Amɔsə 6 - Yálá laawoo hɛɓɛ (dc)

Kpalo yii mɛlaai Israɛlə hɛn gɔw nąmɛ̨ną da nu kpɛa-kpɛaa diɛ

¹ Kpalo ɓɛlaai kaa, Siɔn daai hee ɓo nuą, kaai ka káá ka nɛɛ nu. Kaai gaa ka kwəi, ka káá ka nɛɛ hu, Samari yeeɠaa tonna. Gaa yɛ kiɛ, kaa ɓə ka laa tɛɛ hį́iɠaa lɔwai, Kaai a Israɛlə nu huwu ɲɛ̨i tɔwɔ nuą.

² Ka li Kalne daai, mɛ̨nįi kɛi laa, ka gaa. Ka həɠə laa, ka li Hamatə daa lee hu, Yili pulu, ka yɛɛ Gatə daai Filisti nuą pɔɔli. Ka li, ka nąą kəlee mąąkpɛɛ. Kɛlɛi ka wɔ lɔi kɛnɛ̨i dɛɛ di wɛi ɓa ee! Ɛlɛɛ, ka hviɛlaɓoɔ diɛ.

³ Gaa ka kwəi kaa, ka káá mɛ̨nį ɲɔ̨n mąą kwɛai kaa, kɛlaa, kaa toomɛ̨i maa kpuɔ kaa.

⁴ Ka káá laani ka wɔ kanąnbeeɠaai ŋą yii nwəli la laai a hə́lə́ ɲįn, Ka laa kpəlin gbɛa kpɛaa hu, Kaa ɓɛlaa gbɔnŋąą mįi, Da Nįŋɛ̨ gbɔn nwulaaɠaa.

⁵ Kaa gwɛnįn nwələ too yɛ wəli wolo nuą. Yɛ pələi Davidə ə gɛ la, kaa kpɛli, kaa hvɛli kɛ hɛn nįnɛ̨ɠaa pɛli a ka wɔɔ.

⁶ Ka lɔɔ kpələ, ka nɔɔ kpo kpələ gɔwɔ hu, Wulɔ yii gun nɛɛi dɛɛ gɛi ɓa, ya ɓə ka ka mąąti la. Kɛlaa, Ɉosɛfə huwuhu nuą kala mɛ̨nį, yili niihɛlɛn va too kaa.

⁷ Yili ɓə gaa mą, kaa ɓə pai kɛi nuwɔɠaa ɲɛ̨itɔwɔ kaa li luwɔlaa hu. Yili ɓə pai kɛ a viɲɛ̨ nuąi tii di wɔ hɛli puɔ kpɛlai.

Samari taa wolo mɛ̨nį

⁸ Nąmu Yai-Laa aa gwɛla a gbɔwɔ, yɛ mą: Ɲą́ą́ Yai-Laa, ɲą́ą́ ɓə gáá a Mɛ̨nį Kəlee ŋą Hééɓomun Yálá! Ɉakɔbə nwɔ huɲąŋą kɛnɛ̨ wɛli hvo mą́ą́, Di wɔ tɔɔ pɛlɛ́ɠaai wɛli hvo mą́ą́. Gáá pai daa lee da ɉu hee ɓo nuą kwɛlii di yowoɠaa diɛ.

⁹ Nu pow a pa lɛɛi pɛlɛ tɔ̨nɔ̨ mu, gəlee da haa.

¹⁰ Nąąlɔwai, nuą tii haa, di wɔ nu ta a pa, yɛ nu powaɠaa kulɔ bɛlɛ́n, nu tɔ̨nɔ̨i a lɛɛ bɛlɛ́n, da mąąnįn gɛ, diɛ mą: «Da kaa laa?» Ə nwoo ŋąąpənə yɛ mą: «Da hvo ɓɛ», diɛ mą: «Ə́ laa pilɛ». Mąąhɔlɔɓo, Yai-Laa laa ɓoi lɔwai hvəi.

¹¹ Ka gɛ a nɛlɛɛ, mąąhɔlɔɓo, mɛ̨nį Yai-Laa ə mo, ya ka: Bɛlɛ kɛnɛ̨ kaa pai pui, bɛlɛ logolo ə ɓɛla.

¹² Akɛti, hoo a mɔ̨ɔ̨ gilɛ həɠə kwɛni kpuwuluɠaa mɛ̨i? Akɛti da mɔ̨ɔ̨ pɛli kɛɛ hii a gboloyá ŋąą? Lə mɛ̨nį ɓa, ka mɛ̨nį haŋąą mąąhvalin a pilimąą? Ɛlɛɛ, kaa tɛ̨ą mąąhvalin a nɛ̨ŋɛ̨n naa?

¹³ Lə mɛ̨nį ɓa, ka káá ka kwəinɛ̨ɛ̨i kpɛli-kpɛli mɛ̨nį hu? Kaa kɛ mą: «Kɛlɛi, ku wɔ huwalawala ɓə ku yee ə tɛɛ la Karnaimə ɓa a hvaŋą?»

¹⁴ Yili ɓə gaa mą, ɲą́ą́ Yai-Laa Mɛ̨nį Kəlee ŋą Hééɓomun Yálá, mɛ̨nįi gáá pai gɛi a Israɛlə nu huwu, ya ka: Gáá pai lɔi takpɛli hu nuą lii muhəɠəi, di kɔ́ pɛlɛ kaa, di kaa pai mɔ̨nɔ̨ laai ka mɛ̨i, ə həɠə Lebo-Hamatə ka wɔ lɔi ɲɛn ɉu, ɲələi pələ, ə yɛɛ la, Ɉurdɛn ɲa-ɓoloon bɔ.