Tɔɔɓɛlaa veelɛ 6 - Yálá laawoo hɛɓɛ (dc)Yowa kɔ́w pili mɛ̨nį 1 Yálá kwəi mɛ̨nį hukulɔ nuą di wɔ kalan nɛa di mo Elise ɓa, diɛ mą: «Ɓɛi ŋɛ̨i kwa ŋąąkpɔn gɛi laa, nąą hvo kɛnɛ̨ li ku mąą mɛ̨nį ɓa. 2 Kuɔ ə́ hvaa mą, kwəli Ɉurdɛn kwɛlɛ, nu kəlee ə wulu hɔlɔɔn dee ku paa la, ku ku hee kələ tɔɔ la.» Elise ə hvaa mą. 3 Dɔ̨nɔ̨ yɛ mą: «Nán! Hvaa mą gwa kaani gwəli.» Elise yɛ diɛ: «Ŋą́ą́ hvaa mą.» 4 Da diɛni di tɛɛ diɛ li. Həlii di mo Ɉurdɛn kwɛlɛ, nu kəlee ə wulu tee. 5 Nu tɔ̨nɔ̨ ə kɛ laa, yɛ wulu tee ɲa kwɛlɛ, ɲowa ə kpoloon, gɔw ə too ɲái; ə tomą yɛ mą: «Ee! Nwɔ́ mɛ̨nį nąmu, ŋą́ ɲowai ŋɛ̨i hvɛli.» 6 Yálá nwɔ nui yɛ mą: «Mįnɛ̨ ɓə ə too laa?» Yili ə nąą lɛ Elise ɓa. Elise ə wulu kpiɛn da həɠə, ə mąą haɠa, ə bili ɲái, ɲowa kɔ́w ə tɛ ɲá ŋą. 7 Elise yɛ mą: «'Ɉəɠə!» Ɉulɔnui tii ə ɉəɠə. Elise ə Aramə kɔ́kulááɠaa hon 8 Kɔ ə kɛ Aramə tɔɔmun da Israɛlə di lɔwai, ɓɛlɔwai Aramə tɔɔmun da nwɔ kɔ́kulááɠaa da di nwɔ nwun dɔɔi kɛ la, diɛ kɛ mą: «Ka gwə li gu gɔ́laɠa pɛlɛ ɓɛ yii!» 9 Yálá nwɔ nui a li ə ɉukulɔ Israɛlə tɔɔmun mą, yɛ mą: «Hvo kɛ ə́ kaa lii bələ yii ŋɛ̨i pɔ pələ, mąąhɔlɔɓo, Aramə tɔɔmun a nwɔ kɔlaɠai pɛlɛ laa.» 10 Nąąlɔwai, Israɛlə tɔɔmun a nuą tɛɛ pələ takpɛli, ɓɛ pələi Yálá nwɔ nui a kɛ mą di tɛɛ la. Elise ə kəi tɔɔmun gilaa pɔ̨nɔ̨, yili yɛ ɓo kɛa gili mɛ̨i. Di gɛi kɛ tii gee mɛ̨i tamąą. 11 Mɛ̨nįi tii ə Aramə tɔɔmun gwəi pili mą, yili ə nwɔ kɔ́kulááɠaai təli, yɛ diɛ: «Akɛti, nu ta hvo ka lɔwai da Israɛlə tɔɔmun di tɔɔ?» 12 Gɔkuláá tɔ̨nɔ̨ yɛ mą: «Nwɔ́ mɛ̨nį nąmu tɔɔmun, yili mąą nu ta hvo ku lɔwai. Kɛlaa, Elise ŋɛ̨i a Yálá kwəi mɛ̨nį hukulɔ mun Israɛlə lɔi hu, ya ɓə a kɛ mɛ̨nįi tii kɛi, ɉə kaa mą, wooɠaa kpɔ yá kɛ moi ə́ yəi bɛlɛ́n ə́ laai lɔwai, ə gəlee hukulɔ Israɛlə tɔɔmun mą.» 13 Aramə tɔɔmun yɛ nwɔ kɔ́kuláá taɠaa diɛ: «'Ka li, ɓɛi gaa laa, ka nąą kaa, ŋą́ pa nuą tɔɔ də li di ɉon.» Gɔkulááɠaa diɛ mą: «Gaa Dotan.» 