Tɔɔɓɛlaa veelɛ 3 - Yálá laawoo hɛɓɛ (dc)

Israɛlə tɔɔmun Yoramə

¹ Akabə lon Yoramə ə kɛ a tɔɔmun, Israɛlə lɔi hu, ɉəɛ Samari daai. Ɉosafatə, Ɉuda tɔɔmun, nwɔ tɔɔlaa gwɛlan bow kɔ́w mɛ̨ihaaɓa lɔwai. Yoramə ə tɔɔlaa kɛ a kwɛlan bow kɔ́w hveelɛ.

² Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, Yoramə ə gɛ. Kɛlaa, nwɛi kɛ pələ hvo kɛ yɛ nee da nąn di wɛi, mąąhɔlɔɓo, gwɛnii ŋɛ̨i nąn ə dɔɔ Baalə laa hu diɛ haláá kulɔ mą, ə yili kulɔ laa.

³ Kɛlaa yaamun, nɛ̨ŋɛ̨n Nevatə lon Ɉeroboamə ə Israɛlə yee lɔ ɉu, Yoramə ə lɛɛ a ganąŋąą nɛ̨ŋɛ̨n tii ɓa, hvo kpɔ bulu tɔɔ mą.

Israɛlə da Ɉuda di kɔ́ pɛlɛ Moabə lɔi ɓa

⁴ Moabə tɔɔmun Mesa ə kɛ a taatɛlɛɛ tɔɔmun, ə kɛi daatɛlɛɛ tii nii hɔ̨ŋɔ̨ kulɔ a ɓɛlaa lon nwaa nwun dɔ̨nɔ̨, da ɓɛlaa haa waa nwun dɔ̨nɔ̨, bɛlɛɛ di lɛɠa ɓa, yɛ dɛɛ Israɛlə tɔɔmun bɔ.

⁵ Kɛlaa, Akabə haa pulu, Moabə tɔɔmun ə gwɛli tee Israɛlə tɔɔmun ɲəi.

⁶ Nąąlɔwai, Yoramə ə kulɔ Samari ɲąą ɓa, ə nɔi nuą kəlee ɲąąkpɔn.

⁷ Yili pulu, ə kɛla tɔɔ Ɉuda tɔɔmun Ɉosafatə pɔ, yɛ mą: «Moabə tɔɔmun aa gwɛli tee ɲə́i, ya pɛli pai ə kpɔn mą́ą́, gu kɔ́ pɛlɛ Moabə ɓa?» Yili yɛ mą: «Gáá pai, gwa yɛ́ gu tɔɔi ə kɛ taanɔ̨, ə́ wɔ nu huwui da nwɛ́i di tɔɔi ə kɛ taanɔ̨, ə́ wɔ hooɠaai da nwɛ́iɠaai di tɔɔi ə kɛ taanɔ̨.

⁸ Yɛ nwɔ̨nɔ̨ mą, bələ lə kɛɛ ɓə gu tɛɛi la?» Yili yɛ mą: «Edɔmə nɔi pun ɉu pələ ɓə gu kaa tɛɛi la.»

⁹ Israɛlə tɔɔmun da Ɉuda tɔɔmun, ɛlɛɛ, Edɔmə tɔɔmun di hvilɛn gea bələ ɓa. Di kpɛlaan-gbɛlaan, di hvóló mɛ̨ihveelɛ kɛ diɛ hiɛ, ya ə kpɛɛ kɛa nu kanŋaa da ɉuwɔɠaa mąn di yəi.

¹⁰ Israɛlə tɔɔmun ə tomą, yɛ mą: «Ee! Akɛti Yai-Laa ə dɔɔɓɛlaa haaɓai ŋɛ̨i ɲąą kpɔn di lɔ mɛ̨nį ɓa Moabə yee ŋą?»

¹¹ Ɉosafatə yɛ mą: «Yálá kwəimɛ̨ni hu kulɔmun da hvo ɓɛ yii a pɛli Yai-Laa mąąnin kɛi?» Israɛlə tɔɔmun bɔ mun dɔ̨nɔ̨ yɛ diɛ: «Safatə lon Elise kaa ɓɛ, yai kɛi ya pu Eli yəi.»

¹² Ɉosafatə yɛ diɛ: «Yai-Laa kaa ɉulɔnui tii pɔ.» Israɛlə tɔɔmun da Ɉosafatə da Edɔmə tɔɔmun, də li Elise pɔɔli.

¹³ Elise yɛ Israɛlə tɔɔmun mą: «Lə mɛ̨nį ɓə gwa yɛ́ gu lɔwai? 'Li ə́ nąn nwɔ Yálá kwəi mɛ̨nį ɓo nuąi pɔɔli a wala kɛ tii ə́ lee nwɛiɠaa.» Israɛlə tɔɔmun ə nwoo pulu pənə, yɛ mą: kpaa! Mąąhɔlɔɓo, Yai-Laa ə dɔɔɓɛlaa haaɓai ŋɛ̨i ɲąąkpɔn giɛ, di lɔ mɛ̨nį ɓa Moabə yee ŋą.

