Tɔɔɓɛlaa veelɛ 8 - Yálá laawoo hɛɓɛ (dc)Sunɛmə nɛ̨ɛ̨nui mąą mɛ̨nį gbəli 1 Ə kɛ a yələ ta, nɛ̨ɛ̨nui ŋɛ̨i ta Elise ə non nwun ə gulɔ haa yəi, Elise ə mo mą, yɛ mą: «Həɠə ɓɛ, ə́ li ka ə́ yəi bɛlɛ́n nuą, ka li ɓɛi yá bɛli ə́ heei hɔlɔɓoi laa. Mąąhɔlɔɓo, Yai-Laa kaa pai kwɛlan mɛ̨ihveelɛ pulu tooi ɓɛ nɔi.» 2 Nɛ̨ɛ̨nui ə muhəɠə yɛ bələi Yálá nwɔ nui ə mo la mą. Ə li ə mąąkilɛ, yaa, da ɲəi bɛlɛ́n nuą Filisti lɔi hu. 3 Gwɛlan mɛ̨ihveelɛi tii tɛɛ pulu, nɛ̨ɛ̨nui tii ə pənə ə pa. Pai ə mo, ə li, ə nwɔ pɛ́lɛ́i da nwɔ tíi kɛ lɔi mąą mɛ̨nį ɓo tɔɔmun mą. 4 Nąąlɔwai, tɔɔmun da Yálá nwɔ nui nwɔ tímun Gehazi di kɛi lono kɛ. Yɛ Gehazi ɓa: «Mɛ̨ni kpɛa kpɛaa kpɔ Elise aa gɛ, di hukulɔ mą́ą́.» 5 Nąąlɔwai, lokolo ta nwún mɛ̨nį ɓə Gehazi ə kɛi ɉukulɔ, tɔɔmun ma, yai Elise ə nwun. Nɛ̨ɛ̨nui tii Elise ə non nwún, ə kɛ kpɔlɔɔ tii yɛ lɔ tɔɔmun ɲəi bɛlɛ́n, əgɛ, ə nwɔ pɛ́lɛ́i da nąą mįi lɔi mąą mɛ̨nį ɓo tɔɔmun ma. Nąąlɔwai, Gehazi yɛ tɔɔmun mą: «Nɛ̨ɛ̨nui ŋą́ kɛi mąą mɛ̨nį hukulɔ, ya ka, ɛlɛɛ, non tii di nwun ya ka ŋɛ̨i bɔ.» 6 Tɔɔmun ə nɛ̨ɛ̨nui mąąni kɛ, yili ə nwoo hukulɔ mą. Tɔɔmun yɛ bɔ mun ma: «Ɉɛnŋąą kpɔ a nɛ̨ɛ̨nui ŋɛ̨i nwɔɔ, gəlee kpɔ tɛɛ bɔ; ə mą kɛ, nwɔ tíi. Hɛn kpɔ hɔlɔɓo díi tii hu, ə həɠə gwɛlan ə həɠə la ɓɛ mą, ə həli la yiihu ɓa, gəlee pɔɔi tɛɛ bɔ ə́ bɛlɛ díi ɓa.» Elise da Hazaɛlə 7 Yələ ta, Elise ə li Damasə daai, nąąlɔwai, Aramə tɔɔmun Bɛn-Hadadə yɛ ɲɔ̨n gɛ. Di mo Bɛn-Hadadə ɓa, diɛ mą: Yálá nwɔ nui aa pa ɓɛ. 8 Tɔɔmun Bɛn-Hadadə yɛ Hazaɛlə ɓa: «Yálá kɔ́ hɛnŋąą həɠə, ə́ li, ə́ həli la Yálá nwɔ nui ɓa, ə́ Yai-Laa mąąni kɛ yaa tii bɔ pələ, yɛ́ mą: ‹Gáá pai ɓaloi?