14 Tɔɔmun ə wotoloɠaa tɔɔ, da hoo gilɛ həɠə nuą kpulu kɛnɛ̨, di pa di daa mąątínɛ̨n a kpinį. 15 Yálá nwɔ nui nwɔ tímun ŋɛ̨i kɛ bɔ, ə humo kpɔ a gulaa yələwala pɔ, yɛ gaa ɲɛ̨i kɛi, kɔlaɠa kpulu kɛnɛ̨ da hoo gilɛ həɠə nuą da wotoloɠaa daa di mąątínɛ̨n. Yɛ Elise ɓa: «Eé! Nwɔ́ mɛ̨nį nąmu, gu kaa pai yii kɛi ləi?» 16 Elise yɛ mą: «'Hvó ɲɔw, diɛi gwa diɛni gu tɔɔ, di kpulu kɛnɛ̨i dɛɛ diɛi diɛ.» 17 Elise ə Yálá hvɛli yɛ mą: «Nui ŋɛ̨i ɲɛ̨i həɠə mą, ə kɛɛ kaa.» Yai-Laa ə Elise nwɔ tímun ɲɛ̨i həɠə mą; yɛ gaa ɲɛ̨i kɛi, nwɔ̨n nwotoloɠaa da hooɠaa diɛ ɓə ə di kaa, gəlee daa Elise mąątínɛ̨n. 18 Aramə kulááɠaa tii kɛɛ li Elise pɔ, Elise ə Yai-Laa hvɛli, yɛ mą: «Aramə kulááɠaa ɲɛ̨i kpinį diɛ.» Yai-Laa ə di ɲɛ̨i kpinį diɛ, yɛ bələi Elise ə ɉuhvɛli la. 19 Elise yɛ gulááɠaa tii diɛ: «Daai ka káá lii ɉu, nąą hvaa a ɓɛ, bələ kpɛli hvəi; ka hvilɛn bulú ka gwə li, nui ka káá gwɛli ŋą́ nɛ kaa.» Elise ə tɔɔ di mu, ə li a diɛ Samari. 20 Di həli lɔ Samari, Elise yɛ Yai-Laa ɓa: «Yai-Laa, nuą ŋɛ̨i ɲɛ̨i həɠə mą, di kɛɛ kaa.» Yai-Laa ə di ɲɛ̨i həɠə mą, di di kpɔwɔ kaa Samari daa hąmąi. 21 Yii lɔ Israɛlə tɔɔmun ə di kaa, yɛ Elise ɓa: «Nán! Ŋą́ di paa?» 22 Elise yɛ mą: «'Hvó kɛ ə́ kaa di paai. Akɛti, nuąi wɔlɔ yá kɛ di hon ɉii kɔ́ hu a luwɔ, yá kɛ wɔlɔ di paai a ɓɔwa a wala kɛ tii kilɛn? Kɔ̨nɔ̨n dɛɛ di pɔ, ə́ bɛlɛ ya ɓa; di kɔ̨nɔ̨n mįi, ə́ di lɛɛ laa də li di wɔ mɛ̨nį nąmu pɔ.» 23 Israɛlə tɔɔmun ə kɔ̨nɔ̨n dɛɛ di pɔ, di mįi, yili pulu ə ɓo diɛ də li di mɛ̨nį nąmu pɔ. Ə kɛ lɔ tii, Aramə nuą di kpəla hvaa teɛ ɓa Israɛlə nuą diɛ. Pulu ə too Samari 24 