Tɔɔɓɛlaa veelɛ 25 - Yálá laawoo hɛɓɛ (dc)

Nabukodonosorə ə Ɉerusalɛmə mąątinɛn a kɔ́

¹ Sedesiasə nwɔ tɔɔlaa gwɛlan mɛ̨inąąn nɔwai, ɲąnin bow nwɔ hvóló pow yələ; Babilonə tɔɔmun ə pa ə kɔ́ pɛlɛ Ɉerusalɛmə taa ɓa da nwɔ kɔlaɠaɠaa kəlee, ə di tɔɔi kulɔ ɉįi ɓa nąą kəlee, ə doo gee hu.

² Daa ə tɔɔ gɔ́ la, ə lɛɛ, kpɔ ɉu Sedesiasə nwɔ tɔɔlaa gwɛlan bow kɔ́w tɔ̨nɔ̨ lɔwai ə ɉəli.

³ Ɲąnin nwɔ hvóló mɛ̨inąąn ɲələ, pulu aa kpɔlu kɛa kɛ daa kwəi, kɔ̨nɔ̨n və kɛa kɛ nuą yəi,

⁴ Kalde nuą di nɛɛ mą, di wolo tee daa mąąkpɛ hį́i ɓa. Kwii hąą, Ɉuda kɔkulaaɠaa di pu. Bələi mąn Kalde kɔkulaaɠaa daa kɛ Ɉerusalɛmə taa mąątinɛn na, ɉį́i naaləi ɲii ŋɛ̨i kɛ a tɔɔmun yəi nɔw yɛa pələ, nąą bələ ɓə di tɛɛ la, ɉį́i hveelɛi ti lɔwai. Da tɔɔmun ni di ɉaŋą a Ɉurdɛn ɲa-ɓoloon bɔ pələ.

⁵ Kɛlaa Kalde kɔkulaaɠaa di hvilɛn tɔɔmun bulu di ɉon Ɉeriko ɲɛa kɔ́wɔ hu. Nwɔɔ kɔ́ kɔ́ nuą kəlee daa kɛ pu gɔ́ ɓa, daa taɠa mą.

⁶ Kalde nuą di tɔɔmun ɉon, di tɛ la Rivla daai Babilonə tɔɔmun bɔ. Nąą ɓə di tɔɔmun giti tee laa.

⁷ Di Sedesiasə lonnii hinąą nwun dee di nąn ɲɛ̨i ɓa. Yili pulu, Nabukodonosorə ə Sedesiasə ɲɛ̨i wolo, ə yɔwɔɔn veelɛ kpulɔn mą, ə li la Babilonə.

Ɉerusalɛmə taa pu mɛ̨nį da nuwɔlaa veelɛnąą

⁸ Ɲąnin nɔɔli nąą nwɔ hvóló mɛ̨ihveelɛ yələ, Babilonə tɔɔmun Nabukodonosorə nwɔ tɔɔlaa gwɛlan bow mɛ̨inąąn nɔwai, Nebuzaradan, yai kɛ a tɔɔmun mąąkpɛ nuą nwun nąmu, yɛ ɓo nwɔ̨nɔ̨ a kɔ́kuláá nwun nąmu, ə pa Ɉerusalɛmə daai,

⁹ ə Yai-Laa hee pɛlɛ́ kələn, da tɔɔmun nwɔ pɛ́lɛ́i, ə mą kɛ, Ɉerusalɛmə pɛlɛ́ɠaa kəlee.

¹⁰ Kalde kɔ́kulááɠaai lɛɛ tɔɔmun mąąkpɛ nuą nwun nąmu pɔ, di kəlee di Ɉerusalɛmə mąąkpɛ hįi pu.

¹¹ Yili pulu, Nebuzaradan, tɔɔmun mąąkpɛ kɔ́kulááɠaa nwun nąmu, ə nɔi lonnii kpəli tii lɛɛ daa kwəi, ə li a diɛ luwɔlaa hu da bulu kulɔ nuą tii di kpɔwɔ tɛɛ Babilonə tɔɔmun bɔ, da nɔi nuą gbəli.

¹² Tɔɔmun mąąkpɛ kɔ́kulááɠaa di nwun nąmu, ə nɔi kóló kɛ nuą lɛɛ laa diɛ pɛli ɉihɛnŋąą laahɔmoi da díiɠaa.

¹³ Kalde kɔ́kulááɠaa di Yai-Laa nwɔ pɛli hɔlɔɔnŋąą huyali yali da ɉɛnŋaai kɛ di hvilɛn ŋąą di mɛ̨i, ɛlɛɛ, da ɉɛnɲąŋą kɛnɛ̨i a mala kwɛli ə ɓo Yai-Laa yəi bɛlɛ́n, di ɉəɠə də li la Babilonə lɔi hu.

¹⁴ Di gəgənŋąą həɠə, da goagoaɠaa, moaɠaa, gbələ kɔ́wɔɠaa da ɉaláá kulɔ hɛɲąŋąɠaa di kɛ a mala kwɛli.

¹⁵ Tɔɔmun mąąkpɛ kɔ́kulááɠaa di nwun nąmu, ɉɛnŋaai kɛ a hɛni da wali kwɛli ə ɉəɠə, ə bɛlɛ lansan kələn hɛnɲąŋąɠaa, da nuą mąąhəɠə hɛnɲąŋąɠaa ɓa.

¹⁶ Ɉɛnŋąą ŋɛ̨i Salomɔn ə bɛli Yai-Laa hee pɛlɛ́ mu, a mala kwɛli, bɛlɛ hɔlɔɔn veelɛi, ɉɛɲąŋą kɛnɛ̨i tii da ɉee hɛnŋąą, nu hva pɛli kɛ nwiɛ yee kɔ́lɔn ɉii.

