Tɔɔɓɛlaa veelɛ 9 - Yálá laawoo hɛɓɛ (dc)Ɉehu mąą mɛ̨nį Ɉehu hee mɛ̨nį a tɔɔmun 1 Yálá kwəi mɛ̨nį hukulɔ mun Elise ə nwɔ kalan non dɔ̨nɔ̨ təli, yɛ mą: «Ə́ hąą yili, ə́ nwulɔ kpowo həɠə, ə́ li la Ramotə Galaadə lɔi hu. 2 Yá li, gɛ pələ kwɛli mą ə́ həli Ɉehu ɓa, yai a Ɉosafatə lon, yai tii a Nimsi mąnįn. Yá həli mą, ə́ dəli, ə́ gulɔ nąn nonnii lɔwai ka yáá ka li pɛlɛ́ lon da mu ka tɔ̨nɔ̨ kɛɛ nąą. 3 Ə́ nwulɔ kpowo həɠə, ə́ nwulɔ pu nwuɔ̨, ə́ mąąti la; yɛ́ mą: ‹Mɛ̨nįi Yai-Laa ə mo ya ka: «Nwulɔi ŋɛ̨i gáá nɔi yɛ́, ɉaalai, yáá kɛ a Israɛlə tɔɔmun.»› Yili pulu, ə́ bɛlɛ́ laa ɓo, ə́ tɛɛ a gilɛ, hvo nąą mąąkpɔn.» 4 Ɉulɔnon tii, yai a Yálá kwəi mɛ̨nį hukulɔ mun, ə tɛɛ yɛ li Ramotə Galaadə lɔi hu. 5 Ə həli kpɔlɔɔ, ə Israɛlə nwun nąmįną kaa diɛ nwun dɔɔ kɛ. Yɛ diɛ: «Mɛ̨nį kaa ná, gɛ́ ŋą́ mo yɛ́ ną́mu!» Ɉehu yɛ mą: «Ku tamąą ŋɛ̨i ɓɛ, gbɛɛ ɓə?» Ɉulɔnon tii ə nwoo ŋąąpənə yɛ mą: «Yɛ́ ɓə ną́mu!» 6 Ɉehu ə muhəɠə da yaa di lɔ bɛlɛ́n. Ɉulɔnon tii ə nwulɔ pu Ɉehu nwun mą, ə mąąti, yɛ mą: «Nwooi Yai-Laa Israɛlə nwɔ Yálá ə mo, ya ka, yɛ diɛ: ‹Nwulɔi ŋɛ̨i haalai, gáá ə́ kɛi a nwɔ́ nu huwui Israɛlə nwɔ tɔɔmun. 7 Yɛ́ ɓə pai ə́ nwun nąmu Akabə huwu pui, ə́ Yálá kwəi mɛ̨nį hukulɔ nuą ɲąmą nwąną kulɔ, da Yai-Laa nwɔ tínuą ɲąmą, yai Ɉezabɛlə ə bui. 8 Akabə nwɔ pɛ́lɛ́i kəlee kaa pai woloi. Akabə yəi bɛlɛ́n ɉulɔnu, ə kɛ a bɛlɛ́n non, ə kɛ a luwɔ lon, ŋą́ gəlee huwu pu. 9 Gáá pai Akabə nwɔ pɛ́lɛ́i kɛi yɛ bələi ŋą́ Nevatə lon Ɉeroboamə nwɛi kɛ la; ŋą́ gɛ yɛ bələi ŋą́ Ahiya lon Baesa nwɔ pɛ́lɛ́i kɛ la. 10 Yii ɓaa Ɉezabɛlə nwɛi, yilɛɠaa ɓə pai bowa mįi Izreɛlə ɲɛa. Di hvo pai bowa looi kámą hu.›» Ɉulɔnon tii ə gbɛɛ lɔ, ə bɛlɛ́ laa ɓo, ə tɛɛ a gilɛ. 11 Ɉehu ə kulɔ ə li tɔɔmun nwɔ tínuąi pɔ, yiliɠaa diɛ mą: «Gu mɛ̨n nąą bələ! Lə mɛ̨nį ɓə mowomun ə paa la ə́ pɔ?» Ɉehu yɛ diɛ: «Kaa kpinįi ka nui kɔ́lɔn, da nwoo tɔ̨nɔ̨i lɔ gaa na!» 12 Di pənə diɛ mą: «Ə́ kaa lɛɛ kɛi! Ə́ woo kəlee hukulɔ kuɔ.» Ɉehu yɛ diɛ: «Mɛ̨nįi ə mo mą́ą́, ya ka; yɛ Yai-Laa woo ka: ‹Nwulɔi ŋɛ̨i gáá ɉiɛi yɛ́ ɉaalai, ŋą́ą́ ə́ kɛ a Israɛlə tɔɔmun.›» 13 Daa mąn nɛɛ mą, daa di wɔ həɠəɠaai kulɔ di kwąną, diɛ bɛlɛ gɔwɔ mu, ɛlɛɛ, di dulu hvɛɛ, diɛ kɛ mą: «Ɉehu aa kɛ a tɔɔmun!» Ɉehu ə Israɛlə tɔɔmun da Ɉuda tɔɔmun ɛlɛɛ Ɉezabɛlə paa 14 Ɉosafatə lon Ɉehu, yai kɛ a Nimsi mąnįn, ə lɔ Yoramə mąą kilii. Ɓɛlɔwai yili da Israɛlə nuą di kɛi Ramotə Galaadə mąąkpɛ la, Aramə tɔɔmun Hazaɛlə tɔwɔ. 15 Tɔɔmun Yoramə aa kɛ pa Izreɛlə, nwąnąąi ŋɛ̨i Aramə nua di mo gɔ́ mɛ̨i, bala hali kɛ mɛ̨nį ɓa. Nąąlɔwai, Ɉehu yɛ diɛ: «Akɛ, ka tɔɔ li búlú, nu ta hvo kɛ kani gaa kulɔi ɓɛ, yɛ li mɛ̨nįi ŋɛ̨i hukulɔi Izreɛlə.» 16 Yili pulu, Ɉehu ə tɛ nwɔ wotoloi hu, yɛ li Izreɛlə ɓɛi Yoramə ə kɛ laa ɲɔ̨n ɉaɠa ɓa. Ɛlɛɛ, Ɉuda tɔɔmun Akaziasə aa kɛ li laa nwoo pilii Yoramə ɓa. 17 Daa mąąkpɛmun ə kɛ tɔɔni daa mąą kɔ̨nwɔ̨ pɛlɛ́ tona, ə Ɉehu nwɔ nu kpulu kaa diɛ pa, ə wɛlɛɛ tɔɔ tɔɔmun bɔ, yɛ mą: «Gáá nu kpulu kaai!» Yoramə yɛ mą: «Hoo nąmu ta tɔɔ ə li ə di mąąni kɛ, akɛ Liilaa mɛ̨nį ɓə ka káá pai la?» 18 Ɉoo nąmu ə həli diɛ, yɛ diɛ: «Tɔɔmun yɛ: ‹Liilaa mɛ̨nį ɓə ka káá pai la?›» Ɉehu yɛ mą: «Ə́ mąą mɛ̨nį kaa liilaa mɛ̨nį hu? 'Tɛɛ ə́ hvilɛn búlú.» Nąąlɔwai, daa mąąkpɛ mun yɛ tɔɔmun mą: «Nui gu dɔɔ, aa li kpɔ aa həli, kɛlaa, hvo pənə li hvo pa.» 19 Tɔɔmun ə nu veelɛnąą tɔɔ, yili ə li ə həli diɛ, yɛ diɛ: «Tɔɔmun yɛ: ‹Liilaa mɛ̨nį ɓə ka káá pai la?›» Ɉehu yɛ mą: «Yɛ́ lə mɛ̨nį ɓə liilaa mɛ̨nį hu? 'Tɛɛ ə́ hvilɛn búlú.» 20 Daa mąąkpɛmun yɛ tɔɔmun mą: «Nu yili aa hɛli kpɔ diɛ, kɛlaa, hvo pənəi hvo pa. Ɉiɛ kɛ pələi tii kaa yɛ Nimsi lon Ɉehu nwɔ hiɛ kulɔ pələ. Mąąhɔlɔɓo, gaa gilɛ həɠəi a ɓowo pələ.» 21 Yoramə ə mo yɛ di nwɔ wotoloi pɛli; di nɛɛ mą di nwotolo pɛli, Israɛlə tɔɔmun da Ɉuda tɔɔmun Akaziasə, di kulɔ, nu kəlee ə ɓo nwɔ wotolo hu, diɛ li Ɉehu laakwiɛn ɉii. Da diɛni di kwiɛn, Izreɛlə Nabɔtə nwɔ tíi kwɛlɛ. Israɛlə tɔɔmun Yoramə haa mɛ̨nį 22 Yii lɔ Yoramə ə Ɉehu kaa, yɛ mą: «Ɉehu! Liilaa mɛ̨nį ɓəi?» Ɉehu yɛ mą: «Akɛ pələ kɛ ləi a liilaa mɛ̨nį? Ya pa, ə́ lee Ɉezabɛlə nwɔ túwɔ́ pələ ɲɔ̨nŋaa, da nwɔ tɔlikpɛ mɛ̨nį daną-danąi di kaa lɔ ni ɉu.» 23 Ŋąąɓa, Yoramə ə nwɔ wotoloi ɲali bulu, yɛ tomą yɛ kɛ Akaziasə ɓa: «Akaziasə! Lɔgilii ɓə!» 24 Ɉehu ə nwɔ kilɛn ɉəɠə, ə Yoramə ɓon na monwon nɔwai, mɛ̨ɛ̨kɔw ə ɓɔ Yoramə hu, ə ɓo níi hu. Yoramə ə too a bowa nwɔ wotoloi hu. 25 