›» 9 Hazaɛlə ə li ə həli Elise ɓa. Ə Damasə hɛnŋąą nɛlɛ-lɛlɛɛɠaa həɠə yai a pɛli kɛi a Ɲɔ̨ɔ̨nwɔ̨mɛɛ pow nąąn diɲɛ̨, yɛ li la Elise pɔ, a kɔ́ɓo hɛn. Həlii ə mo Elise ɓa, yɛ mą: «Ə́ lon Bɛn-Hadadə, Aramə tɔɔmun mə dɔ́ɔ́ ə́ pɔ, ə́ mąąni kɛ mɛ̨nį ɓa; akɛ gaa pai kulɔi ɲɔ̨n tii hu?» 10 Elise ə nwoo pulu pənə yɛ mą: «Lí ə́ mo mą, gaa kiɛ pai ɓaloi. Kɛlaa, Yai-Laa aa nɛ mą́ą́ yɛ gaa pai haai a haa kpəlee.» 11 Yili pulu, Elise ə Hazaɛlə kaa kpɔ a ɉukwɛaa, ə ɲɛ̨i ɲɔ̨n, yili pulu Elise ə wɔlɔ. 12 Hazaɛlə yɛ Elise ɓa: «Lə ɓə kɛ, yai nwɔ́ mɛ̨nį nąmu kaa wɔlɔi?» Elise yɛ mą: «Mɛ̨nį ɲąąnwąnąąi ə́ kaa pai naai Israɛlə nuą diɛ, ya ka tii ɲɛ̨́i aa tɔɔ ɉu. Ə́ kaa pai di wɔ taa mąąkpɛ hį́iɠaa kəlee lɛɛi nwɔ̨n ɉu, yɛ́ di wɔɔ muhəɠə nįnɛ̨ɠaa kəlee paa a ɓɔwa, yɛ́ di lonnii pɛlɛɛɠaa kiin-giin, yɛ́ gbɔlɔ kulɔ. Yɛ́ di wɔɔ koonɛ̨ąɠaa kwəi ɓɛla.» 13 Hazaɛlə yɛ Elise ɓa: «Lə kɛ hɛn gbɔ ɓaa a yɛ́ luwɔi, yai a pɛli mɛ̨nį taaləi tii kɛi?» Elise ə bulu pənə mą, yɛ mą: «Yai-Laa ɓə yili kəlee lɛi mą́ą́, yɛ ə́ kaa pai kɛi a Aramə tɔɔmun.» 14 Hazaɛlə ə həɠə Elise pɔɔli, ə pa Nąn pɔ. Yili yɛ mą: «Lə mɛ̨nį ɓə Elise ə mo yɛ́?» Hazaɛlə yɛ mą: «Ə kɛ mą́ą́: ‹Tɔɔmun gaa pai ɓaloi.›» 15 Mąą yələ laa ɓoɔ, Hazaɛlə ə ɲíihəɠə həɠə, ə nɔ yai, ə ɲili tɔɔmun ɲɛ̨i, tɔɔmun ə haa. Hazaɛlə ə hee a dɔɔkpələn ɉu a mąąhvalin. Yoramə Ɉuda tɔɔmun 16 Akabə lon Yoramə nwɔ tɔɔlaa gwɛlan nɔɔli lɔwai Israɛlə lɔi hu, Ɉosafatə ə kɛ a Ɉuda tɔɔmun, Ɉosafatə Ɉuda tɔɔmun lon Yoramə ə kɛ a tɔɔmun Ɉuda. 17 Gaa kwələn ə kɛ pow haaɓa kɔ́w hveelɛ, yɛ dɔɔlaa hɔlɔɓo. Kwələn mɛ̨ihaaɓa ɓə ə gɛ dɔɔlaa hu Ɉerusalɛmə. 18 Ə hvilɛn Israɛlə tɔɔɓɛlaa di wɔ túwɔ́ pələ ɲɔ̨n bulu, yɛ bələi kpɔlɔɔ Akabə yəi bɛlɛ́n nuą di wɔɔ túwɔ́ pələ ɲɔ̨n ə kɛ la. Gbala ə tɔɔ, ə Akabə lon nɛ̨ɛ̨nu həɠə a nɛ̨ą. Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, ya ɓə ə ɲee lɔ ɉu yɛ gɛ. 19 Kɛlaa, Yai-Laa hvo kɛ bɔ, hvo Ɉuda lɔi hu kala nwɔ tímun Davidə mąą mɛ̨nį ɓa. Mąąhɔlɔɓo, ə kɛ yɛ gaa pai labon dɛɛi Davidə huwu pɔ a yələ kəlee mɛ̨nį. 20 Yoramə nwɔ yələi, Edɔmə nuą di kulɔ Ɉuda tɔɔlaa yee mu, di di kpɔwɔ ɓa tɔɔmun ɉee. 21 Yoramə ə li Sairə a nwɔ kɔ́ kɔ́ wotoloɠaai, ə kɔ́ pɛlɛ Edɔmə nuą diɛ a kpinį. Edɔmə nuą di Yoramə da nwɔ nuąi di mąątínɛ̨n. Kɛlaa, Ɉuda nuą di ɓɔ di yee wolo ɓa, di pu, nu kəlee ə li bɔ taai. 22 Bələ ɓə Edɔmə nuą di kulɔ la Ɉuda nuą yee mu; ə lɛɛ la ɉu ə həli la háákələi ɓa. Nąąlɔwai, Livna nuą diɛ kpɛli di kulɔ Ɉuda yee mu. 23 Yoramə kɛ mɛ̨nįɠaa yiiɠaai lɛɛ pulu, mɛ̨nįɠaa kpɔ ə gɛ, yili hvo mɔ̨ɔ̨ pɛ̨ɛ̨ li Ɉuda tɔɔɓɛlaa di kɛ mɛ̨nį hɛɓɛ́ hu? 24 Yoramə ə laa nąnni kwɛlɛ, di noo nąnni kámą hu Davidə taa. Yoramə lon Akaziasə ə hee a nąn mąąhvalin dɔɔkpəlin ɉu. Akaziasə Ɉuda tɔɔmun 25 Akabə lon Yoramə nwɔ tɔɔlaa gwɛlan bow kɔ́w hveelɛ lɔwai Israɛlə lɔi hu, Yoramə lon Akaziasə ə tɔɔlaa hɔlɔɓo Ɉuda lɔi hu. 26 Akaziasə kaa kwɛlan ə kɛ pow hveelɛ kɔ́w hveelɛ, yɛ tɔɔlaa hɔlɔɓo. Ə tɔɔlaa kɛ a kwɛlan dɔ̨nɔ̨ Ɉerusalɛmə. Akaziasə nee laa ɓa kɛ a Atali, yai kɛ a Israɛlə tɔɔmun Omri lon nɛ̨ɛ̨nu. 27 Akaziasə ə hvilɛn Akabə yəi bɛlɛ́n nuą di wɔɔ túwɔ́ pələ ɲɔ̨n bulu; mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, ə ɲee lɔ ɉu yɛ gɛ, kpɔlɔɔ yɛ bələi Akabə yəi bɛlɛ́n nuą di kɛi gɛ la. Mąąhɔlɔɓo, Akabə yəi bɛlɛ́n nuą di mąnįn ni kɛ. 28 Akabə lon Yoramə ə li ə kɔ́ pɛlɛ Aramə tɔɔmun Hazaɛlə ɓa Ramotə daai Galaadə lɔi hu. Kɛlaa, Aramə nuą di Yoramə nwąną. 29 Tɔɔmun Yoramə ə pənə ə pa Izreɛlə bala hali kɛ mɛ̨nį ɓa. Balai tii di dee mą Rama, ɓɛlɔwai di kɛi gɔ́ kɔ́ la da Hazaɛlə, yai kɛ a Aramə tɔɔmun. Nąąlɔwai Ɉuda tɔɔmun Akaziasə Yoramə lon, ə li nwoo pili Akabə lon Yoramə ɓa, yai tii di mąą nwąną gɔ́ mɛ̨i. |