¹⁷ Bɛlɛ hɔlɔɔn dɔ̨nɔ̨ kwɛa yee ə kɛ a yee laa mą pow kɔ́w mɛ̨ihaaɓa. Hɛn da pɛlɛɛ kɛ nwuɔ̨, yɛ ɓo a ɓala kwɛli, a yee laa mą haaɓa, mąąpuɔ a wulu ɓaɠaa da wulu powaɠaa mąąnįnįn, gəlee di ɓo a ɓala kwɛli. Veelɛ nąą, da mąąpu hɛnŋąą di kɛ lɔ yɛ dɔlɔɔ tɔlɔɔ.

¹⁸ Tɔɔmun mąąkpɛ kɔ́kulááɠaa nwun nąmu ə, Seraya hon, yai kɛ a ɉaláá kulɔ nuą nwun nąmu ə mą kɛ, Sefaniahu, yii lɛɛ bɔɔ ɓa, da bɛlɛ́ laaləi mąą kpɛ nuą haaɓai.

¹⁹ Ə pənə nwɔ̨nɔ̨, ɲala nąmui kɛ gúlaaɠaa nwun na daa kwəi, ə ɉon; da Ɉuda tɔɔmun ɉee gwɛlɛ nuą nu lɔɔlii kɛ daa kwəi, da ɉɛɓɛ́ kɛ mun kɛ gɔ́ mɛ̨nį nwuna yɛ gɔ́kulááɠaa həɠə, ə bɛlɛ nɔi nuą nu pow mɛ̨ida ɓa da diɛi ə di kaa taai.

²⁰ Nebuzaradan ə nuą tii hon, ə li a diɛ Babilonə tɔɔmun bɔ Rivla daai

²¹ Babilonə tɔɔmun ə nuą tii kəlee paa kpɔ kpai Rivla daai Hamatə lɔi hu. Bələ ɓə di Ɉuda nɔi nuą hon na a luwɔ, di di mąą kwɛa di pɔ lɔi ɓa.

Gedaliasə ə kɛ a gbahanama Ɉuda lɔi nwun na

²² Nuą yiiɠaai lɛɛ Ɉuda lɔi hu, diɛi Babilonə tɔɔmun Nabukodonosorə ə di lɛɛ laa, ə Safan mąnįn Gedaliasə Ahikamə lon ɉee di nwun na a di ɲąąwooɓomun.

²³ Ɓɛlɔwai Ɉuda kɔlaɠa nwun nąmįną di bələ mɛ̨n na, diɛ kɛ Babilonə tɔɔmun aa kɛ Gedaliasə hee Ɉuda lɔi nwun na, di pa da wɔɔ nuąi, di həli Gedaliasə ɓa Mispa daai; nuą tii ɓa: Netania lon Yismaɛlə, Karea lon Yohanan, Tanhumɛtə lon Seraya yai kɛ a Netofa daai mun, ɛlɛɛ, Maaka mun lon Yaaniahu.

²⁴ Gedaliasə ə nwoo ŋɛ̨i ɓo diɛ a nwąną da di wɔɔ nuąi, yɛ diɛ: «Ka hvo ɲɔw ka lɛɛ mɛ̨nį ɓa Kalde nuą yee mu, ka lɛɛ heeni ka heeiɠaa ɓa, kaa tí Babilonə tɔɔmun ɓa, nɔi hu a nɛ̨ɛ̨ kaa.»

²⁵ Kɛlaa, ɲąnin mɛ̨ihveelɛ lɔwai, Elisama yai kɛ a dɔɔ kwəlii mun da, mąnįn Yismaɛlə yaai a Netania lon, da nu pow di pa di Gedaliasə paa, ə mą kɛ, da Ɉuda nuą, da Kalde nuąi da diɛni da kɛ Mispa daai.

²⁶ Nɔi nuą kəlee, nu kpɛa kpɛaa mąn, nɛapɛlɛɛɠaa mąn, da gɔ́kulaa kpulu nwun nąmįną, di pu diɛ li Eziptə lɔi hu pələ diɛ ɲɔw Kalde nuą diɛ.

Babilonə tɔɔmun ə Yoyakin mąą hvaalɛɛ

²⁷ Ɉuda tɔɔmun Yoyakin nwɔ luwɔlaa gwɛlan bow haaɓa gɔw mɛ̨ihveelɛ lɔwai, ɲąnin bow gɔw hveelɛnąą, ɲąnįn nwɔ hvóló pow hveelɛ gɔw mɛ̨ihveelɛ yələ, Ewilə-Merodakə yai kɛ a Babilonə tɔɔmun, gwɛlan tii ə dɔɔlaa hɔlɔɓo la, ə Ɉuda tɔɔmun Yoyakin ɲɛ̨imąąwɛli kaa, ə gulɔ gaho ŋą.

²⁸ Ewilə-Merodakə ə kɛi hvaa Yoyakin pɔ a wɛlikɛ mąą laa, ə heei kɛnɛ̨ tɛɛ Yoyakin pɔ a ɲee muhəɠɛɛ ə tɛɛ dɔɔɓɛlaa kpɔ tii da diɛni di kɛ nuwɔ laa yɛnɛ̨ɛ̨ tɔ̨nɔ̨i tii hu di wɛiɠaa diɛ.

²⁹ Ewilə-Merodakə ə Yoyakin nwɔ gaho həɠəɠaai kulɔ gwąną; da yaa diɛ kɔ̨nɔ̨n mįi gee ɓa a yələ kəlee.

³⁰ Bələ ɓə Yoyakin nwɔ hvóló tɛitɛi kɔ̨nɔ̨n ə kɛ la tɔɔmun Ewilə-Merodakə nwuɔ̨ hvóló kəlee ə lɛɛ la ɉu ə haa.