Amɔsə 3 - Yálá laawoo hɛɓɛ (dc)Kiti yii gaa pai 1 'Ka ka wəli tɔɔ Israɛlə nuą, kaa ŋɛ̨i Yai-Laa ə ka kulɔ Eziptə lɔi hu luwɔlaa hu ə pa a kaa, Yai-Laa yɛ: 2 «Lɔi mɛ̨i heeɓo nuą kəlee lɔwai, kaa tɔ̨nɔ̨ gbən ɓə ŋį́ ɲɛ̨́i lɛlɛɛ hee kaa, yili mąą mɛ̨nį ɓa, mɛ̨nį ɲɔ̨nŋąąi kpɔ kaa gɛ, ka káá pai gwɛlan mo kɛi mą́ą́.» 3 Akɛti, nu hveelɛ da pɛli di pələ kpɔn yii di woo hvo laa li mą? 4 Akɛti yala a pɛli huluun ɉii wəla hu, akɛ hvo gɔ̨nɔ̨n gaa li? Akɛti, a pɛli huluun ɉii nwolo hu, akɛ hvo hɛn da hon ni? 5 Nwɛ̨ni a mɔ̨ɔ̨ too mąląąn ŋą, akɛ niiɓa hɛn və laa? A pɛlɛ gee la akɛ hɛn da hvo too li ɉu? 6 Da pɛli mɔ̨ɔ̨ di kɔ́ tulu hvɛɛ taai yii daai nuą hu hva pu diɛ? Mɛ̨nį nwąnąą ta a pɛli ə laa ta ɓa, akɛ hvo həɠə li Yai-Laa pɔ? 7 A tɛ̨ą, Yálá hva mɛ̨nį lɔpee ta kɛ nuą tɛɠii, akɛ hvo nɛ li nwɔ tínuąi a gwəi mɛ̨nį hu kulɔ nuą diɛ. 8 Yala a kɛi huluun, gbɛɛ ɓə hva ɲɔw? Akɛ Nąmu Yai-Laa a gwəi mɛ̨nį ɓo, gbɛɛ ɓə a lənə naa həlii? Samari kiti tee mɛ̨nį 9 Ka noloi ŋɛ̨i ɓo Asdɔdə lɔi dɔɔ kwəliɠaa hu, ka mo Eziptə lɔi dɔɔ kwəliɠaa hu, kaa mą: «Ka ka ɲąą kpɔn Samari taa nwɔ yeeɠaai ɓa, ka daa tii nwɔ kɛɛ kalaaɠaa mɛ̨i kaa, da nwɔ toomɛ̨i kɛɛ.» 10 Yai-laa yɛ diɛ: «Samari hee ɓo nuą di hvo mɛ̨nį haŋąą kɛ pələ kɔ́lɔn, yiiɠaai kpɔ da ɉɔlɔɓo toomɛ̨i hu, ya ɓə da nɔ di wɔ tɔɔ pɛlɛ́ɠaai mu.» 11 Yili ɓə gaa mą, Ną́mu Yai-Laa yɛ diɛ: «Ka yowoɠaa kaa pai ka wɔ lɔi mąątínɛ̨n ɉii, di tɛɛ ka yee ɉįi la, di ka kɛlɛ, di too ka wɔ tɔɔ pɛlɛ́ɠaai mɛ̨i.» 12 Yai-Laa yɛ diɛ: Pələi lɔ tii Yala a ɓɛlaa hon na, mɛlaa pulu mun nwɛi ɛlɛɛ a gɔwɔ-kwana hveelɛi, a wala kɛ tii, nwəli kpuɔ, Israɛlə nu huwui di heɛ kaa Samari daai, pələ lɔ ɓə gaa pai kɛi la a diɛ, diɛ yiiɠaai di kaa heeni gbəlin gbɛa kpɛaa hu, a wala kɛ tii, di laa kpin nɛlɛɛ ŋą. Gbəli wolo lɔ ɓə nwun maa kaa pai ɓoi. Kili pu ɉu mɛ̨nį 13 Yai-Laa Mɛ̨nį Kəlee ŋą Hééɓomun Yálá, yɛ diɛ: Ka ka wəli tɔɔ, ka gili pu ɉu mɛ̨nįi ŋɛ̨i laa həli Ɉakɔbə yəi bɛlɛ́n nuą diɛ, 14 hvólói gáá pai Israɛlə nu huwu di wɔ mɛ̨nį ɲɔ̨n ŋɛ̨i kiti teei la, gáá pai Betɛlə nwɔ haláá kulɔi kiti teei, gáá pai ɉaláá kulɔiɠaa wəli yali diɛ, ŋį́ di pu nɔi ɓa. 15 Vaŋą ɲɔ̨nwɔ̨ɔ̨ tɛɛ lɔwai, bɛlɛ́ɠaai da kɛ di nwun mąą kilɛi mu, ŋį́ gəlee wolo, ŋį́ di wɔ hvóló laa teɛ pɛlɛ́ɠaai wolo. Ŋą́ di wɔ hə́lə́ ɲįn bɛlɛ́ɠaai wolo, ŋį́ di wɔ pɛlɛ kpɛa kpɛai pu. Yai-Laa woo li. |