Tɔɔɓɛlaa veelɛ 7 - Yálá laawoo hɛɓɛ (dc)1 Elise yɛ mą: «Ka ka wəli tɔɔ Yai-Laa woo ɓa, mɛ̨nįi Yai-Laa ə mo ya ka: ‹Tínąą ɓɛlɔwai, Samari ɉį́i la, di kaa pa lɛɠɛ hunwɔ̨ kilə pow kɔ́w hveelɛ ɲai a wali kwələ tɔ̨nɔ̨, di kpai kilə pow hveelɛ kɔ́w nąąn ɲa a wali kwələ tanɔ̨n.›» 2 Tɔɔmun nwɔ ɓíítiɛ̨i yɛ Yálá nwɔ nui ɓa: «Ə mą kɛ Yálá aa yələkɔlɔn nwolo ɓɔ mą, mɛ̨nįi ŋɛ̨i ə́ mo, bɔ mɛ̨nį hva pɛli kɛi!» Elise yɛ mą: «A tɛ̨ą, ə́ kaa pai gaai a ə́ ɲɛ̨ikɔw, kɛlaa, hvá da mįi.» Aramə nuą di pu di həɠə di wɔ kɔ́ɓuwui la 3 Hvólóɲɔ̨n gɛ nuą nąąn di kɛ heeni bələ nwun na, diɛ di kee ɓa: «Lə mɛ̨nį ɓa, gu kaa ɓɛ heeni guɔ haa mąąkpɔn? 4 Gwa kɛ gu kaa lɔi daa kwəi, bulu kaa laa, gaa pai gu paai, gwa lɛɛ nwɔ̨nɔ̨ ɓɛ heeni, gu kaa pai haai. Ka gwə li Aramə nuą di wɔ kɔ́ɓuwui la, da gu nɔ̨ɔ̨ lɛɛ gu hu, gwa ɓalo, da gu paa nwɔ̨nɔ̨, gu haai lɔ li.» 5 Di həɠə laa hvitili pui lɔwai, diɛ li Aramə nuą di wɔ kɔ́ɓuwui la. Di həliɛ muwu la, di nąą hu hiɛ, di hvo nu ta kaa. 6 Yai-Laa ə kɔ́ kɔ́ wotoloɠaa da hooɠaa tín dɔɔ Aramə nuą di wɔ kɔ́ɓuwui la, da kɔlaɠa kɛnɛ̨ tín. A ya ɓə, Aramə nuą da kɛ di kee ɓa: «Israɛlə tɔɔmun aa Hɛtə tɔɔmun, da Eziptə tɔɔmun di həɠə, diɛ pa pɛlɛi guɔ a kɔ́.» 7 Di di muhəɠə kɛa vitili pui lɔwai tii, di kulɔ di wɔ kɔ́ɓuwuɠaai mu, di ɉəɠə pɛlɛ́ɠaa lɛɛ laa da ɉooɠaa, ə mą kɛ ɉoohvaalənŋąą, di muwu lɛɛ kpɔlɔɔ yɛ bələi ə kɛ la, nu kəlee yɛ nwun mąąkilɛ pələ kwɛli. 8 Volóɲɔ̨n gɛ nuą tii, də li di hiɛ gɔ́ɓuwu nąą kəlee, di lɔ ɉəɠə pɛlɛ́ tɔ̨nɔ̨ mu, di kɔ̨nɔ̨n mįi laa di di kpələ; di waliɠaa həɠə, hɛni da həɠəɠaa, də li di noo. Di pənə nwɔ̨nɔ̨ də li ɉəɠə pɛlɛ́ takpɛli mu, ɉɛnŋąą kpɔ di gaa laa, di gəlee həɠə də li la nwɔ̨nɔ̨ di noo. Gɔ taɠa mɛ̨nį da bulu kpɛɛ mɛ̨nį 9 Kɛlaa, volóɲɔ̨n gɛ nuą tii diɛ di kee ɓa: «Yii ŋɛ̨i gu kaa gɛi, mɛ̨nį haŋąą vəli, mɛ̨nįi ŋɛ̨i gu ɲɛ̨i aa tɔɔ ɉu, gaa a mɛ̨nį lɛlɛɛi mąąnɛ̨ɛ̨ gu bələ ɓo. Gwa wala mo, a lɛɛ ɉu kɛɛ hu a pɔ̨nɔ̨, gu nwun nɛɛ ɉu mɛ̨nį li. Ka gwə tɛ taai, gu ɉukulɔ tɔɔmun mą.» 10 Di pa, di ɉįi la nuą təli, diɛ diɛ: «Kwaa li, kwaa həli Aramə nuą di wɔ kɔ́ɓuwui la, nui