Tɔɔɓɛlaa veelɛ 24 - Yálá laawoo hɛɓɛ (dc)

¹ Nąąlɔwai tii hu, Babilonə tɔɔmun Nabukodonosorə ə Ɉuda lɔi hon a kɔ́. Yoyakimə ə lɛɛ ɲee mu, kwɛlan ɉaaɓa yee mu. Gwɛlan ɉaaɓa kpɛɛi lɔwai, Yoyakimə ə pənə ə Babilonə tɔɔmun yee mɛ̨i yali.

² Nąąlɔwai, Yai-Laa ə Kalde nuą, Aramə nuą, Moabə nuą da Amɔn lonnii di ɲąątɔɔ Yoyakimə ɓa. Yai-Laa ə di tɛɛ Ɉuda lɔi hu pələ, ə gɛ, di nɔi nuą huwu pu, yɛ bələi Yai-Laa ə bu laŋɔ tínuą la, diɛi kɛ a gwəi məni hukulɔ nuą.

³ Yili kəlee ə kɛ a Yai-Laa nwɔ mɛ̨nį pɛliɛ, ə gɛ, ə Ɉuda lɔi kulɔ ɲɛ̨i mu, a Manase nwɔ nɛ̨ŋɛ̨n ə ɉəɠə nąą pɔɔ.

⁴ Gwəi kwələ nuą ɲąmąi Manase ə bu, ə Ɉerusalɛmə daai laahvɛɛ la, mɛ̨nįɠaa tii ɓə gɛ, Yai-Laa hvó gɛ hvo Ɉuda lɔi mąą hvaalɛɛ la.

⁵ Yoyakimə kɛ mɛ̨nįɠaa gbəli, mɛ̨nįɠaa kpɔ ə gɛ, kɛlɛi bɛ̨ɛ̨i Ɉuda tɔɔɓɛlaa kɛ mɛ̨nį hɛɓɛ́ hu-e!

⁶ Yoyakimə ə laa nąni kwɛlɛ, non Yoyakin ə hee gbəlin ɉu a nąn mąąhvalin.

⁷ Eziptə tɔɔmun hvo kɛa kulɔ nwɔ lɔi hu, mąąhɔlɔɓo, nɔiɠaa kpɔ kɛ Eziptə tɔɔmun ɲee mu, Babilonə tɔɔmun ə gəlee həɠə ɲəi. Ə həɠə Eziptə ɲa lee ŋɛ̨i a Nilə mą, ə həli la Eufratə ya ɓa.

Luwɔ laa yai kɛ a Yoyakin nwɔ yələi dɔlɔɔ

⁸ Yoyakin kaa kwɛlan ə kɛ pow kɔ́w mɛ̨ihaaɓa, yɛ dɔɔlaa hɔlɔɓo. Ə dɔɔlaa kɛ Ɉerusalɛmə a ɲąnin ɉaaɓa. Nee laa ɓa kɛ a: Nehusta, Ɛlnatan ŋɛ̨i kɛ a Ɉerusalɛmə daai mun non nɛ̨ɛ̨nu li kɛ.

⁹ Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə Yoyakin ə kɛi gɛ, yɛ bələi kpɔlɔɔ nąn ə kɛi gɛ la.

¹⁰ Nąąlɔwai tii, Babilonə tɔɔmun Nabukodonosorə nwɔ nuąi di pa kɔ́ pɛ́lɛ́i Ɉerusalɛmə ɓa. Di daa mąątinɛn di doo gee hu.

¹¹ Babilonə tɔɔmun Nabukodonosorə yaa kpinįi ə pa, ɓɛlɔwai nwɔ nuąi di kɛi Ɉerusalɛmə hon na.

¹² Ɉuda tɔɔmun Yoyakin ə gbɔwɔ tɛɛ Babilonə tɔɔmun bɔ a kɔluwɔ. Yaa da nee, da nwɔ tínuą, nwɔ kalanɉonŋąą, da nwɔgbɛtɛgbuwuluɠaa. Babilonə tɔɔmun ə di hon a luwɔɠaa. Tɔɔmun Nabukodonosorə nwɔ tɔɔlaa gwɛlan mɛ̨ihaaɓa lɔwai li kɛ.

¹³ Ə li a Yai-Laa yəi bɛlɛ́n ɉɛnŋąą kəlee da tɔɔmun ɲəi bɛlɛ́n ɉɛngu kəlee. Ɉaláá kulɔ hɛnɠaa kpɔ Israɛlə tɔɔmun Salomɔn ə di pɛli, ə gəlee kala. Mɛ̨nį Yai-Laa ə mo, nąą ə hvɛɛla.

¹⁴ Nabukodonosorə ə li a Ɉerusalɛmə nuą kəlee luwɔlaa hu. Nąą kpɛa kpɛa nąmįną kəlee, da galanɉonŋąą kəlee di pɛlɛɛ di kee ɓa di kɛ a: nu waa pow. Ə mą kɛ gwɛli yɔw nuą da ɲɛlɛ kɛ nuą kəlee; tíi kɛ nuą lɔ ɓə di di lɛɛ laa.

¹⁵ Nabukodonosorə ə li a Yoyakin nee, nɛ̨ąni, da nwɔ tínuą, da nɔi kalanɉonŋąą da nwɔ gbɛtɛgbuwuluɠaa, ə di kulɔ Ɉerusalɛmə, ə li a kɛ diɛ Babilonə luwɔlaa hu.

¹⁶ Nąą kpɛa kpɛaa nąmįną, yiiɠaai kɛ a kɔkulaaɠaa, di kɛ a nu waa mɛ̨ihveelɛ, ɲɛlɛ kɛ nuą, da gwɛli yɔw nuą di a nu waa tɔ̨nɔ̨.

¹⁷ Babilonə tɔɔmun ə Yoyakin kulɔ dɔɔlaa hu, ə mąąhvalin a Yoyakin galá Matania, yii di nąą mąąhvalin a Sedesiasə.

Sedesiasə Ɉuda tɔɔmun gbəli

¹⁸ Sedesiasə kaa kwɛlan ə kɛ a kwɛlan bow hveelɛ kɔ́w tɔ̨nɔ̨n, yɛ kɛ a tɔɔmun. Ə tɔɔlaa kɛ Ɉerusalɛmə a kwɛlan bow kɔ́w tɔ̨nɔ̨n. Nee laa ɓa kɛ a: Hamutalə, yai kɛ a Livna mun Yimeyahu lon nɛ̨ɛ̨nu.

¹⁹ Mɛ̨nįi kpɔ ɲɔ̨nwɔ̨ɔ̨ Yai-Laa ɲɛ̨i ɓa, ya ɓə Sedesiasə ə gɛ, kpɔlɔɔ yɛ bələi Yoyakimə ə gɛ la.

²⁰ Mɛ̨nįɠaa tii di laa Ɉerusalɛmə da Ɉuda diɛ, mąąhɔlɔɓo, Yai-Laa ə niiŋanwana diɛ, ə di pili kwɛaa la, ə di həɠə ɲɛ̨i mu. Sedesiasə ə muhəɠə Babilonə tɔɔmun nąą ɓa a kɔ́.