Amɔsə 1 - Yálá laawoo hɛɓɛ (dc)

Ɉɛɓɛ́ kɔ́wɔ tɔɔ woo

¹ Amɔsə ŋɛ̨i kɛ a Tekoa daai mun, yɛ ɓɛlaa tɔɔ, ya ɓə Ną́mu Yai-Laa ə wɛlɛɛ ɓo mą, yɛ hvilɛn na Israɛlə ɓa; ɓɛlɔwai Oziasə ə kɛ la a Ɉuda nɔi tɔɔmun, ɛlɛɛ, Ɉeroboamə ŋɛ̨i kɛ a Ɉoasə lon, ə ɓo a Israɛlə nɔi tɔɔmun. Di nwɛlɛɛi tii ɓoɔ mą, kwɛlan veelɛ tɛɛ pulu ɓə, nɔi ə kpɛlinŋąą kɛnɛ̨ ə kɛ la.

² Amɔsə tii hvaa woo ka, yɛ diɛ: Yai-Laa kaa haŋąi Siɔn taa ɓa, nwoo yɛ tɛ Ɉerusalɛmə daai yɛ yələgbaląą. Ɓɛlaa pulu nuą di wɔ ɓɛlaaɠaai laa míí, gala mąą aa wɛli. Karmɛlə Yee ton na aa kpala.

Yálá ə haŋą Israɛlə ɓa da gwɛlɛ lɔiɠaa

³ Yai-Laa woo ka, yɛ: Mɛ̨ni tɔ̨nɔ̨ hvəi gɛi gɛ́ haŋą Siri nuą ŋɛ̨i Damasə daai diɛ, gaa kpɔ a mɛ̨nį haaɓa, kpɔ hɔlɔmun nąąn. Mɛ̨nįi ŋį́ gbən dee, və́ pai ɉəɠəi mą. Mąąhɔlɔɓo, daa Galaadə nuą kpɛŋɛ̨n a kwɛli taŋąn.

⁴ Gáá pai nwɔ̨n dooi Hazaɛlə yəi bɛlɛ́n Hazaɛlə nwɔ pɛlɛ́ kpɛa-kpɛai Bɛn-Hadadə kaa mąąkpɛi, gəlee diɛ kələn.

⁵ Gwɛliɠaa ŋɛ̨i Damasə ɉįi laakpulɔɔ la, gáá pai di hu yalii. Gáá pai Bikeatə-Awɛn hee ɓo nuą nwun na pilii, da Bɛtə-Edɛn tɔɔmun. Yili pulu, Aramə nuą kaa pai li Kirə lɔi hu luwɔlaa hu. Yai-Laa woo li.

⁶ Yai-Laa woo ka, yɛ: Mɛ̨ni tɔ̨nɔ̨ hvəi gɛi gɛ́ haŋą la Filisti nuąi ŋɛ̨i Gaza lɔi hu diɛ, gaa kpɔ a mɛ̨nį haaɓa, kpɔ hɔlɔmun nąąn. Mɛ̨nįi ŋį́ gbən dee, və́ pai ɉəɠəi mą. Mąąhɔlɔɓo, di nu kpulu kɛnɛ̨ həɠə taaɠaa hu, diɛ di lɔwɔ́tɔɔ Edɔmə nuą diɛ.

⁷ Gáá pai nwɔ̨n dooi Gaza daa lee hu, nwɔ̨n tii ə nwɔ tɔɔ pɛlɛ́ɠaai kəlee kələn.

⁸ Gáá pai Asdɔdə nuą kəlee nwun na pilii, da Askelɔn tɔɔmun. Ŋą́ hiɛ Ɛkrɔn nuą mɛ̨i. Yai-Laa yɛ diɛ: Filisti nuą gbəli woloi a lɛɛ, di nwun na a pili.

⁹ Yai-Laa woo ka, yɛ: Mɛ̨ni tɔ̨nɔ̨ hvəi gɛi gɛ́ haŋą Tirə ɓa, gaa kpɔ a mɛ̨nį haaɓa, kpɔ hɔlɔmun nąąn. Mɛ̨nį ŋį́ gbən dee, və́ pai ɉəɠəi mą. Mąąhɔlɔɓo, nwɛli kɛ maa mįnɛ̨i ŋɛ̨i da Israɛlə nuą di ɉəɠə di kee ɓa, di hvo bɔ mɛ̨nį kɛ li; daa taa tamąą hu nuą həɠə diɛ di kwɛlɛ Edɔmə nuą diɛ.

¹⁰ Gáá pai nwɔ̨n dooi Tirə daa lee hu, nwɔ̨n tii kaa pai nwɔ tɔɔ pɛlɛ́ɠaa kəlee kələn ɉii.

¹¹ Yai-Laa woo ka, yɛ: Mɛ̨ni tɔ̨nɔ̨ hvəi gɛi gɛ́ haŋą Edɔmə nuą diɛ, gaa kpɔ a mɛ̨nį haaɓa, kpɔ hɔlɔmun nąąn. Mɛ̨nį ŋį́ gbən dee, və́ pai ɉəɠəi mą. Mąąhɔlɔɓo, di hvilɛn di kaayɔwɔɠaa Israɛlə nuą pulu a kɔ́. Di damaa paa, di hvo di ɲɛ̨imąąwɛli kaa, mąąhɔlɔɓo, di wɔ liikələn gwəi hvo kpəla kɛɛ kalaa ɓa, ɛlɛɛ, nwɔ mɛ̨nį hva kpɛɛ.

¹² Gáá pai nwɔ̨n dooi Tema daai, nwɔ̨n gaa pai Bɔsra taa nwɔ tɔɔ pɛlɛ́ɠaa kəlee kələn ɉii.

¹³ Yai-Laa woo ka, yɛ: Mɛ̨ni tɔ̨nɔ̨ hvəi gɛi gɛ haŋą Amɔn nuą diɛ, gaa kpɔ a mɛ̨nį haaɓa, kpɔ hɔlɔmun nąąn. Mɛ̨nį ŋį́ gbən dee, və́ pai ɉəɠəi mą. Mąąhɔlɔɓo, di Galaadə koonɛ̨ąɠaa kwəi ɓɛla, ə gɛ, diɛi tii, di di wɔ lɔi ta kɛ mą.

¹⁴ Yili ɓə gaa mą, gáá pai nwɔ̨n dooi Raba daai, nwɔ̨n ə di wɔ tɔɔ pɛlɛ́ɠaai kəlee kələn. A kɛ a kɔ́ yələ, ɓɛlɔwai kɔ́ mɛ̨i wɔlɔ woo a kɛ tɔɔi la, a tulɔ hvaŋą kɛnɛ̨ tɛɛ yələ,

¹⁵ da di wɔ tɔɔmun hon, di li la luwɔlaa hu, da nwɔ nwun nąmɛ̨ną.