Lɔwai tamąą tɛɛ pulu, Aramə tɔɔmun Bɛn-Hadadə ə nwɔ kɔlaɠaɠaa kəlee ŋąąkpɔn, dəli di Samari taa mąątínɛ̨n. 25 Daa mąątínɛ̨n di mo a kɔ́, yili ə gɛ, pulu kɛnɛ̨ kpɔ ə too Samari, yili ə kpɔlu daa nuą la, diɛ hoohvaalən nwunganin dɔ̨nɔ̨ ya a wali kwələ pow mɛ̨ihaaɓa, kɔ̨nɔ̨n gəgən ɉu hveelɛ ə ɓo a wali kwələ lɔɔli. 26 Ə kɛ a yələ ta, Israɛlə tɔɔmun yɛ hiɛ hiɛ kɛ ɉįi nwąną mɛ̨i. Nɛ̨ɛ̨nu ta yɛ tomą yɛ, ɲee lɛ mą, yɛ kɛ mą: «Nwɔ́ mɛ̨nį nąmu tɔɔmun, pa ə́ kpɔn mą́ą́!» 27 Tɔɔmun yɛ mą: «Akɛ Yai-Laa a wala pa hvo kpɔnmąą tɛɛ ə́ pɔ, lə kpɔ ɓə ŋą́ pɛli ŋą́ gɛ yɛ́? Hɛn da lɔpee hvo kɛa laa; mɔ̨nun və gələ hu, viɲə ɓá hvo kɛa ɲá kulɔi.» 28 Tɔɔmun yɛ nwɔ̨nɔ̨ nɛ̨ɛ̨nui tii ɓa: «Lə ɓə ə́ kaa bɔ?» Nɛ̨ɛ̨nui yɛ mą: «Mɛ́lan ŋɛ̨i ə́ kaa gaai, ə kɛ mą́ą́: ‹Ə́ lon və gu mįi háákələi, tínąą, gu pa nwɛ́i mįi.› 29 Kwaa nón mįi, mąą yələ laa ɓoɔ, gɛ́ mą: paa a ə́ lon gu mįi, hvo gɛ li, ə nwɛi həɠə ə li ə noo.» 30 Ɓɛlɔwai tɔɔmun ə nɛ̨ɛ̨nui tii woo mɛ̨n na, ə mąą həɠə hu ɓɛla. Ɛlɛɛ, kɛi tii ə mo ɉįi kpoloon mɛ̨i yɛ tɛɛ, nuą di gaa, aa mąąwɛli həɠə too gwąną. 31 Yili pulu, tɔɔmun ə gwɛla, yɛ mą: «Háákələi, Safatə lon Elise nwunganin a lɛɛ ŋą, Yálá hvo yɛnɛ̨ɛ̨ nɛ̨ɛ̨ mą́ą́!» 32 Elise ə kɛ heeni bɔɔli, nu kpɛa kpɛaa heɛ gwɛlɛ ɓɛlɔwai tɔɔmun ə nwɔ tímun dɔ̨nɔ̨ tɔɔ la bɔ. Gɛɛ tɔɔmun nwɔ kɛlai hvo həli Elise ɓa, ə gbɛa mo gwɛlɛ nuą diɛ, yɛ diɛ: «Kaa nu paa mun lon ŋɛ̨i kaa, ya ka tii aa nuą tɔɔ, ə gɛ, di pa di nwún dee. Nwɔ kɛlai tii aa həli ɓɛ, ka bɛlɛ́ laa kpulu dɔwɔ, ka nɛɛ gbon mą, ka bili la. Kɛlɛi, nwun nąmu kɔ́wɔ mu tin gaa tɔɔi bulu.» 33 Elise ə lɛɛ lɔ moi, tɔɔmun ŋą kɛlai yɛ pa. Yɛ Elise ɓa: «Mɛ̨nį ɲąąnwąnąą ŋɛ̨i naa kuɔ, Yai-Laa ɓə ə həɠə bɔ, lə ɓə kɛa ŋą́ pɛli kílitɔɔi mą Yai-Laa yəi?» |