Tɔɔɓɛlaa veelɛ 4 - Yálá laawoo hɛɓɛ (dc)Elise ə kalanin ta mąąkpɔn mąą ɓo 1 Yálá kwəi mɛ̨nį hukulɔ mun da nɛ̨ą ə pa a yələ ta, yɛ Elise ɓa: «Elise! Ə́ kili kaa ɉu yɛ́ ə́ wɔ tímun da nɛ̨ą ɓaa a ɲą́ą́, kɛlaa, aa haa. Yaan, ə́ gɔlɔn yɛ́ diɛ, ə kɛi ɲɔw Yai-Laa ɓa. Ya ka tii, nuąi kwələ tɔɔ mą, dɔ̨nɔ̨ aa pa, yɛ ə nónnii hveelɛi ŋɛ̨i həɠə a doláá.» 2 Elise yɛ mą: «Lə kpɔɔ ɓə ŋą́ pɛli gɛi yɛ́ mɛ̨nįi ŋɛ̨i hu? Hɛn gaa ə́ yəi bɛlɛ́n, naa ɓo mą́ą́.» Nɛ̨ɛ̨nui tii yɛ mą: «Hɛn nɔpee ta hvo ə́ wɔ luwɔ-nɛ̨ą yəi, ə kulɔ mąątí wulɔ pulu!» 3 Elise yɛ mą: «Lí ə́ hɛɲąŋą howoloɠaa hvɛli ə́ kwɛlɛ nuą diɛ, yii kpɔ ə́ yee a pɛli mą. 4 Yili pulu, ə lɔ bɛlɛ́n ə́ naa kpulu yɛ́ ka ə́ lonnii kaa. Ə́ gɔwɔ tɔɔ kɛa yɛ́ nwulɔ pu ɉɛɲąŋąɠaa hu, yii naa a hvɛɛ, ə́ ɉee.» 5 Nɛ̨ɛ̨nui tii ə li kɛa bɔɔli, ə lɔ ɲəi bɛlɛ́n, ə naa kpulu da nonnii diɛ. Yiliɠaai diɛ ɉɛɲąŋąɠaa tɛɛ bɔ yɛ naahvɛɛ. 6 Yii kɛa ɉɛn vowolo ə kpɛɛ, yɛ non dɔ̨nɔ̨ ɓa: «Da hvə nwɔ̨nɔ̨!» Yili yɛ mą: «Da hvo kɛa ɓɛ.» Ə kɛ lɔ tii nwulɔ ə kpəla puɔ ɓa. 7 Nɛ̨ɛ̨nui tii ə li ə ɉukulɔ Yálá nwɔ nui ɓa, yili yɛ mą: «'Lí ə́ nwulɔ ta lɔwɔ́tɔɔ, ə́ ə́ mąą kwələ kulɔ la, yili pulu, ka ə́ lonnii ka ka wɔ yɛnɛ̨ɛ̨ kɛ gbəli hu.» Sunɛmə nɛ̨ɛ̨nu ta nwɔ lon nwun mɛ̨nį 8 Ə kɛ a yələ ta, Elise yɛ tɛɛ Sunɛmə daai, nɛ̨ɛ̨nu yee walawalaa ta ə kɛ laa ə Elise mąąnɛ̨ɛ̨, yɛ Elise ə kɔ̨nɔ̨n mįi bɔɔli. Ə həɠə kɛa ɲələi ɓa, yələi lɔpee Elise aa kɛi tɛɛ la Sunɛmə, ə kɛi li yɛ kɔ̨nɔ̨n mįi nɛ̨ɛ̨nui tii pɔɔli. 9 Nɛ̨ɛ̨nui tii yɛ ɉilɛ ɓa: «Ŋą́ gɔlɔn gɛ́, ɉulɔnui ŋɛ̨i a kɛ pai ɓɛi, gaa a Yálá nwɔ nu mąąhəɠɛɛ. 10 Gu pɛlɛ́ lon da tɔɔ bɛlɛ́ mɛ̨i pələ, gu gbin vilən nąą da taɓali, ə mą kɛ kpəlin da labon; ya ɓə a gɛ, a pa gu pɔɔli, yɛ vįitɔɔ laa.» 11 Yələ ta, Elise ə pa di pɔɔli, ə li ə laa nwɛ̨ą pɛ́lɛ́i tii mu. 12 Yɛ nwɔ tímun Gehazi ɓa: «'Lí ə́ Sunamə nɛ̨ɛ̨nui tii təli ə pa.» Nɛ̨ɛ̨nui tii ə pa bɛlɛ́ laaləi. 