Amɔsə 4 - Yálá laawoo hɛɓɛ (dc)

¹ 'Ka ka wəli tɔɔ nwooi ŋɛ̨i ɓa, kaai a Samari nɛ̨ąą, a Basan nįŋɛ̨ haaɠaa. Ka kɛ tooi mąąwɛli nuą mɛ̨i, kaa di kwɛlin ɉəɠə, kaa di laanɔ̨nwɔ̨ ɓo, kaa kɛ ka hilɛni diɛ: «Ka pa a hɛn da, ku gbələ.»

² Yaan, Ną́mu Yai-Laa aa gwɛla a gbɔwɔ, yɛ diɛ: Hvoló ta kaa pai ɉəlii, di kaa pai ka tooi, diɛ ka yala nɔi ɓa yɛ hɔ̨nwɔ̨lee a kɛ kwɛli ɓa, di ka lonni hon a hɔ̨nwɔ̨lee kwɛli,

³ ka káá pai kɛi kulɔi ɉįi wolo ɓa, kaa kulɔ ka wɔ tɔɔ pɛlɛ́ɠaa mu. Yai-Laa woo li.

Israɛlə nu huwu kili walawalaai

⁴ Ną́mu Yai-Laa yɛ nwɔ̨nɔ̨ diɛ: Israɛlə nu huwu, ka li Betɛlə ka ka liiɓa nɛ̨ŋɛ̨n gɛ, ka li Gilgalə, ka nɛ̨ŋɛ̨n gɛ kpɔ kɛnɛ̨. Yələwala pɔ kəlee, ka pa a ka wɔ haláá hɛnŋąąi, ka naa həli voló ɉaaɓa yələ, ka pa a ka wɔ hɛn bow nąą, ka naa həli

⁵ Lɛɠɛ yiiɠaai da gulɔ Yálá ɓa a haláá, ka dɛ hɛn bu ɉu, ka pa ka gələn, kɔ́ ɓo hɛn ka káá bɔ ka naa həli mą, ka ɉələ kɛ mɛ̨i, hvo gaai, yili ɓə nwɛli kaa kaa. Yai-Laa woo li.

⁶ Ną́mu Yai-Laa yɛ nwɔ̨nɔ̨ diɛ: Bələi mąn ŋį́ pulu too la ka wɔ taaleeɠaai hu, kɔ̨nɔ̨n golo ə too ka yəi bɛlɛnŋąą, pələi mąn ŋį́ gɛ la tii, ka ta hvo giliŋąhiɛ, hvo pənə hvo pa bɔ́.

⁷ Ną́mu Yai-Laa yɛ nwɔ̨nɔ̨ diɛ: Ɲą́ą́n, ɓɛlɔwai ɛlɛɛ kɛa la a ɲąnin ɉaaɓa, ka wɔ hihɛnŋąąi ma kulɔi lɔwai yɛ ɉəli, və́ gɛ, və́ tulɔ pu mą. Ŋą́ tulɔ pu daa taɠaa hu, ŋį́ daɠaa lɛɛ, tulɔ ə pu yɛɛkɔwɔ taɠaa hu, daɠaa di lɛɛ, diɛ kpala.

⁸ Taa hveelɛ ɉaaɓa di kɛi li taa takpɛli hu, ə gɛ, di kpələ ya hɔlɔɓo, kɛlaa, di hvo kɛi ɉɔlɔɓo kɛnɛ̨. Kɛlaa, ə mą kɛ tii, ka hvo gɛ li, ka hvo pənə, ka hvo pa bɔ́. Yai-Laa woo li.

⁹ Ną́mu Yai-Laa yɛ nwɔ̨nɔ̨ diɛ: Ŋą́ hvaa mą kolo ə lɔ ka wɔ hihɛnŋąąi hu, ka wɔ hihɛnŋąąi di kpala ɲeą, ka wɔ hihɛn ɲeaɠaai, ka wɔ viɲə yɛaɠaai, ka wɔ ɓolaa wuluɠaa da ka wɔ olivə wuluɠaai, peeləɠaa da gəlee laa mįi. Kɛlaa, pələi mąn ŋį́ gɛ la tii, ka hvo gɛ li ka hvo pa bɔ́. Yai-Laa woo li.

¹⁰ Ną́mu Yai-Laa yɛ nwɔ̨nɔ̨ diɛ: Gwəikulɔ ɲɔ̨n ŋɛ̨i ta ŋį́ bɛlɛ Eziptə nuą diɛ, yili ɲɔ̨nwɔ ma mə ŋį́ hvaa mą, ə pɛlɛ kaa, ŋį́ hvaa mą, ka wɔ hilɛlɛaɠaa di lɛɛ kɔ́ hu, di ka wɔ hooɠaa həɠə a kɔ́ pulu hɛn. Nu powa kun yɛ tɛ ɓɛi ka wɔ kɔlaɠaɠaai di kɛ laa. Kɛlaa, pələi mąn ŋį́ gɛ́ la tii, ka hvo gɛ li, ka hvo pənə, ka hvo pa bɔ́. Yai-Laa woo li.

¹¹ Ną́mu Yai-Laa yɛ nwɔ̨nɔ̨ diɛ: Mɛ̨nii ɲąąnwąnąą ɲą́ą́ Yálá ŋį́ naa Sodomə taa da Gomorə taa diɛ, yili ɲɔ̨nwɔ̨mąn mə ŋį́ naa kaa. Kɛlaa, ŋį́ ka nwun mąąɓo, ka kɛ yɛ kwɛituwɔ tɔ̨nɔ̨ kulaa kpaɠa nwɔ̨n ɉu. Kɛlaa, pələi mąn ŋį́ gɛ la tii, ka hvo gɛ li, ka hvo pa bɔ́. Yai-Laa woo li.

¹² Ną́mu Yai-Laa yɛ nwɔ̨nɔ̨ diɛ: Yili ɓə gaa mą, Israɛlə lɔi hu nuą, bələi gáá pai ka hon ɉii la, kaa kpinįi ka káá pai gbaɠala kaa. Yɛ bələi gáá pai mɛ̨nį laai la kaa, ka kili yɛ ɓo ɉu, 'ka ka kpɔwɔ pɛli, ka ka wɔ Yálái ka káá pai kwiɛn ɉii.

¹³ Mąąhɔlɔɓo, Yálái ŋɛ̨i yeeɠaa tɔɔ, ə hvaŋą kulɔ, ya ɓə a nwɔ kiliŋąhiɛ loɔ lɛ nu ɓa, Ya ɓə a yələwala mąą pənə a kpinį, yɛ hiɛ yeeɠaa ton na, mąą Yálái tii laa ɓaa: Yai-Laa Mɛ̨nį Kəlee ŋą Hééɓomun Yálá.