¹⁴ Elise yɛ mą: «Yai-Laa Mɛ̨nį Kəlee ŋą Hééɓomun, yai gáá tíi mą, nąą hu, a wala kɛ kɛ a Ɉuda tɔɔmun Ɉosafatə mąą mɛ̨nį, və́ ni mɛ̨nį lɔpee ta ɓo yɛ́, va kpɛli kɛ ɲɛ̨i hee ə́ ɲɛ̨́i.

¹⁵ Yɛ diɛ, 'ka hvɛli kɛmun dɔ̨nɔ̨ təli ə pa.» Yii kɛa vɛli kɛmun ə kɛi vɛli kɛ, Yai-Laa yee ə yɛɛ Elise mɛ̨i;

¹⁶ yɛ diɛ, mɛ̨nį Yai-Laa ə mo ya ka: «Ka yálɔwa tamąą tee moloon ŋɛ̨i hu,

¹⁷ Yai-Laa yɛ hvaŋą hvo pai tɛɛi, tulɔ hvo pai pui kɛlaa ə mą kɛ tii moloon ŋɛ̨i laa kaa pai hvɛɛi a ya kaa gbələ. Kaa kpinįi ə mą kɛ ka wɔ taatɛlɛɛɠaai.»

¹⁸ Yili hvo kpɛli pai kɛi Yai-Laa ɲɛ̨i ɓa a mɛ̨nį wala wala, kɛlaa, gaa nwɔ̨nɔ̨ pai Moabə lɔi ka yee ŋą.

¹⁹ Daa kpɛa kpɛaɠaai hįi tɔɔ diɛ, ka káá pai gəlee woloi kpɔ tɛ̨ɛ̨tɛ̨ɛ̨, da daa kpɛa kpɛa takpɛliɠaa; ka ɉi wuluɠaa kəlee tee, ka di kpələ yálɔwaɠaa kəlee laa kpulu, ka di wɔ tíi kɛiɠaa kəlee kala a kwɛni hiinɠaa.

²⁰ Yələ ɓɔɔ, yələwala haláá kulɔi lɔwai, ya ə gɔwɔ tɔɔ kɛa yɛ kulɔ, yɛ həɠə Edɔmə, ə nɔi nąą kəlee laahvɛɛ.

²¹ Ɓɛlɔwai Moabə nuą di gaa la diɛ dɔɔɓɛlaa haaɓai tii daa pa kɔ́ pɛlɛ diɛ, nuąi kpɔ kɛ da pɛli ɓɔwa yalai daai, di gəlee ŋąąkpɔn, da yiiɠaai kɛ daa həli kilɛn bilii, di kəlee də li nɔi ɲɛ̨n ma.

²² Yələ ɓɔɔ, Moabə nuą di di muhəɠə, hvóló yɛ hɔɔ ɲáɠaa ŋą, di ɲáɠaa kaa, gəlee kpɔluɔ yɛ ŋąmą,

²³ diɛ mą: «Ŋąmą ka! Gaa yɛ dɔɔɓɛlaa ŋɛ̨i daa di kee paa a ɓɔwa, Moabə nuą, ka ka muhəɠə ka li ka too di mɛ̨i.»

²⁴ Ɓɛlɔwai kɛa di lɛɠɛ la Israɛlə kɔlaɠai kwɛlɛ, Israɛlə nuą di di muhəɠə di Moabə nuą tamąą paa, yiliɠaai di pu di tɔwɔ, di lɛɛ di pulu, di lɔ a diɛ di wɔ lɔi hu, di di paa kpɔ kɛnɛ̨.

²⁵ Israɛlə nuą di Moabə nuą di wɔ taaɠaai wolo, diɛ kwɛni pili di yəi ɉihɛnŋąą hu, di nąą laahvɛɛ la. Di di wɔ yálɔwaɠaai laahvɛɛ, di ɉi wuluɠaa kəlee tee. Kirə-Harɛsɛtə hįi kpoloon nɔ ɓə lɛɛ, ɲələvin bili nuą di mąą tinɛ̨n di nwolo.

²⁶ Yii kɛa Moabə tɔɔmun ə gaa yɛ gɔ́ aa kala mą, ə kɔ́kuláá nwun mɛ̨ihveelɛ həɠə, di kɔ́ pɛlɛ Edɔmə ɓa; yiliɠaa kpɛli di yee hvo lɔ.

²⁷ Non ɉilɔnu dɔlɔɔ ŋɛ̨i kɛi pa heei a mąąhvalin, ə yili həɠə ə gulɔ ɉįi kpoloon mɛ̨i a haláá. Yili ə nwąną kpɔ Israɛlə nuą diɛ kpɔ kɛnɛ̨, di həɠə laa, di li di pɔ taaɠaa.