Amɔsə 7 - Yálá laawoo hɛɓɛ (dc)Amɔsə nwɔ hįį dɔlɔɔ ə kɛ a: peeləɠaa 1 Mɛ̨nįi Yai-Laa ə nɛ mą́ą́ hįį pələ, ya ka: Ɓɛlɔwai galaɠaa di kɛi tɛlin na, nąąlɔwai beele kpulu kɛ̨nɛ̨ ŋɛ̨i Yálá ə kɛi gɛ pələ pɛli, ə nɛ mą́ą́. Yili ə kɛ tii, tɔɔmun nwɔ hoo kalai ɉəɠələ tɛi lɔwai. 2 Ɓɛlɔwai beeleɠaa tii di gala tiliin gəlee mįi la nɔi mɛ̨i, ŋį́ mo Yálá ɓa, gɛ́ mą: «Ną́mu Yálá! Nɛ̨ɛ̨ yɛ́, ə́ wɔ nuąi mąąhvaalɛɛ. Akɛti Ɉakɔbə huwuhu nuą ŋɛ̨i di hvo tamą li, di kɛɛ lɔ pai lɛɛi yɛnɛ̨ɛ̨ lɔ li?» 3 Mɛ̨nįi Yai-Laa ə kɛi pa gɛi, ə mąąhvalin, yɛ mą́ą́: «Yii tii ə́ gaa, hvo pai kɛi tii.» Amɔsə nwɔ hįį veelɛnąą ə kɛ a: nwɔ̨n 4 Mɛ̨nįi Yai-Laa ə nɛ mą́ą́ hįį pələ nwɔ̨nɔ̨, ya ka: Nwɔ̨n mə ə ɉəɠə, ə gɛ a nwɔ kitii tee hɛn, nwɔ̨n tii nwəleen ə kɛi yaɠaa kpala lɔi mu, yɛ Israɛlə lɔi kələn. 5 Ŋą́ mo Yálá ɓa, gɛ́ mą: «Ną́mu Yálá! Ŋą́ą́ ə́ hu hon, nɛɛ yɛ́, akɛ ya wala gɛ, ə́ wɔ nu kpulu logoloi ŋɛ̨i hvo pai lɛɛi yɛnɛ̨ɛ̨.» 6 Mɛ̨nįi Yai-Laa ə kɛi pa gɛi, ə mąąhvalin, yɛ mą́ą́: «Yii ŋɛ̨i nwɔ̨nɔ̨ ə́ gaa, hvo pai kɛi tii.» Amɔsə nwɔ hįį ɉaaɓanaa ə kɛ a pɛlɛ́ tɔɔ kinɛ kɔ́w 7 Mɛ̨nį Yai-Laa ə nɛ mą́ą́ hįį pələ nwɔ̨nɔ̨, ya ka: Yai-Laa yaa kpinįi, ŋį́ gaa tɔɔni pɛlɛ nwąną ta mɛ̨i, pɛlɛ́ tɔɔ kinɛ̨ kɔ́w yɛ ɓo ɲəi. 8 Ə mą́ą́ləngɛ, yɛ mą́ą́: «Amɔsə! Lə ɓə ŋɛ̨i ə́ kaa gaai ɲə́i?» Ŋą́ nwoo ŋąąpənə, gɛ́ mą: «Pɛlɛ tɔɔ kinɛ̨ kɔ́w ka tii!» Yai-Laa yɛ mą́ą́: «Bɛlɛ tɔɔ kinɛ̨ kɔ́wi ŋɛ̨i ɓə, nwɔ́ nuą ŋɛ̨i a Israɛlə nu huwu, gáá pai di mąąkpɛɛi la, akɛ di haŋąąi. Mąąhɔlɔɓo, akɛ ŋį́ hɔn gaa diɛ, və́ kɛa pai di mąąhvaalɛɛi. 