13 Elise yɛ nwɔ tímun mą: «'Mo mą yɛ mą: ‹Yá ku mąąwiɛ a yələ kəlee, lə kpɔ ɓə gwa pɛli gɛi yɛ́? Ə́ kaa ɓo ŋą́ ə́ mąą mɛ̨nį lɛlɛɛ ɓo tɔɔmun ma, a wala kɛ tii gɔlaɠa nwun nąmu?.›» Nɛ̨ɛ̨nui tii yɛ mą: «Kpaa-o! Liilaa kaa ɲə́i ɓɛ nwɔ́ nuą lɔwai.» 14 Elise yɛ Gehazi ɓa: «Lə kpɔ ɓə gwa pɛli gɛi nɛ̨ɛ̨nui ŋɛ̨i ɓa?» Gehazi yɛ mą: «Nɛ̨ɛ̨nui ŋɛ̨i, lon və mą, ɛlɛɛ, ɉilɛ yɛ ɓo a nu mąą pɔlɔɔ.» 15 Elise yɛ Gehazi ɓa, pənə ə́ li, ə́ dəli. Yili ə pənə ə lii dəli, ə pa ə tɔɔ bɛlɛ́ laaləi, 16 Elise yɛ mą: «Gwɛlan ŋɛ̨i pai, ɓɛlɔwai, lon ɉulɔnu a kɛ laani ə́ yee kɔ̨nwɔ̨n ɉu.» Nɛ̨ɛ̨nui yɛ mą: «Nwɔ́ mɛ̨nį nąmu, Yálá nwɔ nu, mąą hvo nɛ̨ɛ̨li ə́ lɛɛ kɛ yɛ́ luwɔ-nɛ̨ą ɓa.» 17 Gɛɛ nąą lɔwai hvo ɉəli, nɛ̨ɛ̨nui tii ə kɔ́wɔ həɠə, ə naayɛɛ a lon ɉulɔnu; yɛ bələi lɔ tii Elise ə mo la mą. Elise ə Sunamə nɛ̨ɛ̨nui lon nwun 18 Sunamə nɛ̨ɛ̨nui tii lon gɛnɛ̨i kɛa. Yələ ta, nokoloi ə tɛɛ yɛ li nąn bɔ mɔ̨nun dee kpɔn bulu. 19 Nokoloi yɛ nąn mą: «Nwún gaa mɛ́lai! Ə kə nwún!» Nąn yɛ góló kɛ mun dɔ̨nɔ̨ ɓa: «Pa ə́ li la nee pɔ ɉa-ɉa!» 20 Góló kɛ mun ə li a nokoloi ə dɛɛ nee pɔ. Nokoloi ə lɛɛ laani nee yee kɔ̨nwɔ̨n ɉu, ə lɛɛ ɉu hvóló ə haɠa, nokoloi ə haa. 21 Ə kɛ lɔ tii, nee ə li ə bowa laa Yálá nwɔ nui nwɛ̨ą pɛlɛ́ mu, gbin ŋą, ə bɛlɛ́ laa kpulu mą. 22 Yili pulu, ə wɛlɛɛ tɔɔ ɉilɛ pulu, yɛ mą: «Góló kɛ mun dɔ̨nɔ̨ tɔɔ ə pa a hoohvaalən dɔ̨nɔ̨, gáá lii Yálá nwɔ nui pɔɔli a mąąhulaa, gáá pai.» 23 Ɉilɛ yɛ mą: «Lə mɛ̨nį ɓa, yɛ́ ə́ li háákələi laa? Yaan, hvo kpɛli a ɲąnin dɔɔ nįnɛ̨, hvo nwɔ̨nɔ̨ a túwɔ́ lɔwɔ?» Nɛ̨ɛ̨nui yɛ ɉilɛ ɓa: «Hvó ə́ liihɛlɛn!» 