lɔpee ta hvo laa, nu woo kpɛli hvo tɔɔi laa; ɉooɠaa lɔ ɓə kɛ laa da ɉoohvaalənŋąą, di yiliɛ ɉəɠə pɛlɛ́ɠaa diɛ, daa di lɛɛ laa.» 11 Ɉįi la nuą di təli ɓo kɛ daa kwəi pələ, di nwɛlɛɛ tɔɔ tɔɔmun mą. 12 Tɔɔmun ə muhəɠə gbinįi tii hu, yɛ bɔ nuą diɛ: «Aramə nuą di wɔ kiliŋąhiɛ ka; yii kɛa daa gaa diɛ pulu aa too guɔ, daa di wɔɔ hɛnŋąą kəlee lɛɛ gɔ́ɓuwu la, daa lɔ gbono hu, ə gɛ, gwa li laa, di gu hon a gu hvulú, diɛ kɛa pa lɔi guɔ taai hu.» 13 Tɔɔmun bɔ mun tɔ̨nɔ̨ yɛ mą: «Ka gu hoo lɔɔli həɠə, ɉoo yiiɠaa daa lɛɛ a di hvulú di lɔwai; ə kɛ a pələi lɔpee, di kɛi lɔ pa haai, yɛ bələi Israɛlə nuą kaa haai la a pulu. Gu nuą taɠaa tɔɔ laa ɉooɠaa tii mɛ̨i, yili pulu, bələi nąą mɛ̨nį kaa la, gwa gaa.» 14 Tɔɔmun ə kɔ́ kɔ́ wotolo hveelɛ kpulɔn ɉooɠaa tii diɛ, ə nuą tɔɔ Aramə nuą tii pulu, yɛ diɛ: «Ka li ka nąą mąąkpɛɛ.» 15 Yiliɠaa di lɛɛ Aramə nuą kpaalə ɓa, di həli Ɉurdɛn ɓa. Di həɠəɠaa kaa daɠa taɠaa Aramə nu pɔɔ ɲą, yai di kɛi ɓo mą diɛ doo da hɛn dakpɛliɠaa. Gɛlaɠaa tii di pənə di pa, di tɔɔmun gilaa pɔ̨nɔ̨. 16 Gɛɛ tii, nuą di kulɔ Samari, diɛ li Aramə nuą di wɔ kɔ́ɓuwui la, diɛ hɛnŋąą həɠə. Yɛ bələi Yálá nwɔ nui ə mo la, di kɛi lɛɠɛ hunwɔ̨ kilə pow kɔ́w hveelɛ ya a walilə kwələ tɔ̨nɔ̨, diɛ kpai kilə pow hveelɛ kɔ́w nąąn ɲa a wali kwələ tɔ̨nɔ̨ yɛ bələi Yai-Laa ə mą la. 17 Tɔɔmun ə nwɔ ɓíítiɛ̨i tɔɔ ɉįi la, ə gɛ, yɛ nuą mɛ̨i kaa. Kɛlaa, nuą di kɛlɛ ɉu, di doo, di lɛɛ tɛɛi mɛ̨i, ə haa, yɛ bələi Yálá nwɔ nui ə mo la. Elise ə nwoo tii ɓo, ɓɛlɔwai tɔɔmun ə nwɔ ɓíítíɲɛ̨i tɔɔ la Elise pulu. 18 Mɛ̨nįi ŋɛ̨i Yálá nwɔ nui ə mo, ə kɛ kpɔlɔɔ tii. Yai ə kɛ mą: «Tínąą ɓɛlɔwai, kpai kilə pow hveelɛ kɔ́w nąąn a kɛ a wali kwələ tɔ̨nɔ̨, lɛɠɛ hunwɔ̨ kilə pow kɔ́w hveelɛ a kɛ a wali kwələ tɔ̨nɔ̨ ɓɛ Samari daai.» 19 Yaan, tɔɔmun nwɔ ɓíítiŋɛ̨i ə mo Yálá nwɔ nui ɓa, yɛ mą: «Ə mą kɛ Yálá aa wolo ɓo yələkɔlɔn mą, nwoo ŋɛ̨i ə́ mo, hva pɛli kɛi», Elise yaan, ə nwoo pulu pənə, yɛ mą: «A tɛ̨ą, ə́ kaa pai gaai a ə́ ɲɛ̨ikɔw, kɛlaa, hvá da mįi.» 20 Mɛ̨nįi tii pɔ mɛ̨nį ə kɛ. Nu kpului tii di tɔɔmun nwɔ ɓíítiɛ̨i kiin-giin ɉįi la, ə haa. |