomɛ̨i hɛn gwɛli nuą ɓə da kpalo ɓɛla lɔi ɓa

⁴ Kaa yii ka kɛ mąąwɛli nuą tan ɉii a ka kɔ́wɔ, kaa kɛ ka kpɔɔmąąyɛɛ nuą kulɔ nɔi, 'ka ka wəli tɔɔ!

⁵ Ka kɛ kɛi diɛ: «Mįnɛ̨ lɔwai ɓə ɲąnin nįnɛ̨ nwɔ hɛli puɔ kaa pai tɛɛi la, ə gɛ, ku ku wɔ mɔ̨nunŋaai lɔwɔ́tɔɔ? Ɛlɛɛ, mįnɛ̨ lɔwai ɓə túwɔ́ lɔwɔ a kpɛɛ la, ə gɛ, ku ku wɔ kɔ̨nɔ̨n gələɠaai laa ɓo? Ka kɛ ɉɛnŋąą kɔ́ɔn gəgənŋąą kpon dɛi ɉu, ə gɛ ɉu ɛlɛɛ tiikpə.

⁶ Kaa kɛ diɛ: Túwɔ́ lɔwɔi ŋɛ̨i ə tɛɛ ɉa, ə gɛ, ku mąąwɛli nuą ya a wali. Ku yee hvowolo nuą ya a kɔ́wɔɲą kɔ́lɔ, Ku mɔ̨nunŋaa lɔwɔ́tɔɔ, ku və́leeɠaa kəlee lɔwɔ́tɔɔ.»

⁷ Yai-Laa aa gwɛla, Ɉakɔbə nwɔ kpɔɔ ɲąąkɛ̨nɛ̨ mánii tii hu, yɛ diɛ: Və́ pai lɛ̨ąi di túwɔ́ pələɠaa tii diɛ.

⁸ Yili ɓə gaa mą, lɔi hvo mɔ̨ɔ̨ pai kpɛlin ɉii? Ɉu nuą kəlee di hvo mɔ̨ɔ̨ pai mąąwɛli hee ɓo? Nɔi nąą kəlee kaa pai kɛi hvɛɛ yɛ wolo yɛ ɲa lee ŋɛ̨i Eziptə lɔi hu, diɛ kɛ mą: Nilə.

⁹ Yai-Laa yɛ diɛ: Volói tii a həli, kpinį a pɛlɛ a hvóló ŋą ɉə-ɉə, kɛɛ ə tɛɠi lɔi mɛ̨i nąą kəlee.

¹⁰ Ŋą́ ka wɔ hɛliɠaai kəlee mąą pənə a mąąwɛli hee ɓoɔ Ŋą́ ka wɔ wələɠaai mąąhvalin a wɔlɔ woo. Nu kəlee da mąąwɛli həɠə too di kwąną yɛ da haa too nu ɓa. Nu kəlee da di nwun gbəlaan mo, yɛ nu lon gɔw tɔ̨nɔ̨ a haa. Mɛ̨nįɠaa tii kəlee ŋąą a kpɛɛ a nwanąą.

¹¹ Nąmu Yai-Laa yɛ mą: hvólóɠaa kaa pai həlii, gáá pai pulu tooi nɔi nąą kəlee, Hva kɛ a kɔ̨nɔ̨n bulu da ya kpələ wɛli, kɛlaa, a kɛ a Yai-Laa lawoo mɛ̨n bulu.

¹² Nąąlɔwai, da kɛ di nwun ma, diɛ lia li, ə həɠə nɔi ɉɛɠɛi pələ, yɛ li voló tooi pələ, ə həɠə ɲąnwuɔ̨ pələ, yɛ li voló həɠəi pələ. Da kɛ Lɛa li, ə gɛ, di Yai-Laa lawoo kwɛli di mɛ̨n, Kɛlaa, di hva ɉɔlɔɓo.

¹³ Volói tii a həli, kpələ wɛli a nɛ̨ɛ̨lɛa lɛlɛɛɠaa da hilɛlɛaɠaa hɔwa.

¹⁴ Nuąi kɛi di kwɛla a Samari hali laa, Diɛi kɛi di kwɛla, diɛ kɛ mą: «Dan! Ə́ wɔ halii laa hu!», A wala kɛ tii, «Beɛrə-Seva pələi laa hu!» Nuą tii da too di hva kɛa di muhəɠə.