24 Nɛ̨ɛ̨nui ɉoo hąą yili, yɛ góló kɛ mun mą: «Ɉoo laa yɛli hon, gwə li kpɔlɔɔ ɉa-ɉa, ŋą́ wala kɛ yɛ́ tɔɔ! Hvó tɔɔ.» 25 Nɛ̨ɛ̨nui ə li ə həli Yálá nwɔ nui ɓa Karmɛlə yee tona. Ɓɛlɔwai yili ə nɛ̨ɛ̨nui tii kaa la kwɛaa la, yɛ Gehazi ɓa: «Gu nwɛ̨ą leenɛ̨ąi a Sunɛmə mun, ya ka tii pai.» 26 Gilɛ həɠə, ə́ li ə́ naakwiɛn, yɛ mą: «Gu mɛ̨n! Nąą bələ lɛlɛɛi? Ə́ hilɛ kaa laa kpɛli? Nokolo kɔ́lɔi pɔ̨nɔ̨ɔi?» Nɛ̨ɛ̨nui tii yɛ Gehazi ɓa: «Nuą kəlee kaa laa kpɛli!» 27 Nɛ̨ɛ̨nui ə tɛ ə həli Elise ɓa ɲee nwuɔ̨, ə pu Elise kɔ́wɔ mu, yɛ ɲee yɛɛ a Elise kɔ́wɔ. Gehazi ə lɛɠɛ laa yɛ kɛ ə ɲee kulɔ Yálá nwɔ nui kɔ́wɔ ɓa. Kɛlaa, Elise yɛ Gehazi ɓa: «Nɛ̨ɛ̨nui ŋɛ̨i lɛɛ laa, liihələn gwəi kɛnɛ̨ a hvə mą, Yai-Laa aa mɛ̨nįi tii loo mą́ą́, hvo nɛ li mą́ą́.» 28 Nɛ̨ɛ̨nui yɛ Elise ɓa: «Akɛti, nwɔ́ mɛ̨nį nąmu, ɲą́ą́ ɓə ta kɛ yɛ́ lon dɛɛ bɔ́? Kɛlɛi ŋą́ ta kɛ kpɔ yɛ́: ‹Hvó kɛ ə́ kaa gwə́inɛ̨ɛ̨i kpɛli-kpɛli-e.›» 29 Elise yɛ Gehazi ɓa: «Ə́ hąą yili, ə́ nwɔ́ tunwɔ̨n həɠə, ə́ li la, ka nu ta kwiɛn bələ pɔ, hvó ə́ woo pili mą, nu ta a nwoo pili yɛ́, hvó hvaa nwoo mu. Ya li, nwɔ́ tunwɔ̨n ŋɛ̨i laa nokolo ɲɛ̨ilai.» 30 Nokoloi tii nee yɛ Elise ɓa: «Yii kpɔ Yai-Laa kaa a vulú, ɛlɛɛ, yɛ́ ɓo a ə́ hvulú, ŋą́ą́ gwɛ́la gɛ́ hvá lɛɛ ɓɛ və́ li.» Elise ə həɠə ə hvilɛn bulu da yaa diɛ li. 31 Gehazi aa kɛ li di tɔwɔ, lii ə mo, ə dunwɔ̨n nąą nokoloi ɲɛ̨ilai, kɛlaa, nokoloi nɔ̨ɔ̨ hvo too ɉu, hvo kpɛli hvaa. Gehazi ə pənə ə pa, ə Elise laakwiɛn, ə nwoo hukulɔ mą, yɛ mą: «Nokoloi hvo ɲįnąą ɓo li.» 32 Pai Elise ə mo bɛlɛ́ laaləi, ə nokoloi kaa laani gbin ŋą a bowa. 33 Elise ə lɔ nu powa pɔ bɛlɛ́n, ə bɛlɛ laa kpulu mą. Ə Yai-Laa hvɛli. 