Tɔɔɓɛlaa veelɛ 5 - Yálá laawoo hɛɓɛ (dc)Naaman kɔ́lɔi pɔ̨nɔ̨ mɛ̨nį 1 Naaman ə kɛ a Aramə tɔɔmun nwɔ kulááɠaa nwun nąmu kɛnɛ̨, nwɛli ə ɓo nwɔ tɔɔmun mą kpɔ kɛnɛ̨. Mąąhɔlɔɓo, yaa tii ɲee hu ɓə Yai-Laa ə kɛi yeetɛɛmąą tɛɛ la Aramə pɔ. Kɛlaa, gɔ́kuláá walawalai tii, hvólóɲɔ̨n ə kɛ mą. 2 Aramə toomɛ̨i kɛ nuą di Israɛlə nɛ̨ɛ̨non da hon a luwɔ. Nɛ̨ɛ̨non tii ɓə kɛ Naaman nɛ̨ą pɔ diɛ dí. 3 Yələ ta, nɛ̨ɛ̨non tii yɛ neenɛ̨ą ɓa: «Ŋį́ mo kɛ néénɛ̨ą a pɛli lii Yálá kwəi mɛ̨nį hukulɔ mun ŋɛ̨i Samari daai, ə həli mąi, a pɛli mą kɛ ə malo, ə gulɔ volóɲɔ̨n tii yəi.» 4 Nwoo tii mɛ̨n Naaman ə mo, ə li ə ɉukulɔ nwɔ tɔɔmun mą, yɛ mą: «Mɛ̨nįi Israɛlə nɛ̨ɛ̨non ə mo yaa li!» 5 Aramə tɔɔmun yɛ Naaman ɓa: «'Hvílɛn bələ ɓa ə́ li, gáá hɛɓɛ́ kɛi ŋą́ dɛɛ Israɛlə tɔɔmun mą.» Naaman ə tɛɛ yɛ li. Gɛɛ lii, ə wali kwələ kilə nwun ɉaaɓa həɠə, hɛni kilə pow mɛ̨ida, da hiŋɛ̨nɉəɠə pow. 6 Lii ə mo, ə ɉɛɓɛ́ tɛɛ Israɛlə tɔɔmun bɔ. Ɉɛɓɛ́ hu woo ka ŋɛ̨i, yɛ mą: «Gáá nwɔ́ tímun tɔɔ ə́ pɔ, yá ɉɛɓɛ́i ŋɛ̨i hɔlɔɓo lɔ, ə́ malo, ə́ kulɔ volóɲɔ̨n ŋɛ̨i yəi.» 7 Yii lɔi Israɛlə tɔɔmun ə kpɛɛ a ɉɛɓɛ́ ɓoɔ, ə mąą həɠə hu ɓɛla, yɛ diɛ: «Akɛti Yálá ɓaa a ɲą́ą́, gɛ́ pɛli nu paai, a wala kɛ tii gɛ́ pɛli nu ɓaloi! Yai ɉulɔnui ŋɛ̨i kaa nwɔ tímun dɔɔi, yɛ kɛ ŋą́ hvólóɲɔ̨n ɉəɠə mą! Ka mɛ̨nį taaləi ŋɛ̨i kaa, ka gɔlɔn kaa diɛ, ɉulɔnui ŋɛ̨i kaa gwɛ́lii a hvaa.» 8 Ɓɛlɔwai Yálá nwɔ nu Elise ə bələ mɛ̨n na, diɛ kɛ Israɛlə tɔɔmun aa mąą həɠə hu ɓɛla a liiholi, ə wɛlɛɛ tɔɔ tɔɔmun pɔɔli, yɛ mą: «Lə mɛ̨nį ɓa ə́ ə́ mąą həɠə hu ɓɛla? Naaman lɛɛ laa ə pa ə həli mą́ą́, gaa pai gɔlɔn ɉii yɛ Yálá kwəi mɛ̨nį hukulɔ mun gaa Israɛlə lɔi hu.» 9 Naaman ə pa a nwɔ wotoloɠaa, da nwɔ hooɠaai ə di tɔɔ Elise yəi bɛlɛ́ laaləi. 