9 «Ɓɛiɠaai kpɔ Isaakə huwu a kɛ hali kɔ́i laa, gáá nąą kəlee taɠai. Gáá Israɛlə nu huwu di wɔ haláá kulɔiɠaa taɠai, ɛlɛɛ, ŋį́ pɛlɛ Ɉeroboamə yəi bɛlɛ́n nuą diɛ a kɔ́.» Haláá laa həli mun Amasia ə lɔ Amɔsə kili 10 Nąąlɔwai, Amasia ŋɛ̨i kɛ a haláá laa həli mun Betɛlə daai, ə wɛlɛɛ tɔɔ Israɛlə tɔɔmun Ɉeroboamə pɔ, yɛ mą: «Amɔsə kaa bɔ, ə ə́ wɔ tɔɔlaai kulɔ ə́ yəi Israɛlə lɔi hu, nɔi nuą kəlee di hvo kɛa pɛli di wəli tɔɔi nwoo ɓa. 11 Yii Amɔsə kaa moi, ya ka, yɛ: «‹Ɉeroboamə kaa pai lɛɛi kɔ́ hu, ɛlɛɛ, di Israɛlə nu huwu hon a luwɔ, di li a diɛ lɔi takpɛli hu.›» 12 Nąąlɔwai, Amasia ə mo Amɔsə ɓa, yɛ mą: «Yɛ́i ŋɛ̨i Yálá a kɛ mɛ̨nį lɛi yɛ́, həɠə ɓɛ yiihu, pu, ə́ li Ɉuda lɔi hu; naa nwɛi, ya li laa, ya kɛ Yálá mąą mɛ̨nį ɓoi nuą diɛ, yɛ́ kɔ̨nɔ̨n ɉɔlɔɓo yɛ́ mįi. 13 Kɛlaa, Betɛlə daai ɓɛ, hvo kɛa pai pɛli Yálá mąą mɛ̨nį ɓoi ɓɛ daai, mąąhɔlɔɓo, ɓɛ kaa a tɔɔmun nwɔ haláá kulɔi, da nwɔ tɔɔ hee taa.» 14 Amɔsə ə Amasia woo ŋąąpənə, yɛ mą: «Və́ a Yálá kwəi mɛ̨nį hu kulɔ mun, və́ nwɔ̨nɔ̨ a Yálá kwəi mɛ̨nį hu kulɔ mun da lon. Mąąhɔlɔɓo, gáá a ɓɛlaa tɔɔ mun, gɛ́ ɓo a ɓɔɔla yɛa laa mun. 15 Kɛlaa, nwɔ́ taatɛlɛɛɠaa pulu ɓə ŋį́ lɛɛ laa, Yai-Laa yɛ də́li, də́lii tii ə mo, yɛ mą́ą́: ‹'Li! Ə́ mą́ą́ mɛ̨nį hu kulɔ nwɔ́ nuą ŋɛ̨i a Israɛlə nu huwu diɛ.› 16 Yili ɓa, Amasia, ə́ wəli tɔɔ, yii Yai-Laa kaa moi ə́ mɛ̨n, yɛ́i ŋɛ̨i kɛi diɛ: ‹Və́ kɛa Yálá mąą mɛ̨nį laa həli Israɛlə nu huwu diɛ, ɛlɛɛ, yɛ́ kɛ mą: Və́ haŋą Isaakə huwuhu nuą diɛ.› Yii Yai-Laa kaa moi ə́ mąą mɛ̨nį hu, ya ka; 17 yɛ diɛ: «‹Yɛ́ Amasia, ə́ nɛ̨ą kaa pai kɛi a wɛlikɛnɛ̨ɛ̨nu kɛnɛ̨ ɓɛ daa lee hu. Ə́ lon ɉinąą da ə́ lon nɛ̨ɛ̨ą di kaa pai lɛɛi kɔ́ hu; di kaa pai ə́ wɔ lɔi ŋąąkwɛlɛi a yɛli. Ə́ wɛi tii nwɛi, lɔi yii di hvo Yálá kɔ́lɔn ɉu, naa ɓə ə́ kaa pai haai laa, yili pulu, di kaa pai Israɛlə nu huwu kəlee hon ɉi a luwɔ, di li a diɛ lɔi takpɛli hu.›» |