Zɔ̂ŋ Zaaƃai 1 - Yálá laawoo hɛɓɛ (dc)

Túwɔ́-woo

¹ Ɲą́ą́i a nu pɔlɔ-pɔlɔ, ɲą́ą́ ɓə ɉɛɓɛ́i ŋɛ̨i tɛɛi Gaiusə ɓa, yai nwɛli kaa mą́ą́ tɛ̨ą ŋą kɛɛ pono hu.

² Nwɛ́likɛmąąmun, gɛ́, ə́ mąą mɛ̨nį kəlee hu ə nɛ̨ɛ̨, ə́ kɔ́lɔi ə pono, ə́ nįį ə kɛ lɔ tii nɛ̨ɛ̨ hu.

³ Bələi tɛ̨ą mɛ̨nį aa too la pono ɲą, ə́ wɔɔ yɛnɛ̨ɛ̨ kɛ pələ hu, gu nąn nonnii taɠaa di pa ɓɛ, di ə́ mąą kɛla hvaa ɓo, yili ə gwə́inɛ̨ɛ̨ kpɔ kɛnɛ̨; ə́ kaa hiɛi tɛ̨ą kɛɛ pono hu.

⁴ Yii kpɔ gwə́inɛ̨ɛ̨ kɛnɛ̨ɛ̨, ya ɓaa, nónnii kaa hiɛi tɛ̨ą kɛɛ pono hu.

⁵ Nwɛ́likɛmąąmun, ə́ kaa tuwɔi yɛ́ bɛli ə́ wɔɔ laa na laa ɓa, a nąn nonnii hon yá mo a nɛlɛɛ, ə mą kɛ, nwɛ̨ąą.

⁶ Da ə́ wɔɔ wɛlikɛmąą laa mąą kɛla mąą hvaa lɛlɛɛ ɓo gbɔn nonnii kəlee ɲɛ̨i ɓa. Yá kɛ gɛi a nɛlɛɛ, a di mąąkpɔnmąaɓoi yá mo di wɔɔ hiɛ mɛ̨nįɠaa hu, yɛ bələi mąąnɛ̨ɛ̨i la Yálá ɲɛ̨i ɓa.

⁷ Mąąhɔlɔɓo, Naa mąą mɛ̨nį ɓə di hvilɛnŋąąi la ɉiɛi tii hu, di hvo hɛn da hon ni huwu takpɛliɠaa yəi.

⁸ Guɔ kpɔ ɓə gu mąąnɛ̨ɛ̨i gu mąąkpɔnmąą tɛɛ nuą tii pɔ, ə gɛ, gu gu kpɔwɔ lɛ diɛ a dɛ̨ą tii mąą kóló kɛ nuą, yɛ diɛ.

⁹ Ŋą́ hɛɓɛ tɛɛ gbɔn ma. Kɛlaa, Diotrefɛsə, yai gbɔwɔ tɛ mɛ̨nį tɔwɔ wɛli kaa mąi, hvo ku kɔlɔn ni.

¹⁰ Yaan, ŋą́ pa pai, yaa tii woo ɲɔ̨n moi a ku laai, ŋą́ gɛmɛ̨nįɠaa too pono ɲą, ɛlɛɛ, yili hvo kpɛli nii hon ni, hva ɲee hee di mu, ɛlɛɛ, nuąi da kɛ di di yee hee di mu, ə kpɛ̨ąn ɉu, ɛlɛɛ, yɛ di kpɛ gbɔn ɉu.

¹¹ Nwɛ́likɛmąąmun, 'hvó mɛ̨nį ɲɔ̨n pɔɔ kɔɔn, kɛlaa, mɛ̨nį lɛlɛɛ pɔɔ kɔɔn. Nui a mɛ̨nį lɛlɛɛ kɛ, Yálá nwɛi ta li; nui a mɛ̨nį ɲɔ̨n kɛ, hvo Yálá kɔlɔn.

¹² Yii ɓaa Demetriusə nwɛi, nu kəlee da mąą kɛla hvaa lɛlɛɛ ɓo. Tɛ̨ą yaa kpinįi a kɛ mąą kɛla hvaa ɓoi. Ɛlɛɛ, kuɔ kpɛlimąn, kwa mąą kɛla hvaa ɓo, ə́ kili kaa ɉu, ku wɔɔ kɛla hvaa kaa a tɛ̨ą.

¹³ Mɛ̨nį tamąą kaa kɛ gwə́i gɛ́ kɛ ŋį́ mo, kɛlaa, və́ bɔ və́ gəlee pɛ̨ɛ̨ a hɛɓɛ́-yá, da hɛɓɛ́-kpɔw,

¹⁴ Mąąhɔlɔɓo, gáá bɔ ŋą́ pa ŋą́ ɲɛ̨́i too yɛ́, ɛlɛɛ, gu lono kɛ gee ɓa.

¹⁵ Liilaa ə kɛ ə́ yəi! Gu ɓɛlaa diɛ ə́ tuwɔ ɓo. Gu ɓɛlaani di kaa laa, ku gəlee tɛitɛi túwɔ́ɓo, nu kəlee da mɛlɛ.