10 Elise ə wɛlɛɛ tɔɔ, yɛ Naaman ɓa: «'Lí ə́ ə́ waa Ɉurdɛn hu gee mɛ̨i mɛ̨ihveelɛ, ə́ kɔ́lɔ a lɛlɛ, ə́ mąą ə həɠə.» 11 Naaman ə níiholi, ə tɛɛ yɛ li, yɛ mą: «Ə kɛ kpɛli gwə́i gaa pai kulɔi ə tɔɔ ɲəi bɛlɛ́ laaləi ə nwɔ Yálái Yai-Laa hvɛli, ɓɛɠaai ɲɔ̨n gaa laa, ə ɲee hiɛ nąąɠaa, ə volóɲɔ̨n ŋɛ̨i həɠə mą́ą́. 12 Damasə ɲálee kpɛa kpɛaa hveelɛi a Abana da Parparə, di hvo mɔ̨ɔ̨ hviɛla ɓo li di hvo tɛɛ Israɛlə yáɠaa kəlee diɛ; vá mɔ̨ɔ̨ pɛli kɛ nwáái laa gɔ́lɔ́ hvo kulɔ?» Ə bulu pənə yɛ li a lii kələn gwəi kɛnɛ̨. 13 Bɔ nuą di lɛɠɛ mą, diɛ mą: «Nán, akɛti, Yálá kwəi mɛ̨nį hukulɔ mun a kɛ kɛ yɛ́ mɛ̨nį kɛnɛ̨ ta kɛ, hvə́li mɔ̨ɔ̨ gɛ? Gu hvomun kɛ, yii lɔ ŋɛ̨i ə kɛ la yɛ́: ‹'Lí ə́ ə́ waa volóɲɔ̨n a kpɛɛ yɛ́?›» 14 Nąąlɔwai, Naaman ə yɛɛ Ɉurdɛn hu, ə too ɲai gee mɛ̨i mɛ̨ihveelɛ, yɛ bələi tii Yálá nwɔ nui ə mo la mą. Gɔlɔ ə kɛ kpɔ mą yɛ hulɔn non, ɛlɛɛ, mąą ə həɠə. 15 Ə nɛɛ ɲąąɓa, ə pənə da bɔ nuą kəlee, diɛ li Yálá nwɔ nui pɔ. Naaman ə li ə too Yálá nwɔ nui lííla, yɛ mą: «Yiihui, ŋą́ą́ gɔlɔn gɛ́ Yálá hvo lɔi mɛ̨i nąą takpɛli ɓa, hvo kɛli Israɛlə lɔi hu. Yili ɓa gáá ə́ mąąnɛ̨ɛ̨i gɛ́ ə́ ə́ yee hee ə́ wɔɔ luwɔi nwɔ towələ mu, yai yɛ ə bu ə́ yəi.» 16 Elise yɛ mą: «Yai-Laa ŋɛ̨i gáá a nwɔ tímun, yai kpɔ gaa a vulú, naa hu, ɲéé hvo hɛn da mu.» Naaman ə kpala kpɔ Elise la, kɛlaa, lolo hvo kpɔ gɛ hvo ɲee hee hɛn da mu. 17 Naaman yɛ Elise ɓa: «Yii hvó gɛ li hvó ə́ yee hee nwɔ́ mɛ̨inɛ̨ɛ̨ mui, hvaa kani mą, ə́ díɲɛ̨-həɠə hoo hveelɛi ŋɛ̨i tolo a ɓɛ nɔi pɔlɔ, ə́ dɛɛ ə́ wɔ luwɔi bɔ́, ŋą́ li la. Mąąhɔlɔɓo, ə́ wɔ luwɔi hvo kɛa pai haláái da gəlee kələn da haláá takpɛli kulɔi haliɠaa diɛ, kulɔ lɔ Yai-Laa. 18 Kɛlaa, gɛ́, Yai-Laa ə ə́ wɔ luwɔi mąąhvaalɛɛ, mąąhɔlɔɓo, Aramə tɔɔmun a nwɔ́ mɛ̨nį namui, a lɔ nwɔ halii Rimɔn yəi bɛlɛ́n yɛ kwɛli hvilɛn mą, mąąnɛ̨ɛ̨ ɲą́ą́ gbɛli ŋį́ lɛɛ bɔ ku lɔ, ŋį́ kwɛli hvilɛn Rimɔn ɓa ɲəi bɛlɛ́n. Yili ɓə gɛi, gɛ́ kɛ, Yai-Laa ə ə́ wɔ luwɔi, mą́ą́hvaalɛɛ yili hu.» 19 Elise yɛ mą: «'Lí liilaa hu.» Naaman ə tɛɛ yɛ li. Yii kɛa Naaman ə li kwɛaa la, ə həɠə Elise ɲɛ̨i ɓa, Gehazi nwɔ túwɔ́ pələ ɲɔ̨n 20 Gehazi yai a Yálá nwɔ nu ŋą tímun, yɛ gbɔwɔ ɓa: «Gálamɔ̨ɔ̨ hvo gɛ li hvo ɲee hee Aramə mun Naaman nwɔ mɛ̨inɛ̨ɛ̨ mu, yai ə paa la bɔ; yii kpɔ Yai-Laa kaa a vulú, gáá gilɛ həɠəi ŋą́ laŋąn mą, ə gɛ, ŋą́ hɛn da hon ɲəi.» 21 Gehazi ə tɛɛ a gilɛ, ə hvilɛn Naaman pulu. Yii kɛa Naaman ə gaa yɛ pa a gilɛ, ə kulɔ nwotolo hu, yɛ li naakwiɛn ɉii. Yɛ Gehazi ɓa: «Gu mɛ̨n?» 22 Gehazi yɛ mą: «Ɲɔ̨nwɔ̨ɔ̨ hvo ɉu! Gálamɔ̨ɔ̨ ɓə dɔ́ɔ́, yɛ: ‹Yálá kwəi mɛ̨nį hukulɔ nuą lonnii a hilɛlɛa hveelɛ, daa həɠə Ɛfraimə yee hu daa pa. Gáá ɉuhvɛlii yɛ́, ə́ wali kwələ pow haaɓa, da hiŋɛ̨nɉəɠə hveelɛ tɛɛ, nuąi tii mąą mɛ̨nį ɓa.›» 23 Naaman yɛ mą: «Əi! Wali kwələ pow mɛ̨ida ka.» Naaman ə nwali da ɉəɠəɠaa tii pu ɓíi hveelɛ hu, ə dɛɛ nu hveelɛ pɔ, ə kpala Gehazi la, yɛ mą: «'Lí la», nu hveelɛi tii di ɉəɠə, da diɛni diɛ li. 24 Həlii di mo Ofɛlə, Gehazi ə mii hveelɛi tii həɠə nuą yəi, ə li ə ɉee ɲəi bɛlɛ́n. Nu hveelɛi tii di pənə də li. 25 Gehazi ə pa kɛa ə həli galamɔ̨ɔ̨ Elise ɓa. Yili yɛ mą: «Gehazi! Ə́ həɠə mį?» Gehazi yɛ mą: «Ə́ wɔ luwɔi hvo ni li li kɛɛnąą ta.» 26 Kɛlaa, Elise yɛ mą: «Ɓɛlɔwai hulɔnu ta ə kulɔ la nwɔ wotoloi hu, yɛ pa ə́ laakwiɛn ɉii, gaa ə́ kwəi nį́i hvo kɛ laa? Gaa ə́ kwəi wali hon ɉii lɔwai ɓəi, da həɠəɠaa, ɛlɛɛ, olivə da viɲə, ɓɛlaa da nįŋɛ̨ŋąą, luwɔ hinąą da luwɔ nɛ̨ąą, da hon ɉii lɔwai hvəi. 27 Yili ɓa, Naaman nwɔ hvólóɲɔ̨n tii a lɛɛ yɛ́ ka ə́ huwu kaa a yələ kəlee mɛ̨nį.» Gehazi ə kulɔ Elise pɔɔli, volóɲɔ̨n tii aa gɔlɔ nąą kəlee kwələ yɛ da luwu pu nu ɓa. |