34 Yili pulu, ə pɛlɛ nokoloi mɛ̨i, ə nąą pɛlɛ naaləi, di ɲɛ̨ilaai ə hee gee ɓa. Ə ɲeeɠaa huhaŋą, ə ɲeeɠaa pɛlɛ nokoloi nwɛi mɛ̨i, ə lɛɛ tii pɛlɛ ni nokoloi mɛ̨i, nokoloi kɔ́lɔ yɛ hulɔ. 35 Yili pulu, Elise ə həɠə gbin ŋą, ə hvilɛn yɛ tɛɛ tɛɛ ɓo bɛlɛ́n, ə pənə ə tɛ, ə pɛlɛ nokoloi mɛ̨i. Ə kɛ lɔ tii, nokoloi ə tíhoo haɠa gee mɛ̨i mɛ̨ihveelɛ, ə ɲɛ̨i həɠə mą. 36 Elise ə Gehazi təli, yɛ mą: «Mo nee ɓa, ə pa.» Gehazi ə dəli, yili ə pa ə həli Elise ɓa. Elise yɛ mą: «Ə́ lon ga, ɉəɠə ə́ li la.» 37 Nɛ̨ɛ̨nui tii ə pa, ə pɛlɛ Elise kɔ́wɔ mu, ə kwɛli hvilɛn mą, yili pulu, ə non ɉəɠə da yaa di kulɔ. Elise ə Pilimąą ɲąą pənə 38 Elise ə li Gilgalə ɓɛlɔwai pulu toɔ kɛ la nɔi. Yɛ bələi Yálá kwəi mɛ̨nį hukulɔ nuą di wɔ kalan nɛa di kɛ la laa, di kɛ heeni Elise lííla, Elise ə mo nwɔ tímun mą, yɛ mą: «Nəɠi kɛnɛ̨i tii hee nwɔ̨n ɲą, ə́ kɔ̨nɔ̨n ɲili Yálá kwəi mɛ̨nį hukulɔ nuą di wɔ kalan nɛai mąą mɛ̨nį ɓa. 39 Galan nɛa tii tɔ̨nɔ̨ ə həɠə yɛ li lɔwɛi kala ta kwɛlii, ə kilikɛmąą huwu ta kaa, ə da kulɔ, ə mąąhəɠə kpɔlɔ laahvɛɛ la, ə paa la, ə ɉu tee tee, ə bu nəɠii. Di hvo kɛ nwulu ɓa huwu yili kɔ́lɔn, di ɲili, ə mɔ̨. 40 Di ŋąąkwɛlɛ nuą diɛ. Kɛlaa, yii kɛa di gɔwɔn, di tomą, diɛ kɛ mą: ‹Yálá nwɔ nu! Nu paa hɛn ga ŋɛ̨i nəɠii!›» Di hvo pɛli mįi. 41 Yálá nwɔ nui yɛ diɛ: «Ka pa a lɛɠɛ hunwɔ̨!» Ə lɛɠɛ hunwɔ̨i tii ta həɠə, ə bu nəɠi, yɛ diɛ: «'Ka ɲąąkwɛlɛ nuą diɛ di mįi.» Gɔ̨nɔ̨n tii ə kə kɛa a mįi hɛn. Elise ə nu nwun dɔ̨nɔ̨ kɔ̨nɔ̨n gɛ 42 Hulɔnu ta ə həɠə Baalə-Salisa yɛ pa, nɛɠɛ ŋɛ̨i da naakwɛlanmo Yálá ɓa a hɛn dɔlɔɔ, ə ɓo ɲəi. Ə kɛ a kpai lɛɠɛ mɔ̨n ŋąą pow hveelɛ, da mɔ̨nun nįnɛ̨, ə kɛ ɲəi ɓíi hu. Elise yɛ mą: «Ŋąąkwɛlɛ nuą diɛ, di mįi.» 43 Elise yɛ nwɔ tímun mą: «Ŋąąkwɛlɛ nuą diɛ di mįi, mąąhɔlɔɓo, mɛ̨nį Yai-Laa ə mo ya ka, yɛ diɛ: ‹Da mįi gbəli ə lɛɛ.›» 44 Elise nwɔ tímun ə ŋąąkwɛlɛ nuą diɛ, di mįi gbəli ə lɛɛ, yɛ bələi Yai-Laa ə mo la. |