Nąąlɔwai, Ɉehu yɛ nwɔ ɓíitiɛ̨i Bidkarə ɓa: «'Bowa kulɔ nwotolo hu ə́ bili Izreɛlə mun Nabɔtə nwɔ tíi hu.» Ɉehu yɛ nwɔ̨nɔ̨ mą: «Ə́ kiliŋąhiɛ tai, yələ ta, gu kɛ gu kee ɓa, ɲą́ą́ gwa yɛ́ nwotolo hu, gu ɓo Yoramə nąn Akabə yee mu, Yai-Laa ə mɛ̨nį ta ɓo yɛ hvilɛn na Akabə nwɔ pɛ́lɛ́i ɓa. 26 Ŋą́ gaa kpɔ a nɛlɛɛ, Nabɔtə ɲąmą, da nonnii di wɛi mąą mɛ̨nį ɓa, nwooi Yai-Laa ə mo, ya ka: ‹Díi tɔ̨nɔ̨i ŋɛ̨i hu, gáá pai gwələ kulɔi yɛ́! Yai-Laa woo li›, yili ɓa, Yoramə powa həɠə ə́ bili díi hu, yɛ bələi Yai-Laa ə mo la.» Akaziasə paa mɛ̨nį 27 Yili nąą kaai Ɉuda tɔɔmun Akaziasə ə mo, ə tɛɛ a gilɛ, ə li Bɛtə-Gan pələ. Kɛlaa, Ɉehu ə hvilɛn bulu, yɛ diɛ: Ka yaa kpɛli mąn baa! Di Akaziasə lɛɛ nwɔ wotoloi hu di ɉaɠa Gurə yee ɓa Yivleamə kwɛlɛ. Ə pa Megido, ə haa laa. 28 Nwɔ tínuą di bowa lɛɛ nwotolo hu də li la Ɉerusalɛmə, di noo nąnni kámą hu Davidə taa. 29 Akabə lon Yoramə nwɔ tɔɔlaa gwɛlan bow kɔ́w tɔ̨nɔ̨ nɔwai ɓə Akaziasə ə dɔɔlaa hɔlɔbo la Ɉuda lɔi hu. Ɉehu ə mo di Ɉezabɛlə paa 30 Ɉehu kɛɛ pai lɔi Izreɛlə daai, Ɉezabɛlə ə bələ mɛ̨n, ə pəną laa ɲɛ̨i kɔ́n bulu, ə nwun mą yili, yili pulu, ə nwun gulɔ bɛlɛ́ vaŋą pili. 31 Ɓɛlɔwai Ɉehu ə kɛi tɛ la taai, Ɉezabɛlə yɛ Ɉehu ɓa: «Liilaa mɛ̨nį ɓəi Zimri, nwun nąmu paa mun?» 32 Ɉehu ə ɲɛ̨i pili bɛlɛ́ vaŋą pilii, yɛ mą: «Gbɛɛ ɓə kwa yaa ku tɔɔ? Gbɛɛ ɓə?» Nɛ̨ɛ̨nui tii nwɔ gbɛtɛgbuwulu hveelɛ, a wala kɛ tii ɉaaɓa, di di nwun gulɔ Ɉehu pɔ pələ. 33 Ɉehu yɛ nuą tii diɛ: «Ka nɛ̨ɛ̨nui tii kulɔ ka doo nɔi ɓa!» Di Ɉezabɛlə kulɔ di doo, ɲąmą ta ə taɠa ɉį́i nwąną ɓa, da ə taɠa ɉooɠaa diɛ. Ɉehu ə ɓɔlɔɔn Ɉezabɛlə mɛ̨i. 34 Ɉehu ə lɔ bɛlɛ́n ə naa mį́i, ə gbələ, yili pulu, yɛ nwɔ tínuą diɛ: «Ka nɛ̨ŋɛ̨n naa nɛ̨ɛ̨nui ŋɛ̨i mąą mɛ̨nį ɲɛ̨i kulɔ, ka bowa loo; hvo gaai tɔɔmun non nɛ̨ɛ̨nu li.» 35 Nuą də li noo mɛ̨nį ɓa, nwun ganin gonon, ɲeeɠaa, da gɔwɔɠaa lɔ ɓə di di kaa. 36 Di pənə di pa di mo Ɉehu ɓa. Ɉehu yɛ diɛ: «Nwooi Yai-Laa ə wɔlɔ bu nwɔ tímun Tisbe mun Eli la, yɛ mo, ya kpɔlɔɔ ka tii naa aa hon. Yai ə kɛ mą: ‹Yilɛɠaa kaa pai Ɉezabɛlə huwɔ mįi Izreɛlə díi hu, 37 ɛlɛɛ, Ɉezabɛlə kaa pai kɛi yɛ tuluun bɔlɔ Izreɛlə ɲɛɛ kɔ́wɔ hu, nu ta hva kɛ diɛ: «Ɉezabɛlə kámą ka.»›» |